شحالكم وشخباركم
اتمنى الكل يكون بخير وسعيد ان شالله
واتمنى تكون سنة 2024 انقظت وانطوت ويارب تكون السنة اليديدة سنة خير وسعادة على الجميع
وتتحقق كل امانيكم اللهم امين
__________________________________________________ ____
طبعا تذكرون موضوعي (( الي صبغت فيه زاوية الصالة))
وكانت هازاوية بلون الاخضر ومرسومة بالبني والكرستال
وفي كل بيت او فيلا او شقة
في (( حمام التواليت )) عزكم الله
وهو حمام صغير مافيه غير مراية ومرحاض واكثر اللي يستخدمونه الضيوف
ونادرا ما نهتم فيه
واذا اهتمينا حطينا فوط ومزهرية ورد وكان الله غفورا رحيما
………………………………………….. …………………………………………..
انا من يومين بديت اعدل حمامي (( للعلم ان بيتي يديد))
ف من احصل وقت فراغ واكون مخلصة من مسؤولية عيالي ومذاكرتهم و و و و
اشتغل ساعتين وارتاح
وشغل اليوم ماخذا مني الا يومين وطبعا (( بمبلغ بسيط))
الحمام هذا موجود بمدخل ممر الصالة وتحديدا عند الجدار اللي رسمته
وانا كملت رسم الممر وبتشفونه واضح في الصورة بنفس طريقة رسم الجدار بس مقلم
وباب الحمام كان ابيض …. يعني ما يخص اللون في المكان
وطبعا سرت محل ايسدوير لانه عنده ماكينة خلط الالوان بالكمبيوتر
وشتريت ..
– صبغ زيتي لون البني الغامج ( العلبة للباب ب 70 درهم)
– لزق للحواف ( 5 دراهم )
– فرش لصبغ ( 20 درهم )
– ماكينة ضخ الصبغ الهوائي ( 250 درهم ) ومب لازم تشترينها
وبديت اول شي ……
الزق حواف الباب والقفل والزوايا المعدنية
وما ننسي نلزق الحواف من داخل بعد
بعدين حطيت الصبغ في الماكينة لاني مابا استخدم الفرشاة الا في ترميم الفراغات
ولانها اسرع وما تاخذ مني وقت.
وخلصت من صبغ الباب
شتريت هالكسسوارات وتنباع كل حبه بروحها في هوم سنتر واسعارهم وايد عادية من 30 الا 50 درهم
وشريت فوط صغيره للوجه ونسقتها بهاطريقة
وحطيت اشياء اساسية ممكن يحتاجونها الضيوف مثل
عطر. كريم مرطب لليدين . غسول للوجه.. اعواد قطن .كلينكس مرطب. معقم للفم .صابون سائل
لاحظوا ان فوط اليدين تكون مختلفه عن فوط الوجه
من حيث المكان والتنسيق والالوان .
واختياري طبعا للفوط الاحتياطية والوانها تكون بنفس الوان الحمام والصالة
بني واخضر وبيج
نضيف لوحات فنية تعطي للمكان طابع خاص وراحه لشخص اللي موجود في الحمام
ثريا لشموع شريتها من القرية الفلبينية ب 250 درهم لان وقت المسا الحمام كله يكون منور بالشموع
والاضائه ما نستخدمها الا لل …………(…………)
والثريا شريتلها نباتات بلاستيكية
وحطيتها بالوسط وعلقت فيها طرابيش
واخيرا كان التواليت بهاتنسيق
من المداوس اللي بنفس اللون الاخضر والبني وشريتها من ماكس 45 درهم
اتمنى شرحي وحمامي عيبكم
حاولت اخلي قياس الصور بحجم الوسط وما قدرت اسمحولي
ولا تنسون تدعولي بكل الخير لي ولبيتي وان تتحقق كل امنياتي وان ربي يستر علينا ويحسن خاتمتنا
اللهم امين .
على مروركم وكلامكم الطيب