دخل الشتا و أكيد كل وحده منكم جهزت الكبت للثياب اليديده
بس شو جهزتو حق بشرتكم؟؟؟؟؟؟؟؟؟؟؟
أكيد……في الشتا لازم نجدد مستحضراتنا التجميليه عشان تناسب تكيف بشرتنا مع الجو
الملف هذا بيكون حق هالشتويه من عنايه
طبعا الملف ما بيحلى الا بوجودكم ومشاركاتكم …كل شي اشتريتوه حق الشتا ..كل شي جربتوه…كل شي حابين تسئلون عنه..
عليكم بالكيبورد وراوونا شو تسون وشو اللي نفعكم صدق بدون مبالغه سلبيه أو أيجابيه
أنا ببدا قبلكم
البرتقال …طبعا فيتامين C في وجه أمراض الشتا من زكام وانفلونزا …وبنفس الوقت منور الوجوه الحلوه ومنقيها ومصفيها
خلي روتينج اليومي يحتوي على حبتين برتقال أو كيوي أو فلفل بارد أخضر ….منها تخلين جسمج صحي بمقاومته للأمراض ومنها تغذين بشرتج بجرعه كبيره منه عشان يصفيه ويوحد لونه
جربي منتجات بودي شوب من فيتامين C خفيفه ع البشره و هذا وقتها
شاي الأعشاب ..ممتاز بالشتا ممكن شاي الزعتر يدفي الصدر ويفتح قنوات التنفس أو شاي القرفه يساعدج على التخلص من ألام الدوره بسرعه أو الشاي الاخضر ويا عصير الليمون هذا روعه لأنه يحارب التأكسد ويهدي الاعصاب ويخلص الجسم من السموم
غسولي المفضل من دكتور برانت حلو خصوصا للبشره الحساسه ويناسب كل أنواع البشره (أول مره أصدق ان في شي يناسب كل أنواع البشره ) أنا بشرتي مختلطه مايله ع الجافه وبنفس الوقت حساسه أغسلها مرتين بهالجل فعلا ينظفها ويتركها مخمليه
وريحته برتقال لأنه يحتوي على فيتامين سي ………..جربته بالصيف واشوف انه ممتاز بعد للشتا وباستمر عليه
سكراب من ميشا …هالسكراب حلو للبشره الحساسه والجافه والعاديه والمتقدمه في العمر
من خصائصه أنه يقشر البشره بلطف ويشدها ويقاوم التجاعيد ويتركها رطبه ونديه …يحتوي على مادة Q10 واستخدمه مرتين في الاسبوع
سكراب ثاني من ميشا بالشوكولاته ينفع للبشره الدهنيه ومكوناته الرئيسيه هي الكاكاو والسكر وايد وايد حلو ينظف البشره من الخاطر
حاليا موجود في محلات ميشا بالدوله
هذا مقشر للشفايف من LUSH هالماركه خبال وهالمنتج نزل أظني ربيع 2024
للوجه ما أستغني عن ماسكات بيزلين بالعسل والشمع وممكن بروحي أسوي ماسك العسل والليمون أو ماسكات شانيل للبشره أو ماسكات ميشا أو ماسكات THE FACE SHOP …..اللي ترتاحون له المهم يكون ماسك مرطب عشان يقاوم الجفاف من البرد …ابتعدوا عن الروب بالشتا لأنه يجفف البشره ويقشرها
ماسكات العيون ما استغني عنها أبدا بعد مرتين بالاسبوع واذا حسيت بشرتي محتاجه أكثر أستخدم زيت ارغان بالليل
جربو اللي بالصوره هذا متوفر في ميشا وبعد جربو ماركة شيسيدو وشانيل
ويوم تكون عندي شوية حبوب ما أحط عليها ماسك مرطب أبدا لأنه بيزيد الحاله بس أخذ شوية ماسك زيت شجرة الشاي من بودي شوب واحط عليها ويوم اغسل ويهي أرطب مكان الحبوب وامسح الماسك عنها بخفه عشان الحبوب ما تنكشط
أنا حاولت كثر ما أقدر أحط لكم الأشيا اللي أستعملها وتكون متوفره في كل مكان وسعرها معقول
طبعا في أشيا ثانيه بعد استعملها بس بترك لكم المجال تكملونها وانا تعبت من تحميل الصور كل المراكز بطيئه وايد من الصبح والحين المغرب وانشالله الكل يستفيد
UP
تسلمين يا قلبي