عساكم بخير ؟؟
وايد بنات سالوني عن الحرمه اللي اتزهب .. بس قبل لا ابدا .. في كذا شي ابا اكتبه لكم ..
1 )… في من الردود ف الموضوع القبلي
https://forum.uaewomen.net/showthread.php?t=1047823 ..
اللي هو اذا انا كنت التاجره نفسها ورديت عليها ف نفس الموضوع ..
وبعد غير جي ارد اعيد وازيد انا مش التاجره نفسها .. انا لا علاقه فيني ف التاجره لا من بعيد ولا من قريب ..!!
2) غير الرسايل الخاصه اللي وصلتني اني ليش احط الموضوع واني بعد التاجره نفسها .. وليش ما اخذ الرقم من عند صديقتي ..
اندوكم الصدمه (( يوم اتصلت ف الحرمه اللي تزهب العرايس وقلت لها اني جفت الاغراض عند ربيعتي وجي .. ف سالتني اي وحده ربيعتي !! ف انا استحيت اقولها بس قالت لي عسب اتعرف هيه شو خذت لربيعتي المهم (( الحرمه قالت لي كيف ما عندها رقمي ربيعتج عندي ف البلاك بيري !!!!!!!!!!! عاد اهنا تذكرت العباره اللي هيه دوم اتقولها ( حب لاخيك ما تحبه لنفسك ) وجنه بس كلام فاضي )) >>> اندوكم شرايكم ف ربيعتي عاد ..
3 ) في وحده بعد قالت عن كيف الاغراض فخمه و بس 50 الف ؟؟!! >> جفت الرد بس ما حبيت ارد عليها
بس الغاليه كل واحد وظروفه .. ولا تحكمين ياما انجوف شي جميته بسيطه بس روعه وانجوف شي غااااالي و دفش .!
السموحه ع البدايه ..
الحين ببدا ف الموضوع اللي وايد بنات كانو يسالون عنه ..!!
اتصلت ف الحرمه .. وسالتها وجي .. قلت لها اني بروحي ابا اتزهب بس هيه اتساعدني ف الاماكن وجي ..
وعقب غيرت رايي قلت لها اذا عادي اروح وياها بس تشرف علي ههههه .. وما كان عندها مانع ابدا
سالتني وااااااااااااااااايد اسئله عن شو احب وشو ما احب شو الالوان وشو الاسعار اللي احسها مقبوله . انواع العبي انواع
القطع شو احب البس ومن هالسوالف..
وعقب سوت لي جدول حلو للاغراض مع الميزانية لكل غرض وجي ..
رحنا ف البدايه مردف سيتي سنتر من الساعه 9 صبح اتريقنا اول و سولفنا شوي .. الصراحه كانت وايد عجيبه و حبوبه ..
خذينا كل الاغراض من هناك وهي وايد ساعدتني ف الاغراض وغير النصايح .. و اللي عيبني فيها انه فيها طووولة بال وخاصة علي .. لاني اذيتها ف كل شي ف تنسيق الثياب و لا ف القياس .. بس والله فنانه حسيت اني طالعه مع اختي والله ..
(( خذنا كل شي تقريبا من مردف سيتي سنتر – نعله عزكم الله – اكسسوارارت وذهب – ملابس بكل انواعها ))
ع فكره رحنا يومين سيتي مردف (( اليوم الاول خذت كل شي وجي ويوم رديت البيت اجوف القياسات وشو اللي ناقص ,, واليوم الثاني بدلت كم قطعه عسب القياس وشوية غريضات كانت ناقصه ورحنا كارفور ))
واليوم اللي بعده رحنا عبايا مول فصلنا عبي .. وعقب ما خلصنا رحنا منطقه اسمها الراشدية لللمخاوير
والحمدلله خلصت كل شي وحاليا انا الحين في فترة نقاهه ف الصوالين .. واتريا من اغراضي بس العبي و المخاوير والمغربيات ف الخياييط ..
وبس اتمنى انكم تدعون لي بالتوفيق ف حياتي اليديده ..
وربي ييسر لكم اموركم يارب .. 
والسموحه من الكل
الله يوفقج ويسعدج بحيآتج آلغلآ,,,
الله يبارك لج في كل شي ويسعدج
ممكن رقم الحرمه او بن كودها ؟
مشكوره فديتج