بنات …
ريلي والحمدلله إنسان خلوق ما يعيبه شي
ومن فترة خطوبتنا إلين فترة ملجتنا كله يتشوق لي ومتى بنملج
ومتى بنقع مع بعض ….. وم هالكلام ……
من بعد الملجه أول أسبوعين
الأمور كلها تمام التمام
بس الحين
كل شي تغير !!!!!
صار ما يسأل عني
ولا يهتم فيني مثل الأول
وأنا اللي أحاول وأحاول إني أكون له الحبيبه قبل الزوجه
والأم قبل الأخت
وأغازله وأقول له الكلام الحلو
حتى لو زعلني في شي
ما أحط بخاطري وايد
أعاتبه شوي وأحسسه بالذنب
عقب أرجعله عادي وأحسن من الأول
من أسبوع …..
قلت له لازم أقول له كل اللي بخاطري
واشقد أنا أعشقه ( ما أحبه ) أعشششششقه
وتميت أترياه بعد ما قال لي أنه مشغول وعند ربعه
قلت له هب مشكله يا حبيبي من تخلص خبرني أنا أترياك
وتخيلو ساعتين وأنا أتريا
طرش لي مسج و قالي أنا برقد الحين تصبحين على خير !!!!!
قلت له ( ما تباني أسولف معاك ) !!!
طنشني !!
قلت له مو مشكله حبيبي شكلك تعبان باجر أرمسك
رد طرش لي ( باجر بكون مشغول بروح الشارجه ) !!!!
قلت له خلاص براحتك
وما حبيت أنفجر رغم أن قلبي كان بينفجررررر من الخاطر
وسويت روحي عادي بس يوم ييت أرقد ما عرفت
تميت لين أذان الفير
وأنا أتقلب أبا أرقد
إلين ما أذن الفير وصليت عقب رقدت
وهاك اليوم
طرشتله مسج الصبح ( علومك حبيبي ؟ عساك مرتاح ؟ )
طنشني
قلت الريال مشغول
و عقب رحت عند أخوي قلت له أبا أروح معاك الجمعيه
قالي خلاص أوكي
لبسي وأنا أترياج في السياره
رحت لبست وظهرت
ويوم كنا في دربنا
شفت سيارة ريلي >> استغربت قالي بروح الشارجه
قلت يمكن غير رايه ( انزين ليش ما رد علي ) وبعد طنشت
جان يوقف أخوي له وقاله هلا بوفلان >> هو يحب الناس يزقرونه بوفلان مب باسمه
فتح له الدريشه وشافني معاه
قال له أهلين وتموا يسولفون
وأنا تميت أتلعب في فوني ماعرف شسوي !!!
وسمعته يقول أنا بودي الأهل بيت فلان الحين وجي وجي إلين ما قاله أخوي توكل
عقب ما ردينا من الجمعيه
وصلت البيت
طرشت له مسج
خير إن شاء الله ( ما رحت الشارجه )
ما رد علي !!!
قلت مو مشكله ما بغثه أكثر
بس قلت له الله يخليك من تفضى أبي أرمسك
من زمان ما سولفت معاك وجي
بعد طنشني
ويوم يت حزة الرقاد
دقيت عليه
وفخاطري أقوله والله أحبك ليش جي تسوي فيني
رد علي وكنت أصيح بس هو ما سمعني
لأني زاخه روحي
قلت له ها حبيبي بترقد
قالي هيه
قلت له خاطرك في شي
قالي لأ أنتي ليش داقه تبين شي
!!!!!!
انصدمت
و طنشت
قلت له لا حبيبي أنا بس بغيت أخبرك
بأني أحبك
قالي خير خير إن شاء الله !!!
و طنشني وما رد علي بكلمه حلوه
قلت له خلاص بخليك ترقد تصبح على خير
قالي مع السلامه !!!!
قلت في خاطري شو اللي غيره علي
ليش ما يبا يرمسني
ليش قام يقصر بحقي
وأنا اللي أسويله المستحيل
أودي له هدايا و أسوي له مفاجآت
>>>>> الكل يتمناها
وهو ما يعبرني
ولو بكلمة شكر !!!!
حاولت أقوله حبيبي أنت زعلان مني شايف علي شي خبرني
قالي لا بس أنا كيفي أرد عليج وإلا لأ ( كيفي !!! )
بلاك شو فيك أنا عمري ما قصرت معاك بشي
قالي قلت لج كيفي ( أنا ريال وحر باللي أسويه )
قلت له أوكي بسألك وجاوبني
أنت تحبني !!!
قالي مش مجبور بعد إني أجاوبج !!!!!!!!
