@@الطريقة الصحيحة لتخفيف الوزن.. برنامجي الخاص@@

بعد ما مشيت على النظام اليديد مالي و لمدة شهر.. هاذي النتايج:
الوزن: 84كيلو
الدهون: نسبة 40% من جسمي (يعني نزلت من شحومي 5.5كيلو !!)
الماي ما تغير لأنه طبيعي
العضل زاد شوي بس

هذا شو معناته؟؟ معناه ان النظام اللي قاعدة اسويه 100% صح و قاعدة أنزل وزني بطريقة صحية و سليمة بدليل انه معظم اللي نزل مني هو الشحم بس .. لا هو ماي و لا عضل!!

تف تف .. قولوا
انزييييييييين الحين بتقولون لي كيف؟
الحين بشرح لكم بالتفصيل الممل برنامجي اللي قاعدة اتبعه من شهر.. و صدقوني لو مشيتو عليه… بتنزلون مثلي اذا مب أكثر..

يالله نقول بسم الله

الأكل
ما حبيت ألف و ادور و لا أعور راسي باختيار الأكل.. قمت سويت اشتراك مع وحدة من شركات أكل الرجيم اييبون لي وجبات كل يوم لين البيت..
أقوم الصبح.. أتريق
بعد الريوق بساعة افرك على جسمي كريم يحرق الدهون و بعدين اتلبس و أقوم ألعب رياضة لمدة ساعة أو أكثر
بعد الرياضة اتسبح و أفرك جسمي بكريم يشد الجسم .. بعدين آكل فاكهة
وقت الظهر أتغدا.. و أريح شوي
العصر آكل شي سويت (الشركة تطرش لي)
المغرب.. اذا يعت شوي آكل لي فاكهة و اشرب أي نوع من الشاي
فالليل.. أتعشا… و خلاص
اذا حسيت بوااايد يوع.. أشرب حليب قليل الدسم أو روب أو لبن..
واذا كنت سهرانه شوي.. و بعدني حسيت بيوع.. اعلج لبان أو أشرب شاي أعشاب

الرياضة
يوميا بعد الريوق بساعة
1- أبتدي بالتسخين .. 10دقايق على المشاية
2- بعدين اسوي شوية stretching
3- بعده ابتدي رياضة اليوم (أما كلها Cardio أو Cardio/Strength )

يوم اسوي الCardio :
30 دقيقة على هالمكينة

45 دقيقة على المشاية

يوم اسوي الCardio/Strength :
15 دقيقة اسوي شوية ايروبكس عشان ترتفع نبضات القلب
15 دقيقة رياضة حق عضلات الايد و الكتوف
15 دقيقة رياضة حق عضلات الخصر و البطن
20 دقيقة رياضة حق الارداف و المؤخرة و الريول
5 دقايق رياضة حق عضلات الظهر

4- بعد ما أخلص اسوي بعض حركات اليوغا مع التنفس عشان Cool Down

معلومات مهمة
تنظيم النوم
تنظيم وقت الأكل
تلتزمين بالرياضة على الأقل ساعة في اليوم 5 مرات في الاسبوع
توزنين مرة في الاسبوع بنفس الوقت و اللبس
عدم الأحباط اذا ما نزل الوزن خلال الاسبوع.. اصبري ترا بينزل في الاسبوع اللي عقب.. مرات الجسم يخزن ماي
شرب 2 ليتر ماي
شرب الكثير من شاي الأعشاب (بابونج.. شاي أخضر..فرفين..زنجبيل.. نعناع)
اذا سرتي بيت حد شلي اكلج وياج عشان ما تخبصين