اشكر خواتي اللي ردوا علي ف موضوعي
https://forum.uaewomen.net/showthread.php?t=322929
و الكل نصحني انه اسوي حد لهالمهزله للي تصير معاي ..
و قررت انا بيني و بين نفسي اني ادووس ع كل شي عشان ارتاااااااااااااح …..
رحت لزوجي قلتله انا بروح اليوم بيت اهلي ببات عندهم لين العيد .
طبعا علامات الدهشه كلها انرسمت ف عيونه لانها اول مره اتصير ..
قالي غريبه شو طاري عليج
قتله اسمحلي انا تعبانه ابا اروح بيت هلي
قالي روحي و ردي اهني حق الرقاد ..
قتله لا ببااااااااات ..
قالي اسمعي الرمسه
قتله انا رايحه .. و ظهرت من الغرفه ……..
لحقني للسياره يبا يفهم مني شو المووضوع قتله اتصل ف هلي هم بيقولولك ..
ركبت سيارتي و رحت و طبعا هو يتصل علي و انا ما رد .. و يطرشلي مسجات ( ردي ) ( يا ويلج مني ) و لما وصلت قريب من بيتنا اشوفه وراي يديملي عشان اوقفله ..
سويت عمري ما اشوفه و كملت دربي ليما وصلت البيت ..
كان باب البيت مفتوح دخلت سيارتي داخل و نزلت ..
توني يايه ادش باب الميلس اشوفه ورايه داش بيتنا ..
قتله : خير شو تبا ؟
قالي : برمس ابوج و بظهر ..
دخلنا الغرفه و ابوي و اخوي كانوا ياسين ..
سلمت و هو سلم و ويهه احمر احسبه لابق علي خاطره يكفخني
سأله ابوي : بلاك تعبان .
قاله لا بس ( فلانه ) ظاهره من البيت تبا اتي اتبات عندكم لين العيد بدون رضاي.
ابوي قاله لا ما يحقلها تبات عندنا بدون رضاك انا بييبها لك ..
اهني عاده انا فررررررررررت قررت اني اواااااااااااجهه و جدامهم..
قلت لابوي : ما بي شي منه و لا بردله يا يطلقني يا يودر هالبنات الي يرمسهم .. عيني عينك يرمسهم جدامي و انا صاااااااااااااااخه و بالعه موووووووووس بس خلاص تعبت يا انا ياااااااااااهم ..
ريلي ويهه اختبص احسبه اتفشل ..
تم ساااااكت و منزل راسه ..
ابوي قالي خلاص هدوا و استهدوا بالله افطروا عندنا اليوم انتوا ضيوفنا و بعد الفطور يصير خير ..
انا رحت غرفتي بدلت و ريحت شويه و يوم يا وقت الفطور دشيت الميلس اشوفهم كلهم ياسين و هو محد
بغيت اموووت سألت ابويه عنه قالي ( راح مب انتي ما تبينه )
صخيت و يلست معاهم افطر ..والله اني ابلع اللقمه و انا قلبي يتقطع عليه .. ليش سويت فيه جي والله ما يستاهل .. افكر هو فطر هاليوم و لا .؟؟ شو حالته الحينه ؟؟
و بعد الفطور رحت اصلي و اقرا قرآن دشت عليه امي شكلها ابوي مخربنها عن اللي صار ..سألتني شو صاير ؟؟
خبرتها ب كل شي ..
قالتلي انه ريلي ظهر و قال لابوي بييكم بعد صلاة العشا ..
و اذن العشا
و صلوا قوم ابويه و ردوا البيت ..
بس مااااايا ..
لين الساعه 11 ونص ..
طرشلي مسج ( بي باخذج الحينه )
طرشتله ( مابي)
طرشلي ( اذا في شي بينج و بيني خلينا نحله رواحنا لا تحرجيني مع هلج )
سويتله طاف و ما رديت ..
تم يتصل فيني ما رديت عليه ..
و ناويه ما ارد عليه ليما ايي البيت و يرمس قوم ابويه …..
