بسير دبي عقب الفطور وين اسير شو تقترحون علي؟؟؟محتاره لان الدنيا رمضان… سياحة الامارات

يسرج الحال حبوبة ^.^

اممم بحاول افيدج مع اني من النوع اللي ما اطلع وايد ومن بداية رمضان ما سرت مكان عشان جيه ما عندي فكرة عن الفعاليات والأنشطة الرمضانية .. يعني بيتوتية على قولتهم لول

في دبي عندج واايد اماكن غاوية ورومنسية بس حلاتها في الشتا .. مثل الممشى (ذا ووك) و مرسى دبي و مدينة جميرا وميناء السلام ومردف اب تاون .. احس الجو هالوقت ما يساعد لأن الرطوبة تذبح ! الا اذا بتيلسون في مطعم مسكر في الممشى ممكن والإخت ام برقع كنغ كانت تمدح مطعم سراي Sarai

و بالنسبة للمولات عندج العربي سنتر يديد في طريق الخوانيج .. المول متوسط مش وايد كبير بس فيه محلات حلوة وماركات زينه و المطاعم بعد فيها خيارات متنوعه .. انا كلت عندهم في مطعم هندي أكله حار بس لذيييذ يمي يمي ولين الحين تم فخاطري

و بعد الواحة سنتر انا ما سرته بعد ما افتتحوه من يديد لكن يمدحونه =)

و عندج بعد شارع جميرا فيه سناتر صغيرة وايد وحلوة وملمومة مثل القرية (ذا فيلج) وغيره .. يعني ممكن تتمشون في شارع جميرا وتاخذون لفه على المحلات والسناتر ..

عموماً هذا اللي يحضرني الحين وباقي المولات والسناتر الجديمة اكيد انتي تعرفينها ^_^