قلت له خلاص ع راحتك
مابي أغثك
تامرني على شي
قالي لأ
قلت له مع السلامه
وسكر بدون ما يقولي شي
الصراحه طفرررت
ما أعرف شسوي معاه
استنفذت كل الطرق
ما خليت شي
كيف أخليه يحس فيني وبحبي له
والله يا بنات
أصيح صياح الله العالم فيه
تعبت
وكل ما أصيح
أروح أصلي
عشان أرتاح وأنسي عمري
صار ما يعاملني مثل الأول
الحب تغير 180 درجه
شسوي معاه ؟
كيف أحسسه بأنه مقصر وهو هب عاطيني مجال بالأساس !!!
يا بنات والله أعشقه
أسوي كل شي عشانه
أرجوكم
ساعدوني
وأدعوا لي
شسوي 
والله أكتب لكم وأنا أصيح
والدمعه في عيني
ما عرف كيف أفهمكم باللي أنا فيه
بليز طلبتكم لا تردوني ساعدوني
ما تضلي ملاحقتيه
الله يوفقك ان شاء الله
نصيحه خذيها مني
خلج ثقيله شوي
لا تحسسينه انج ميته عليه .. لا تحسسينه انج ما تقدرين تصبرين عنه
انسيه شوي .. اذا ما اتصل لا تتصلين
اذا ما عبرج بمسج لا تطرشيله
لا تعيشين حياتج وتخلين ريلج محور حياتج .. لانج جيه بتتعبين واااايد وهذا اللي صاير فعلاً
هو شافج قاطه عمرج عليه .. والمفروض يقدر هالشي ويحسسج بحبه بس هو طنش
ما اقولج انه هو ما يحبج لا فديتج
بس في رياييل يحبون لحرمة الثقيلة .. في رياييل لو شافوا الحرمة ميته عليهم يحقرونها أكثر
وفي العكس
عسب جيه .. عيشي حياتج .. طلعي وضحكي وفرفشي
اذا بغيتي تطلعين مكان طر شيله مسج انه بتروح لمكان الفلاني مع امج او اختج او اخوج
ولا تنسين أكثري من الدعاء والصدقة والاستغفار
حبووبة انتي اشوي هدي من نااحيتج معاه,,
يعني اثقلي لاتعطييه واايد وية واثقلييي,,
وخلييه هو يشتااق ويحن اشوي..
وخلييلة عذر هلفترة يمكن مضغوط من الشغل ولا بييته ..
ربي يوفقج ويسخرة لج ويتمملج على خيير.
صلي قيام اخر الليل وادعي وادعي
وبنفس الوقت لا تقصري مع ريلج بأي شي اذا طلبج
لكن لا تسالي عنه وايد خفي اتصالات.. بس اا بتطلعين خذي شوره
وقوى علاقتج بالله
وعسى ربي يسخره لج ويجعله يركض وراج بعد.
بصراحة له حق .. مايعبرج
ثقلي شوي .. حافظي على كرامتج خليج واعية وعاقلة شوية ترا الريال مهما كااااااااااااااااااااااان
مايحب البنت الخفيفة .. والي تعبر عن مشاعرها بسهولة وان قالها احبج قالت له اموووووت فيك ..
صدقني تغيري وطنشيه ولا تعطينه ذاك الزود بالاهتمام وعقب بروحه بيقولج شو فيج وبيسال عنج وبيحاتيج
اما انج ما تعطينه فرصة يتنفس وتصيرين له نشبة .. بيكرهج مقدما وبيملج سلفا .. نصيحة
اهتمي بوقتج
نفسج
جمالج
دراستج لو تدرسين…
وربيعاتج
لا تحسسينه ان " هو " " كل شئ " في حياتج وهالشئ غلططططططططط كبيررررر والله
وربي يهديه يارب
بسألج انتي عاطتنه مجال يعبر عن حيه ؟
من كثر ماقلتيله انج تحبينه خلاص صار ضامن هالشي و صار مب لازم يحاول يكسب حبج واعجابج
عرفتي اختي الرياييل غير تفكيرهم عنا نحن الحريم
غيري اسلوبج خليج فرفشوشة ودلوعة
لا تركضين وراه بينيله انج عندج ربيعات و هوايات واهتمامات
مشكلتنا نحن عاطفيات ونبا كل شي ع طريقتنا
و هالشي صدقيني ماينفع وخاصة الاسلوب المباشر فالكلام انته ماتتهتم يني انته مشغول عني انا ابى وابا ..الخ كلها ماتنفع
غيري اسلوبج عشان نفسج اولا .. وبالتوفيج 