انا ترددت وايد في كتابة الموضوع بس بعد ماتأزمت الامور قلت بكتبه وانا ابري نفسي من ذنب اي وحده بتسب البنت اللي بتكلم مافينا ع حمل ذنوب واتمنى من المشرفه ماتغلق الموضوع انا احتاجه واحتاج للردود والشور من خواتي
السالفه طويله ف بكتب جزء جزء :
انا مشاركه في مدونة ثاني ، واكتب فيه مذكراتي وبعد وفاة زوجي السابق الله يرحمه تعرفت على وحده من بنات ذاك المدونة وكانت جدا لطيفه وياي ، حتى في يوم زواجي من اخو ريلي حضرت العزيمه فبيتنا
كانت مقنعتني انها متزوجه وريلها مايباها تييب عيال عشان يلحقون يستمتعون بحياتهم.
واستمرت علاقتي فيها مده طويله من يوم مامات زوجي يعني سنه بتكمل علاقتنا ، وكلها زيارات
وحتى يوم كننا نتشرا حق العيد اللي طاف شفتها في مركز مدينة زايد يت سلمت عليه وجي وريلي سيده اتجه صوب ريلها وسلم عليه لانه ريلي من النوع اللي يحترم الناس .
ومره ريلي لقى الريال هذا في حلاق في بوظبي وعرف انه نفس الشخص اللي كان مع ربيعتي فالمول و سلم عليه طبعا ع اساس انه ريل اربيعتي وحتى يومها قالي ريلي : ياساره الريال يوم اسلم عليه يختبص ويرتبك شوه السالفه مب على عادة الرياييل الباقين قلت لريلي : استهدا بالله يمكن خجول واقتنع .
المهم انقطعت اخبار هالصديقه وتلفونها فتره يعطيني مغلق وهذا الكلام قبل اسبوعين ف اتصلت وكله مغلق ، وخبرت ريلي اني بزورها يمكن فيها شي طبعا كان مداوم قالي اوكي سيري بس انا شايف تحت بيتها مكتبه اسلاميه خذيلي مصحف صغير حق الدوام اقرا فيه قلت له ان شاء الله
ف الصبح طلعت عيالي منصور واخوه للمدرسه وخذت فطامي وسرت لها اول ماسرت مريت المكتبه خذت مصحف لريلي ع السريع وما خذت كيس شلت المصحف في يدي وزخيت فطامي وسرت ابا الحق اشوفها هالحرمه كان قلبي قارصني عليها وعقب صعدت للبنايه تميت ادق جرس شقتها ساعه ومحد يرد عليه ولا حد يفتح لي
نزلت وشفت الناطور تحت والناطور مصري وطيب وايد كعادة المصريين وخدوم لابعد الحدود ، سألته عنها قلت له الناس اللي في الشقه رقم كذا وين شي فيهم او شي ؟
قالي : البنت صديقها كان ساحبنها مثل الجلب ومصفعنها وطاردنها من الشقه وانا شفته يضربها ف حاولت امسكه عنها قالي : انت مالك خص ف سبته في حاله يقول
يوم قالي جيه انا انصدمت وجن حد صب عليه ماي بارد قلت له : صديقها؟؟
قالي : ايوه عايشه وياه
قلت له دخيل والديك اتأكد انا اقصد فلانه هالبنت المواطنه؟
قالي : مش مواطنه واسمها عطاني ياه غير عن الاسم اللي قايلتنه لي و قالي جنسيتها عربيه وقال بس الريال مواطن ربيعها اللي عايشه وياه وهو متزوج واهله في اماره غير ويداوم ف ماخذ هالشقه هنيه فبوظبي يقول الريال اعرفه عشان جي ماطلبت له الشرطه يوم يضرب البنت بس نازعته عقب ما فرها فالشارع
قلت له خلاص ماعليه وتميت انتفض
فقال : شكلج ماتعرفين عنها شي
قلت له عرفتها من قريب وقالت لي متزوجه انا ماعرف انه هالشقه جي سالفتها وهالمصحف اللي في يدي اني ماعرفها زين
قال انا قلت بعد لانج متغطيه وشكلج خايفه الله ف استغربت يوم اشوفج طالعه نازله من عندها
المهم ركبت سيارتي وسرت البيت
فالبيت اتصلت لربيعتي وربيعتي هاي من احب الناس لي واعرفها من قبل المدونة وبعد هي ويانا فالمدونة و مره طلبت منها انها اتيي وياي (بيت العضووه) هذي ورفضت لانه ريلها مانعنها ومحذرنها من التعارف من المدونة ف احترمت رغبتها حتى مسكينه قالت لي ساره احذري من المدونة وزين انها مايت وياي ذاك اليوم ولا كنت سببت لها مشاكل مع ريلها هي بعد
المهم قلتلها كل الحكايه قالت ياساره انا محذرتنج شوه قلت لج؟
ونصحتني اني اصارح ريلي وليتني ماصارحته
للحديث بقيه ..
متشوقـة آعرف شو صـآآآر ..؟!
الله يحفظج من كل شر ..