الشيطان يلعب بعقلي .. ساعدوني رعاية الاطفال

خواتي الغاليات بدش في الموضوع على طول لان ضايق صدري و بحس اني بنفجر … خواتي استوى موقف قبل ساعات بيني و بين ريلي السالفه ان المغرب ريلي سار عند ربعه و بعد شوي دقت علي اختي و قالتلي بتيي تزورني في البيت و طبعا طرشت رساله لريلي و قلتله ان اختي بتزورني و انا جي متعوده من زمان المهم يات اختي و يلسنا و استانسنا و الله خواتي يات الساعه 9 الا ربع و سارت الساعه 10 و ربع و عقبها طرشت رساله لريلي ان اختي روحت لان يستحي يقعد في البيت و حد من خواتي عندي و شوي وصل ريلي و دش البيت و ويهه متغير حتى ما قال السلام عليكم و انا استغربت وما سألته قلت يمكن متضايج من حد من ربعه و شوي قالي و الله لو تأخرت اختج نص ساعه عندج زياده كنت سرت عند حد من الربع و رقدت عنده و انا مصدومه و ما تكلمت و شوي قمت اصيح لان هالموقف اول مره يستوي وياي من لما تزوجت و عمره ما اشتكى من حد من اهلي و شوي يا عندي و قالي انا كنت برد البيت مبجر و اختج طولت القعده و ….. الخ وقالي انتو من امس كنتوا ويا بعض في السوق وانا احب ارد البيت مبجر و ارقد من وقت و من هالكلام و قالي لو رمستي ما تعيبج اما اني اسير ارقد عند ربيعي او لو انتي ما تستغنين عن اختج سيري و خذي ولدج و سيري بيتها ومره ثانيه لو اختج بتيي عندج قوليلي اذا اسمحلج او لا و عاد انا هني ما قدرت اصدق ان اللي يالس يتكلم ريلي و هو يعرف ان اختي هذا بالتحديد اقرب وحده من خواتي لقلبي و يعرف علاقتي فيها قبل لا اعرس و هي واااايد حنونه وريلي عمره ما اشتكى منها … والله و الله و الله انها طيوبه و حنونه و ريلي يعرف هالشي و انا ما اشوفها الا في الويك اند لانها تداوم و عندها 5 عيال … متضايقه و تعبانه و مصدومه و اول مره ريلي يرمسني جي و الله خواتي ان فكرة الطلاق يات في بالي و مب قادره حتى ارقد ويالسه اصيح و تعبانه و ابدا ما حبيت ان ريلي يخيرني بينه و بين حد من اهلي … شوروا علي خواتي شسوي

حبيبتي مب من كل شي يبتي سالفة الطلاق
هذا أنا اعتبره مجرد سوء تفاهم
قبل لا تحكمين على ريلج وقبل لا تتحسسين من طبعه اللي على قولتج إن أول مرة
حطي مبررآت
شو السبب اللي خلاه يقول هالشي ؟؟
يمكن متضايج أو طبيعة الريال ما يحب يتأخر عن البيت

وقوليله حتى لو إختج بيوم من الأيام زارتج وطولت عندكم
يدخل البيت ويرقد في الغرفة
هذا في حال لو كان بيتج روحج فأكيد بتيلسون بالصالة أو غرفة الضيوف

أو يروح بيت أهله ييلس عندهم لما تخلصون سوالفكم

فيه ريآييل بيتوتيين مآ يحبون يظهرون من البيت
ولو حد في بيتهم ومآ يقدرون يدخلون فتحسين إنهم يتبهدلون ومآ يعرفون وين يروحون

بس لا تتحسسين من هالموضوع
لازم هناك انطباعات سواء منج أو منه متغآيرة
مب كل شي بيكون طبق الأصل ^^

ولا تكبرين الموضضوع
حاولي تتناقشين وياه بهالموضوع بكل هدوء وشوفي شو هو سبب ضيقته

من موضوعج
إن إختج مالها شغل بالموضوع
يعني السالفة سالفة الزيارة المتأخرة
مع انا أو انتي ما انشوفها إنها متأخرة وانهآ زيارة طبيعية
بس غيرنآ لأ يشوفهآ متأخرة

