البورسلين المنزلي بالخطوات

السلام عليكم و رحمة الله و بركاته

شحالكم؟!

من فتره ادور المعجون الي ينحط فالفرن و يتشكل.. سألت المجرودي و جرير و غيره

و كلهم ما عندهم.. او مخلص و الطلب من النت يطوووووول

فدورت على بديل يعطي نتايج حلوه

لقيت البورسلين

عجينه تتنفذ فالبيت و تترك عشان تنشف و تتلون
فكرة العجينه انها تنشف بالهواء ع الشكل النهائي فيراعى انها ما تتخلى فالهواء لفترة طويله قبل التشكيل.

سويت منها للحين ٣ مرات.. و نفذت منها اشغال وايد بس للاسف مش منزله صور ع الكمبيوتر الحين

الطريقه الي اعتمدتها و الوصفه

نحتاج:
ا كوب لزق
١ كوب نشا
٢ ملعقة طعام زيت اطفال (جونسون او اي زيت اطفال ثاني)
٢ ملعقة طعام خل ابيض (و ممكن عصير ليمون و ما نستخدم خل التفاح لانه يسوي لون فالعجينه النهائيه)

الطريقه:
١. نخلط المقادير (اللزق و النشا اول و بعدين نضيف الزيت و بعده الخل) حتى تتماسك تماما
٢. نحطه ع نار هاديه و نتم نخلط لين يتماسك.
٣. نستمر بالخلط لين يتم اروحه ما يلزق ابدا فالوعاء الي نخلط فيه.
٤. نحط كريم ع سطح (اي مكان نظيف لوح التقطيع مثلا) و ع ايدينا بعد كريم.
٥. نعجن العجينه لحد ما تستوي متجمعه فكتله وحده ولا تلزق حتى فايدينا.
٦. نجهز كيس نايلون مال السندويجات و ندهنه من داخل بالكريم.
٧. نلف العجينه بالنايلون الشفاف مال الاكل و بعدين نحطه فالكيس و نتاكد من خلو الكيس من الهواء.

تترك لمدة ٢٤ ساعه قبل العمل بها

و بتلقون الطريقه على اليوتيوب لو بحثتوا العنوان هذا

Cold Porcelain Tutorial xx

صور من الايفون من تنفيذي للعجينه + كورنر اشغالي..

مرحلة عجن العجينه

ملمسها المفروض يكون مثل الصوره… ما يلزق بالايد ابدا.. اول مرتين كانن ناجحات بالنسبه لي و المره الاخيره كانت سايله شوي
احتيت ازيد لها نشا عشان اعدلها و احطها ع الغاز شوي لين ضبطت

بالنسبه للتلوين.. المجال مفتوووووح.. ممكن الوان زيتيه، مكياج!، الوان الاكل… خذي راحتج و جربي! و اوعدكن النتيجه رررروعه

الشي المزعج الوحيد ان العجينه تستوي شوي رخوه مع الالوان السايله فتحتايين تعينيها شوي زياده لين تتماسك.

و اخيرن هذا كورنر اشغالي

١. اللزق الي اعتمدته
٢. مجموعة الالوان.
٣. ورنيش لاضافة لمعة + حماية النتيجه النهائيه من الماي و التغيير. (شي ضروري بس انا استعمل مناكير شفاف )
٤. خل ابيض
٥. لوح التقطيع
٦. قفازات
٧. فرش
٨. اعواد اسنان
٩. عدة التشكيل بتلقوها في مكتبة المكتبه.
١٠. ادوات تشكيل فيها رؤوس مدببه للتفاصيل الدقيقه.