خبروني الي سويته صح و لا؟؟
احس لو بديتي معاه شوي وفتحتيله السالفه واذا شفتي ما شي فايده الجأي لابوج ,,
افتشل هو من عمره ولازم يراجع عمره ..
وانت لاتتبعين اسلوب العناد ..
اتصلي فيه اليوم ورمسيه وفهميه وقوليله هذا كله عشان مصلحتنا ..
وانا كل يوم قلبي يتقطع عشانك ..
واللي تسويه اول وآخر شي حراااام …
قوليله تسرعتي وكلمتي ابوج واعترفي بغلطتج
وقوليله اليومبرجع البيت وبتفاهم معاك على كل امور حياتنا وتعال خذني….
الله يهديكم ويسهل اموركم
بس نصيحة مشكلتج لاتخبرينها أي حد غير أمج وأبوج .. والله يختي هاي نصيحة تره الناس ماتنسى ..وإنتي بعون الله بتتناسين وبتعيشين حياتج في سعادة بإذن الله … بس المهم اصبري وعطيه فرصة ثانية إن راواج فعلا أنه يباج… لاتضعفين إلين تحلون المشكلة حتى لو تموتين فيه لين يصطلب ويغدي ريال بمنعى الكلمة لأنه باجر بيكون عندكم عيال ومن حقهم عليكم أنهم يتربون أحسن تربية على الدين والأخلاق …إنتي الحين مدام وصلت مشكلج للأهل يالسه تبنين مستقبلج وياه … اصبري جان بغيتي السعادة لهالمستقبل.. وتناقشي وياه بهدوء وبدون صوت عالي في بيت أبوج في بيتج المهم تسمعينه ويسمعج والله يفرجها .. ولاتنسين الدعاء كم فرج هموم ..
والله يحفظج ويحفظه لج على الدين والخير.
قولي له شقد تحبينه وتخافييين عليييه بس بس ماترضين عليييه ها الخراااابيط هل هو يرضى انه يجوفج مع احد لا عيل كيف انتى بترضين جذه فهممييه بهدؤؤ لا تصارخين ولا تسوووين ازعاااج حاااولي تذكرينه بذكرياتكم قبل كيف كانت وكيف كنتى مرتاااحه بس ها البناات بيخربوون البيت وكل شي
وانتى ادعي واكثري من الاستغفاااار اكثري لعل انه الله يهديييه
كيف اقدر احرج ريلي جدام ابوي واخوي ؟!
ياخي حتى لو الواحد فكر يتوب مابيتوب سبه هالاحراج !
حطيتي نفسج مكانه !
مابقولج هو ماغلط
هو غلط من راسه لكرياسه
بس كان من الاجدر تختارين طريقه ثانيه ,,
عشان تحلين هالموضوع
ادري فيج
منغصه !
منقهره !
سويتي هالشي بدون اراده منج
اي لا وعي !
بس قمه الغلط اعالج الغلط بغلط !
والله كسر خاطري ريلج!!!!
وولو ماريلج يحبج جان مادق لج
وسوالج طاف
: (!
والله حرام
قلبي عورني عليه
الريال مايحب هالنوع من المواجهات
!
الصراحة خواتي ما قصروا بردودهم اللي تبرد القلب واللي سويته عين العقل بس نصيحة لوجه الله لا تعاندينه اتصلي فيه اليوم وقولي له انا برد البيت عشان اتفهم وياك وحبيبتي طلعي كل اللي في خاطرج وقوليله اذا انت تحب ربك فبتودر هالشي قبل حبك لي وقبل حبك لعياللك اللي بيون في يوم من الايام قوليله انت ترضى اسوي وياك الي تسويه فيني ترضى اخونك مثل ما تخوني وقوليله اذا تباني تغير ارقامك وتودر اللي تكلمهن وتصطلب يا كل واحد يشوف حياته والله يوفقك ويوفقني صدقيني اذا في ذرة حب في قلبه لج بيودرنه ان شاء الله والله يهديكم ويصلح بالكم ويفرج همج وكثري من الدعاء