وربي يسخرج لريلج ويسخر ريلج لج ^^

بصراحة مالو حق ايا كان السبب..صعب لو حتى انها اختك انك تخبريها او تحدديلها موعد زيارةوبعدين ليش كل هالحساسية ما بيدخل وهي موجودة ليش يعني ما فهمت والله؟؟شغلة تانية..انتي غلطتي عودتيه هالعادة تخبريه عطول انو اختك مجودة يعني هي تعتبر من اهل البيت..انتي بها الحالة بنيتي حاجز كبير من غير ما تحسي..عموما هوي الغلطان مهما كان مو لازم يتكلم على اختك بها الاسلوب..يا ترى لو الوضع بالعكس بيقبل تحاكيه بنفس الاسلوب؟؟عموما اختى هالموضوع مو مستاهل تحكي بطلاق يعني مشكلة بنواجهها بحياتنا عادي كتير بس المفروض عليكي تفهميه حدود معينة من ناحية اهلك ..موفقة

والله اختي من الضيجه اللي فيني يبت سالفة الطلاق لانه هو اكثر واحد يعرف علاقتي بأختي من ايام الملجه والحين مر على زواجنا 3 سنين و هاذي اول مره يقول هالرمسه و كان جاد في كل كلمه قالها وهو عادي يسير عند ربعه و احيانا يسير المكتب ماله ( عنده شغل خاص ومكتب ) حتى يوم الجمعه و انا ما اقوله شي و اخليه على راحته لكن انا من قبل ما اختي تيي عندي طرشتله مسج و لو كان هو تعبان و بيرد البيت جان قالي و انا اعتذرت لاختي بأي طريقه بس جي يخيرنه بينه و بين اختي ..!!!!! و هو يعرف ان اهلي عزوتي وكل ما املك في الدنيا و دوم يستانس من هالكلام و يقولي معاج حق و اللي ماله خير في اهله ماله خير في الناس … و انا عندي بيت بروحي بس شوي صغير و دوم اقوله عادي لما تكون اختي عندي رد البيت و ايلس بحجرة النوم او ارقد و ما حد بيزعجك بس هو طبعه يستحي و انا تاركتنه على راحته حتى من امي يستحي و اهله بعيدين عنا يعني مو نفس المنطقه … والله يا اختي ان خواني كلهم يعرفون طبعه و انه بيتوتي و لو بنسير بيت اي حد من خواني يقولي في السياره ان بنيلس بس ساعه و عقب بنرد البيت و انا اتضايج لاني اكون ولهانه على خواني و عيالهم و حتى اخواني من يزوروني يعرفون طبعه و ما يتأخرون في الزياره و ما استانس وياهم واحس اني معزوله عنهم ودوم اسمع انهم مجتمعين في بيت اخوي العود و سوالف و سهر و وناسه الا انا يالسه في البيت بروحي … تعبت اختي و موقف اليوم زادني تعب و ارهاق وقلت هذا اللي ناقص بعد يحرمني من اختي مع انه زوجي ريال و النعم فيه محترمني و ما شفت منه شي يزعل ابدا لكن ليش جي اليوم تغير و تميت اطالعه و انا مصدومه حتى كلام ما قدرت اتكلم

مستحيل اختي اني احدد زيارة اختي لبيتي او يكون بينا مواعيد للزياره و هو طبعه خجول و هالشي مضايقني وايد ومستحيل يرد البيت و اختي موجوده بدون ريلها مع انها احيانا يكونون عيالها وياها و ولدها العود عمره 15 سنه يعني ريال و بعد يرفض ..!!! والله اختي انا ابدا ما اتكلم عند حد من خواته او اهله و اعاملهم احسن معامله و كأنهم اهلي و عنده اخت وحده اصغر عنه و هي الحين حامل بأول ياهل و كلمتني من يومين و طلبت شوية اغراض حق الياهل لانها ما تقدر تظهر لانه الحركه مب زينه عشانها و انا بعد حامل بتوأم و في الثامن و الدكتوره حذرتني من الولاده المبكره و مع هذا قلت لها حاضر و من عيوني لانها احبها و اعزها مثل اختي و كنت بطري هالسالفه اليوم جدام ريلي و سكتت وقلت ما بكبر السالفه وبسكت بس والله احس اني بنفجر و يات سالفة الطلاق في بالي او حتى عالاقل نبتعد شوي عن بعضنا

هو غلطان بتصرفه

بس مرات متضايق من شي تاني و فش غله فيك

او ممكن متضايق من اصحابه

اكيد في سبب

فوتيله يومين تلاته و حاوريه بهدوء

الله المستعان