هلا والله .. هالموضوع فيه فائده ان شاء الله للجميع … للمعرسات اليدد.. والمقبيلين عالزواج ..
والعوانس .. والبنوتات …
بدخل ف صلب الموضوع : كثير منا لا يعرف كيفية التعامل مع الضيوف .. وكيف يقولون بيت فلان ما شاء الله ع بناتهم .. يوم ايونهم ضيوف ما يقصرون .. وكييفية طرق التقديم الفوالة .. وطرق المحادثه معهم .. والجمل والاسلوب ؟؟؟
المطلوب : يا صاحبات الذوق الرفيع والخبره و صاحبات المنازل …….. افيدونا … ^^
بالاخير : اطلب من الله ان تدعولنا ف الغيب … و ترفعوا هالموضوع بكلمة حسنه
بعد انا اريد اتعلم
ببتدي بنفسي نحن قبل مايونا الضيوف الفواله تكون زاهبه من فواكه بانواعها والرطب والقهوه والشاي والخ00
من ايون الضيوف اول شي انضيفهم بالعصير البارد انبرد عليهم عقب القهوره والفواكه والرطب 00
عقب الفطايروالقيمات والخنفروش مع االشاي والنسكافيه والحليب بالزنجبيل 00
اخر شي الحلا ويكون نوعين او نوع مع اي سكريم مزين ببسكوت ويفر ومرشوش بفليك
وسلامتكن ننتظر البقيه
الضيوف لازم تاكلون وتشربون معاهم عسب مايحسون بانهم غرب ومب كلكن اتقومن اتضيفن لا 2يقومن ووحده تضيف مع الخدم
الصحون لااااااااااااازم اتكون طقم كامل مب كل شي نوع 00 لازم يكون كلينكس وشوك وملاعق مب كل شوي نطت وحده تيب الغرض الناقص 00 لازم اتيسولفون وتفرفشون ضيوفكم مب اذا هم ساكتين انتم بعد اتمون ساكتين
الضيافه لازم اتكون بذوق وترتيب راقي يرضي ضيوفكم
هذا الي عندي ونطبقه ياريت نتعلم من الحريم السنعات اكثر واكثر
السلام عليكم ورحمة الله وبركاته = 30 حسنة 
وبعدها يقول : يا مرحبا بكم .. نورتوا .. إلخ .
ويسأل عن أحوالهم .. وان شاء الله بخير .. إلخ .
وبعدما يقعدون بشوي .. طبعاً : الجاي والقهوة والفواكه يكون محطوط ومغلف ونظيف بطريقة حلوة .. وجاهزة قبل لا يدخلون علينا ..
بس أول ما اييون نتريا خمس دقايق وعقب نقدم لهم تشكيلة من العصاير الطازجة .. والباردة .. ومشكلة مسوينها في البيت انظف وأحسن ..
مب شرط القلاص يكون وااااااااايد كبير ولا انه واااايد صغير … عيب نشوفه .. يكون وسط
مع مفرش حلو في الصينية ويعطيه فخامة
وبعدها نضيفهم بالفواله .. يا اما نقصقص لهم .. ( ندلعهم ) او انه يكون على شكل فروت سلط ونكون مسوينه طارزج قبل لا ايييون بعشرين دقيقة مثلا .. في كاسات حلوة .. وجاهزة .
واذا كان الوقت على العصر يايين او المغرب . نكون حاطين .. مشكلات من : بيتزا – فطاير بالجبنة = زعتر – وغيره .
أما اذا كان وقت العشا .. الفطاير وهالسوالف نحطه بوقت العشا احسن .
—
وبخصوص السوالف .. لازم نعرف طبع الاشخاص اللي جدامنا كيف . في ناس ما يحبون الكلام الزايد وفي ناس يحبون الهدوء … يعني نتكلم باللي يرضي الله ثم يكون هالكلام يناسب تفكيرهم وعمرهم ..
العيوز مب مب مثل الياهل .. مب مثل الشابة … الخ ..
ونبتعد عن الحش والنميمة وما شابه ذلك … ونحافظ على ضيوفنا .. ما نخليهم في مكان مكشوف رياييل البيت رايحين رادين مثلا أو يكون في اختلاط مثلا ..
طبعاً في ناس عادي عندهم وهالشي حرام ما يجوز أبد ..
وسامحونا طولنا ولكن حبيت افيدكم ولو بشي بسيط ودعوتكم ..
نحن للأسف من يوم كنا صغار من نرمس يقولون اص وعيب وبلا كلام زايد..انتي بنت..
فقمنا نستحي من الحريم ولا ندخل عندهم بس امي وحرمه اخوي نحن بس ويا البنات عادي وفري وكل شي
بس من نشوف حرمه تقولون شايفين ريال شرده