يقولون البيوت اسرار .. صح
بس انا مب فاهمه عن العبارتين .. يعني وين تكون الاسرار .. >> مستغربين صح
يعني مثلا انا احيانا تصير لي مواقف مع ريلي اقولها حق اربيعتي من باب الفضفضه ..
وحتى احيانا اقولها لاختي الكبيره ..
انا ما اقصد علاقتنا الجنسيه لااااااااااااااااا .. الحمد الله هالشي اعرف انه حرام اقوله اي شخص ثاني …. اللي اقصده موقف يفرح صادفني مع ريلي او يزعل او موقف يضيج ..
احيانا تصير مواقف فبيت اهل ريلي انا بعد اقول هالمواقف لربيعتي ..
في كذا مره حطيت موواضيع تخصني .. 
.. ما ادري هل معناته اني ما حشمت الاسرار الزوجيه .!
بنات ابي اعرف وش يعني البيوت اسرار .. وشو الحدود المسموح اني اتكلم فيها عن زواجنا وبيتنا بشكل عام ..
وهل يعني كلامي عن اهل ريلي يعني اني افشي اسرار البيت الزوجي .؟!
هل يعني لما اقول اي شي لربيعتي يخص زواجنا يعني افشي سر البيت الزوجي ..
بصراحه انا مب فاهمه حدود الاسرار الزوجيه
ويا ليت وحده فاهمه هالعبارتين تفهمني ,,
لا تقولين ام ريلي قالت والله لايسامحها واخت ريلي تغارواتطيحين فيها ومن هالكلام ..يعني لاتغتابين حد .. دايما حطي حد للكلام .. خاصة اذا كنت معصبة اتعوذي من الشيطان وتكلمي
اما الامور المتعلقة بحياتج الزوجية هاي انا بالنسبة لي خصوصيات
يمكن اشتكي لاعز صديقاتي .. او خواتي لكن في منتدى عام كل العالم تقرا ماله داعي …. يعني انت عاقلة وتعرفين وين الحد المسموح … الاشياء الخاصة بين الزوجين معروفة ….
مثال … ريلي باسني اليوم !!!!! ماله داعي تقولينه … هذا شي خااااااص واايد وعيب وحرام ….
اما الامور السطحية .. والمشاكل العادية جدا عادي انج تقولينها بس بحدود …
الله يوفقج
كلمة البيوت الاسرار بنظري تعني :
فالبيت تصير احداث وايد بينج وبين ريلج او اهلج … في منها الاشياء زينه و في منها لأ .. الاشياء الزينه تقدرين تقوليها بس مب شرط حق كل ربيعاتج خوفًا عليج من الحسد بس ربيعتج الي واثقه منها و الاشياء الي مب زينه انا اشوف انج ما تقولينها حق حد لأنه الله قال في كتابه .. "إذا بُليتم فأستتروا" ..
البيوت اسرار يعني كل الاحداث الزين و شينه الي تصير في بيتج ……… والمقصود من هذا المثل "إذا بُليتم فأستتروا"
يعني انه الانسان يستر ع عمره وما يرمس عن الاشياء الي تصير فالبيت
في كلمة قريتها مرة ودايم على بالي الكلمة هذه تقول " إذا افشيتي همج لصديق بيزعل عشانج وبتضايقينه، وإذا أفشيتيه لعدو بيشمت فيج وبينشره" فخليه في صدرج أحسن …
إذا انعم الله عليج بنعمة داريها عن عيون الناس لأن العين حق حتى لو الواحد ما يقصد … صاحب المال يحسد ماله و الأم تصيب عيالها بالعين إن ما ذكرت إسم الله …
وغير جذي ترى انتي تنشرين اشياء يمكن اصحابها يتضايقون إنج تنشرينها عنهم … ويمكن الخبر هذا اللي تطلعيه يوصل لحد يحب إنه يشمت فيهم فحرام تفتحين عليهم الباب …
في اشياء عامة تقدرين تتكلمين فيها بس مب أكثر … يعني السوالف اللي فيها مثل فلانة تزوجت هذه ما فيها شيء بس لا تزيدين … يعني لاتقولين خذت ولد فلان مايستاهلها وما عطاها المهر اللي تستاهله …
او إذا في وحدة تطلقت الأحسن ما تذكرين الخبر إلا لو حد سألج وعليج بنعم أو لا … ولا تزيدين …
لما تذكرين ريلج بشي زعلج الناس تسأل بعد سنين و كل مرة ها ما صفت الاجواء اذا صفت الاجواء فهم يمكن يحسدونج لانهم في نفس الوقت توهم في مشكلة
كل ما اتكلم عن ريلي ولو في مشكلة تستويلي مشاكل اكبر بدون تدخل احد بس اشياء عجيبة
ونحاول نسولف في امور سطحية فقط … مب نتعمق و نتكلم عن كل شخص… يعني ما نخلي عمارنا جرااايد مفتوحة لكل من هب و دب… " كلمة ما اعرف" احسن من خراب البيوت …