الحمدلله على تمام النعمه و اكتمال المنه .. لسلامتك

شحالكن كروشات

الحمدلله الذي تتم بفضله الصالحات ..
و الحمدلله واهب الذرية من البنين و البنات ..
و الحمدلله على تمام النعمه و اكتمال المنه ..
و لله الحمد من قبل و من بعد ..

الحمدلله رزقني الله بمولودتي ( حور )
ربي يجعلها من الذرية الصالحه و يحفظها لي و لوالدها ..

———————

الحمدلله رغم ان ولادتي كانت صعبه شوي

بس الحمدلله كل شي يهون من تعب و الم بمجرد ما تشوفين الضنا

يوم الاثنين بتاريخ 3 6 2024

كنت في العيدة مراجعه و قالت لي الدكتوره راس النونو في الحوض
و نصحتني بالمشي كل يوم لمدة ساعه و ان شاءالله بمرور اسبوع بكون مربية رغم ان موعد ولادتي 3 7 2024
استغربت من كلامها
و كنت خيفانه امشي لان كان عندي تسليم تقرير مع عرضه يوم الثلاثا تاريخ 11 6
يمكن مشيت يوم الاربعا ساعه لكن مش متواصله
و يوم الجمعه مشيت على البحر
و عقبها ما مشيت ابدا لاني انشغلت بالتقرير
و بعد ما سلمت التقرير ارتحت
فا مشيت يوم الثلاثا تقريبا 25 دقيقه
اما الاربعا ما مشيت
و الخميس تاريخ 13 6 كان عندي موعد تخطيط لقلب النونو في مستشفى لطيفه
التخطيط كان اوكي و كل شي تمام
و بعدها سويت تصوير
فا كنت اخبر الدكتوره عن الدكتوره اللي قالت لي امشي و جي
فا قالت لي و انتي كملتي اسبوع و ما ربيتي معناته كلامها مش منطقي و من هالقبيل
فا قلت لها بس انا اوردي من بداية التاسع ينزل عندي عزكم الله دم بلون البني على فترات متقاطعه
قالت لي عادي و طبيعي
و قالت لي موعدج مع الدكتوره بتاريخ 27 6 تعالي مب تقولين جريب موعد ولادتي ما اتيين

