الدوره متلخبطه عندي،، هل هذا يأثر عالحمل ؟! لصحة الجسم

ومثل مايقولون .. الموضوع باين من عنوانه ..
بنات انا بملج اذا الله راد بنص السنه ..والعرس ان شاء الله اذا الله أحيانا بيكون بعدين في الشهور اليايه .. بس اللي موترني هي (( الدوره )) ..الحمدلله على كل حال

الدوره عندي متلخبطه فوق ماتتصورون .. يعني احياناً يمر شهر وماتييني واحياناً اتيي بكل شهر ولو انها تتأخر يوم او تتجدم ..احياناً بعد تكون طبيعية وتستمر معاي لمدة 7 ايام .. لكن في اشهر تطول لدرجه توصل لمدة 20 يوم ..

رحت راجعت عند دكتوره عامه وسوتلي فحص كامل .. ومابين من الفحص شي .. يعني الحمدلله الغدة و الهرمونات قالت لي عنهم اوكي .. فقالت لي بحولج على طبيبة نساء لان يمكن يكون شي مب من اللي طالع عندي .. المهم قمت اراجع الدكتوره الثانيه قالت لي مافيج شي ولله الحمد .. بس قالت يمكن لانه وزنج زايد شوي..المهم بالفعل قمت امارس الرياضه ونزلت من وزني وايد .. وردت الدوره طبيعيه وكانت كل شهر اتييني ولمدة 7 ايام .. وموعدي الثاني وياها .. قلت لها هالكلام .. بس قالت لي بعطيج موعد حق السونار يتأكدون من المبايض .. اهني صدق خفت ..بس قالت لي لاتخافين الحمدلله مافيج شي بس هي حابه تتطمن اكثر .. المهم كنت متحمسه بس للأسف عطوني موعد مول ماكان مناسب .. الصبح .. وانا الصبح اروح الجامعه وماعندي وقت .. وكانت فترة امتحانات .. المهم مارحت وضاعت علي الفرصه ..
ومن ذاك اليوم وانا تاركه العلاج .. بس ردت الدوره تتلخبط عندي مره ثانيه .. ونفس المشكله ومن كم يوم قريت مره ان تكيس المبايض يسبب هالاعراض .. وخفت يكون فيا هالمرض ..عافانا الله وخفت اكثر يوم تذكرت كلام الدكتوره والموعد اللي عطتني اياه حق تصوير المبايض ..

فهل هذا يابنات يأثر على الحمل في المستقبل ؟! يعني لخبطة الدوره وجيه .. وانا عارفه انه ارادت رب العالمين فوق كل شي .. وهو اللي يرزق الانسان ويعطيه ..والنعم بالله ..

بس بنات بليز اللي عندها تجربه من هالنوع .. وما أثرت عليها .. تفيدني الله يجزيها الجنه .. واللي بعد عندها تجربه واثرت فيها تفيدنا .. واي وحده عندها خبره بهالموضوع ماتبخل علينا .. وبشو تنصحوني يابنات .. ؟! لاني متأكده مب بس انا اللي عندي هالمشكله .. اكيد في وايد بنات عندهم نفس المشكله وحابين يستفيدون ..

دمتم بود ..

واذا متينه ضعفي لانه ها الشي يأثر …

بس تراني مو متينه وايد خخخخخخ احبطتيني الصراحه .. وزني في السبعينات .. يعني زوينه .. مربربه على قولتهم..

مشكوره الغاليه وماقصرتي .. الله يجزيج خير

السموحه منكن

مودتي