البثيثه يا شطار تعالوا خبروني للمطلقات

السلام عليكم ورحمة الله وبركاته

أبغي أعرف شو تحطون في البثيثه ، لأني أنا أحط طبعا الطحين المحمر والتمر والهال والدهن الخنين ( الدهن البلدي ) وشوية ماي ورد

البثيثه تطلع حلوه عندي لكن ريلي يقولي إنها ثجيله ويقترح اني ما أحط الدهن الخنين بس أحس انها مابتضبط إذا حطيت سمن عادي انتوا شو رايكم

يالله خبروني عشان أيرب طرقكم خلال هاليومين

وصفتج حلوه
بخبرج عن طريقه الوالده ربي يحفظها
اول شي اتشيلين النوه اللي في التمر ولينيها اشوي في السمن على نار خفيفه لين ماتلين وتصير عجوه
وعقب حمري الطحين طشونه وارفعيهم عن النار وتمي زيدي الطحين شوي شوي ع التمر عسب ماتطلع يابسه وتمي افريكها مع الطحين واذا حسيتها لينه زيديها اطحين وتمي افركي وافركي لين مايختلط الطحين مع التمر وعقب زيدي الاشيا الثانيه حطي بيذام ويوز وهيل وجرفه طشونه بس ماي ورد احيد ما يحطون لانه يخلي البثيثه اتصير شرات العجيين
يربيها وان شاء الله تعيبج

مشكوره الغاليه ربي يعطيج العافيه

نحن بعد مانحط ماي ورد بس أنا قبل فتره كنت أدور إضافات وطرق عالنت وشفت انه في ناس يحطون شويه ، قمت أنا وقلدت والنتيجه كانت تمام