المهم

طلعت من عندها و احس بنفسي متشككه بالموضوع

اقول حق ريلي يمكن هم يعرفون شي او يكون باين في السونار و ما تبا تخبرني
فا قرر ريلي هاك اليوم امشي على البحر لمدة ساعه
و عقب المشي شرب عصير اناناس فرش
و كان الوضع اوكي هاك اليوم رغم اليوم اللي قبله كنت اتويع و مب رايمه ارقد
صبحت يوم الجمعه مافيني شي
لين العصر
بديت احس بآلام خفيفه مع تعب في جسمي كله
و الساعه 1 و نص فليل
ياني مقص فصيع اعلى السره في البطن
و استمر ساعه بدون توقف
قلت ماشي الا اسير المستشفى
سرت مستشفى صقر و على طول ودوني غرفة الفحص
و يوم كشفت عليه الدكتوره قالت لي انتي ولاده عندج 3 سانتي
على طول وقعت ورقه و طلعت من المستشفى الساعه 4 تقريبا و خبرت ريلي
و الساعه 5 طلعت من البيت متوجهه لمستشفى لطيفه
وصلت هناك الساعه 6 و اكشفوا عليه و كان 3 سانتي
و طبعا الالم يروح و يرد
خلصت التخطيط و قالوا لي امشي لمدة ساعة تقريبا و شربت جاي بالزعفران
و الساعه 8 ونص اكشفوا مره ثانيه و كان شرات العدد 3 سانتي
حولوني لعنبر الحوامل
و قالوا استمري بالمشي
طبعا اصبحنا يوم السبت و انا من وعيت الجمعه ما رقدت
فا حاولت اريح شوي بس ما كنت قادره من الالم و العوار
العصر كشفوا عليه وصلت 4 سانتي مع مساعده و شوية مساج
و قالوا استمري في المشي
و هلكت و انا امشي
و كل ما احس بآلام اقولهم تعالوا جيكوا كم وصلت
يقولون مب زين بس يحطولي التخطيط لانه هو يبين تقلصات الرحم
طبعا آخر الليل نقلوني غرفه خاصه لاني ابدا ما اقدر اتم في العنبر
صبحت يوم الاحد بنفس الآلام و العوار و الويع
و استمريت على المشي طول اليوم
العصر كشفوا عليه و كنت واصله 4 سانتي
ياني احباط و قررت اطلع من المستشفى على مسؤوليتي
لاني وايد تعبت العوار من جهة و المشي و آخر شي النفس مفتوحه بشرات السانتي لمدة 24 ساعه
الدكتوره اصرت اني اتم في المستشفى تحت المراقبه
و قالت لي بمجرد اوصل 5 سانتي بتحولني على غرفة الولاده
و انصحتني امشي و ما اصر على الخروج
لان ابدا مش في مصلحتي ولا مصلحة النونو
و قالت ممكن اوصل للسياره و ينجب الماي و بما ان حجم البيبي صغير ممكن ينزل على طول
حاولت تقنعني و اخيرا اقتنعت
و تميت في المستشفى مع المشي المستمر و كنت اصعد الدري و انزل
هذي الليلة ( يوم الاحد ) ما قدرت انام عدل من الالم و العوار اللي بدا يزيد عندي
و صبحت الاثنين مع وجود مأشرات للقلصات في الرحم من جهاز التخطيط
و استمريت في المشي
و حزة العصر كنت امشي
حسيت ان في شي ينزل ما توقعت يكون دم لان من الجمعه كان ينزل مني دم
لكن حسيت ان هالشي اكثر
رحت الغرفه ع طول و خبرت النيرسات و طلع ان الماي انجب عندي
و يت الدكتوره تكشف عليه و كان السانتيات هي نفسها 4
بدا العوار يزيد و يزيد
حولوني مباشرة لغرفة الولاده
و انا في حالة من العوار ما غير اير النفس على فوق لاني خلاص بديت اسوي بوش و يهزبوني الممرضات
كنت اقولهم ابا ابرة الظهر ريللي رفض نهائيا و خالتيه نصحتني ما اخذها لان في حرمه كانت تخبرها عن معاناتها من الابره
توكلت على الله
و تميت استغفر و اردد لا اله الا انت سبحانك اني كنت من الظالمين
و العوار كل ما ياه يشتد و يزيد
و انا اخذ غفله و انتبه لاني تعبانه مب راقده طول الليل
ويا وقت لعشا كشفت القابله و كنت واصله 9 و نص
عطتني مجال اسوي بوش بس قالت بعدج شوي
و كان الوقت يطوف شوي شوي و انا اتويع و اتألم
و كثر ما اقدر اخذ نفس على فوق
و بعدها قالت لي يلا الحين ابدي بوش
هني ما اذكر شي غير اني كنت اتشهد و ادعي
و اسمع القابلات يشجعوني و ريلي يشجعني و رافع ظهري لان هالشي سهل عليه الدفع
و الحمدلله الساعه 9:55 بتاريخ 17 6 2024 سمعت صوت صياح بنتي حبيبتي
و فعلا جنه حلم و طاف و نسيت التعب و الالم كله
و ضميتها لصدري و طبعا خلوني ارضعها
و عقبها بساعه يت الدكتوره عسب الخياطه و كان السكر نازل عند النونو فا رضعتها مره ثانيه
و قبل لا اروح الغرفه حسيت بحراره
و كانت حرارتي مرتفعه فا عطوني بندول و خلوني ساعه زياده لحد ما تأكدوا ان كل شي تمام
و الحمدلله عدت الولاده على خير
رخصوني من المستشفى يوم الاربعا
طبعا بنتي وايد صغيره شرات ما قالوا لي قبل
وزنها وقت الولاده 2.500 و يوم رخصوني 2.48 تقريبا
و حجمها صغير مقارنة باللي في عمرها
و قالوا لي لازم اسوي لها تحليل الصفرا يوم السبت
بس انا قلت بروح الاحد يوم بسويلها تحليل الدم اللي ياخذونه من الريل ..

—-

المركز الصحي ما عندهم تحليل للاطفال غير ابرة الريل
فا ضطريت اوديها مستشفى صقر المختبر عسب تحليل الصفرا
و اصروا عليه افتح ملف و ادخلها عند الدكتوره لانهم ما يقبلون اوراق مختبرات المراكز
و بعد ها كله سويت لها التحليل و انتظرت النتيجه
و لما استلمت النتيجه وديتها للدكتوره و كانت الصدمه
ان لازم ادخل انا و حور المستشفى للتنويم
لان نسبة الصفرا عاليه في جسمها
و لازم يعرضونها لجهاز الاشعة لمدة 12 ساعه
طبعا توكلت على الله و تميت وياها من يوم الاحد لين الاثنين الصبح
و خلصت الساعات ثجيله على قلبي و انا اشوف بنوتي في هالجهاز و مفصخه و تصيح كل شوي
من غير الابر و الجلكوز
و عقب انتهاء الساعات الـ 12 قالوا لازم اتريا 4 ساعات و يعيدون التحليل

و الحمدلله العصر طلعت النتيجه بالايجابية و رخصوني من المستشفى
بس نصحوني بكثرة الرضاعه الطبيعيه و تعريض النونو لاشعة الشمس
و خصوصا ان وزنها اقل عن 2.5 فا تكون معرضه للصفرا وايد