الحل وياريلي واسم البيبي؟؟ لسلامتك

السلام عليكم شحالكم بنات؟ بقولكم مشكلتي أنا عندي بنت وريلي سماها على امه وانا ماعندي مشكلة بس بالبيبي الثاني شفته قام يتحكم وقال بسمي على ابويه وانا عصبت ان ماعندي راي والكل يسمي اسامي حلوه ومب متكررة أنا ماعندي مشكلة بس الاسم متكرر وايد فالعايله وانا لي حق اتعب عليه واخر شيء هو يسمي براحته؟عطوني الحل كيف اقنعه ان اسمي مب هالبيبي اللي عقب على ابوه ابا اغير ياناس والله طفرت ؟! علما ان فبطني يمكن ولد فعشان جذي هو مرتبش : (

نفس الحاله اسامي عيالي لازم على اسم احد من اهل زوجي هالمره انا بختار كل ما اختار اسم يقول موحلو الله كريم

اختي اللي اعرف انه في حكم السنه انه من حق الاب تسمية الابن

بالسياسة والدلع والحركات لاتاروينة انة عنة مشكلة الريال مايحب الحرمة الي اتراوية انة تبغي تتحكم فية حياتهم كل شي عادي وشوي شوي وفي الاوقات الي اتحسينة رايق حاولي تقنعينة بدلع بالاسم الي تبغينة

أنا ريلي سما ولدي وما كنت معترضه عالاسم لانه حلو وهو يلقبونه بهالاسم وبنتي طول فترة الحمل يقول بسمي جيه وحتى نشر الاسم وولدي صار ينادي عليه بعد هههههههه بس انا مره قلت له الاسم مب ذاك الزود انا فخاطري جيه قالي لا هاك احلى فسكتت ويوم ربيت سبحان الله هو بروحه قال لي الاسم اللي قلتي لي احلى من ها اللي كان فخاطره ههههههههه شكله مل من الاسم خخخخخ وسميت بنتي بالاسم اللي خاطري فيه وحتى الكل تفاجا بالاسم وفالثالث هو في باله اسم وعايبه فالبنيه والصبي لاني ما اعرف جنسه للحين بس انا ما فكرت فاسماء فعادي عندي يسمي اللي فخاطره لاني اعرف ذوقه حلو ،،
حاولي انج تقنعينه انه هالاسم اللي بينادونج ام فلان وعايبنج وجيه وخاطرج فيه من زمان أو انج تبين اسامي اعيالج اتكون مميزه يعني بس بدون زعل لانه بيعاندج وما راح يقتنع ،،

احس اول اسم و ولد .. من حق الابو يسمي اكثر .. لان هو اللي بينادونه طول حياته بو فلان … اكثر ما انتي بينادونج ام فلان .. خصوصا فالدوام وبين اهله وربعه

..

والاسامي المتكرره اذا كانت بين اسامي ما حمد و عبد .. فهاي اسامي اتيب البركه للبيت وربي يوسعها عليكم ان شالله ولا تنسين كل بيبي ايي وايب رزقه معاه ^_^ ..

..

اذا اقتنع باللين فالحمدلله واذا ما اقتنع .. حاولي تقولين ان شاء الله المرات اليايه انا بسمي عيالنا بس مب حابه اكسر خاطرك هالمره .. وصدقيني لو هالاسم ربنا كاتب له بياخذه

ياما سمعنا قصص واظن القصه اللي كتبته الاخت فوق اكبر دليل .. يعني الاسم بعد الولاده يتغير.. يمكن قلبه ينشرح او حتى يشوف ان مب لايق عليه او اي شي من هالقبيل ..

الاسم مب موضوع للجدل حاليا .. انا فيني دايما فضول اني اعرف اللي فخاطره .. بس دايما نأجل هالموضوع لبعد الولاده والله يخلي قلوبنا تنشرح لاسم معين باختيارنا ..

على فكره فعيالي الاثنين كل الناس كانو يقولون ليش تسمون جي وسمو جذاك .. بس دام احنا مقتنعين خلاص الحمدلله ..

لا تزعلين عمرج .. وخلي الامور تتيسر وادعي ان البيبي يطلع بصحه وعافيه وها اهم شي ..

الله يوفقج اختي ..

معروف عندنا فالخليج اول بنت واول ولد الريال الي يسميهم

لو شو يحب الحرمه