بشرة صافيه ونقيه ومشدوده تجربتي الشخصيه حل المشكلة

شلونكم بنات حلوات
بقولكم سر من اسرار جمالي أحم احم (على بالي هيفا وهبي) صراحه الي خلاني اكتب الموضوع تعليق خبيرة تجميل في معرض العرايس الي رحت له قبل جم يوم ملقوفه وعايشه الدور ورحت المعرض وماخليت شي ماجربته جني عروس
المهم لمن كنت اجرب البودرة صراحه روعه بعدين اقولكم عنها ان شالله قالت لي الحرمه انتي حاطه كريم اساس قلت لها لأ وصراحه ماكنت حاطه كريم اساس بس مسحه خفيفه من بودرة مضغوطه حاطتها من الصبح وماظل فيها شي
الحين اقولكم السر بذرة ال قطونه الحين اكثر من ثلاث اشهر استخدمها صراحه روعه طبعا انا بشرتي وايد حساسه وكان صاير معاي تحسس من دوا اخذته (مجموعه فيتامينات) وصار معاي رد فعل عكسي تلف بشرتي حبوب وبقع وتعبت نفسيا وآنا من النوع الخواف ماخذ ادويه ابدا بس اللقافه
المهم نتايج البذرة عجيبه :
ازاله البقع
شد البشرة
تصغير المسام
توحيد لون البشرة

بس فيه تحذير فيه ناس ممكن تأثر على بشرتهم يعني ممكن تسوي لهم حساسيه ومنهم اختي ياحرام بس آنا صراحه وايد وايد حسنت بشرتي هذي تجربتي الشخصيه يعني الموضوع مو منقول
ان شالله تجربونها وتستفيدون وتدعون لي دعوه حلوه جذيه مثلكم اي وحده تجربها ياريت تقولنا النتيجه

من وين القاها بذرة ال قطونه اول مرة اسمع عنها….

سمعت عنها في احد المنتديات بس مادري و الله اول مره ارف ان كل هالنتايج واقعيه @_@
تسلمين على التجربه و ان شاء الله لو في وقت بجربها ..

حبوبه تلاقينها عند الحواي وبعد لها اسم ثاني اعتقد لسان الحمل بس تأكدي انها مو بذور القطن او الكتان لأنها تختلف عنهم والناس دايما تغلط مابينهم بس عن تجربه رووووووووووووووووووعه للبشرة والله هذي تجربتي وان شالله تستفيدين لأني بصراحه ادور كل شي طبيعي عشان بشرتي الحساسه ماتستحمل شي

جربيها ان شالله ماراح تندمين بس مثل ماقلت اول شي جربي على جزء صغير من ويهج اجتياط ولها اكثر من طريقه بس آنا طريقتي الي ارتحت عليها كالتالي:
اطحن الحبوب طحن خفيف واضيف له ماي دافي واحركه لمن يصير مثل الجل عقبها احطه على ويهي مثل الماسك طبعه شكله بشع ويخوف اذاا عندج يهال او ريل مانصحج تحطينها جدامهم اخليها على قد ماقدر من ساعتين وطالع عقبها لمن تنشف اشيلها شوي شوي من على ويهي وادهنه بزيت لوز واخليه نص ساعه عقبها اغسل ويهي عاد انتي بأي صابونه تحبين (آنا ماستخدم الصابون على ويهي) عقبها ادهن ويهي بمسحه خفيفه من زيت جنين القمح وسلامتكم
النتيجه بشرة ماشالله روعه وبأشياء طبيعيه
يالله شدو الهمه وجربوا ناطرة نتايجكم

مشكوووووووووووووووووووووووووووووووره

هيه زينه للكلف والنمش