بقدم لكم اليوم الاش .. وهي لها عدة طرق بس انا ما اعرف الا هذه
المقادير : ( هذه المقادير حق عائلة صغيرة .. اذا تبغين لعائلة اكبر ضاعفي المقادير ..
1- عدس اصفر وعدس اخضر ولوبيا ونخي ( بخصوص النخي ممكن استعمال المعلب انا اسوي جذيه )<< مقدار نص كلاس جبن صغير << ينقع في الماي لمدة نص ساعة وبعدين اتفورينه ولما يلين تشخلينه .. واتصفينه . ونص كلاس جبن عيش ابيض مغسول بس ومش منقوع
2- فيه خضرة معروفة عندنا باسم ( سلق ) بكسر السين ما ادري اذا اتعرفونها او لها اسم ثاني .. حتى الهنود مال الخضرة يقولون لها جذي وهي اوراقها كبار وطوال .. هذه اتيبين منها ربطة وحدة..
وربطة من كل من الكزبرة والبقدونس والشبت .. انا اسويه بدون شبت لاني ما احب طعمه .. الخضرة كلها تفرمينها .. واتخلينها على جنب .
3- معكرونة الطوال ( الاسباجيتي ) ربع الكيس واتكسرينها صغار بس مو صغار وايد .. واتخلينها على جنب
4- كيس واحد من شوربة ماجي ..
5 -ملعقتين اكل من حبوب الشوفان ( كويكر ) اتنقعينه في الماي
6 – رشة من كل من الكركم والبزار والقرفة والفلفل الاسود والملح والهيل ..
7 – 2 بصل متوسطات اتقطعينه طوال ..
8 – مكعبين ماجي
الطريقة :
1- اتجهزين الجدر اللي بتطبخين فيه واتحمرين فيه البصل ( اذا اتحبين اتحطين قطع دجاج صغار حطي ما في مشكلة ) وبعدين اتحطين مكعبين الماجي مع البهارات وتحمسينه واتخلينه شوي ثم اتصبين الماي يكون اقل من نص الجدر وطبعا بعدين بتمين اتصبين شوي شوي من الماي .. وخليه يفور شوي وبعدين حطي كل المقادير الموجودة الخضروات والبقوليات والمعكرونه والعيش والشوربة والحبوب .. وتخلطينه مع بعض والحين زيدي ماي شوي لما يغطي كل المقادير وغطي الجدر وخليه يطبخ على نار عالية شوي بس اتشوفين الخضرة ذبلت وطي النار .. ومن فترة لفتره حركيه بالملعقة الخشبية .. وخلي يطبخ على راحته .. تقريبا ياخذ عندي 45 دقيقة .. يعني بعد نص ساعة شوفي الشوربة اذا كانت غليظة وايد صبي عليها اشوية ماي .. وذوقيها اذا كانت تحتاج ملح والا لا ..
وبالهنا والعافية وان شاء الله تعجبكم .. وعند التقديم اعصلروا عليها ليمون تطلع لذييييييييييذة ..
واي استفسار انا حاضرة