~!~"براونيز" شوكولاين تطيب الخاطر.. *بالصور*!! ~!~ معجنات و سندويتشات

شرايكم نسوي براونيز!!

يالله.. (هذه مسويتها قبل يومين ومن تصويري.. ومع قهوة عربية يا عيني!!)

جربوها سهله وتراها موب حالية واجد يغص فيها الواحد مثل اللي في المحلات.. بالعكس حلاها تمام!!

المقادير:
– مقدار كوب وربع طحين أبيض منخول
– مقدار ثلاث أرباع الكوب سكر بودرة
– 6 شوكولا جالاكسي العادية السادة
– 3 بيضات
– اصبع زبدة غير مملحة (113 جرام)
– رشة ملح
– ملعقة شاي فانيليا

الطريقة:
1- اعملي حمام مائي لـ 3 جالاكسي مع الزبدة كاملة. (حمام مائي يعني: حطي قدر موية على النار.. وحطي الجالاكسي والزبدة في طاسة فوق القدر.. عشان يذوبهم البخار شوي شوي)
2- اخلطي بملعقة خشب كل المكونات الثانية.. ومعها برضو خليط الزبدة والجالاكسي اللي ذابو.. وروحي فكي باقي الثلاثة جالاكسي وبسكينة قطعيهم مربعات صغار مررره.. وكبيهم في الخليط.. واخلطي شوي بالملعقة الخشب.. وخلاص كذا الخلطة جاهزة.
3- ادهني صينية مربعة أو مستطيلة بزبدة مع طحين وكبي الخليط (بيكون مره متماسك الخليط مش سائل).
4- اخبزي على حرارة 270 فهرنهايت.. تقريبا من ثلث إلى نص ساعة حسب الفرن.. (حقنا مخرف!!) انتبهي لا يحترق.. يعني بعد مرور ربع ساعة شيكي عليه أحسن.. وشوفي إذا نخبز تمام أو لا..

وبعدين قطعيه مربعات أو حسب الرغبة.. وحطيه في القراطيس الملونة.. وادعي لي!!

حياكم الله اللي عندها أي أسئلة الغاليات !!