اكلتي السريعه والصحيه بالصور حياااكن ^^ من مطبخ الامارات

شحآآآآآآآلكن يميع عساكن بخير ونعمه يآآآآآرب

بما اني قررت ابعد عن العيش شوي والاكلات الدسمه
قلت اليوم خل افتك من اكل البشاكير وادخل اسوي شي بنفسي >>لاول مره بالتاريخ خخخ

فكرت وفكرت وقلت خل اسوي سردين بالفرن ^^
بما اني انا اخذ فيتامينات وحبوب الاوميغا 3
قلت خل استفيد منهن بشي طبيعي ومعروف انه السردين من اغنى انواع السمك بالاوميغا 3 وينصح الاطباء باكله على الاقل ثلاث مرات بالاسبوع خصوصا للي يعانون من امراض القلب الله يبعده عن اليميع يارب وللبنات اللي يعانون من تساقط الشعر >>> ما صارت طبخه بسويها خخخخخخ استويت خبيرة تغذيه
بس ترى عسب تعم الفايده لا غير >>> اخلصي بس لووول

المهم نحتاج لاكلتنا سردين واهم شي يكون فريش لانه اذا مب فريش ماراح يكون لذيذ ^^
وراح اقولكم كيف تعرفون انه فريش ^^
اول شي يكون يلمع وما فيه اثار دم وايد
ثاني شي يوم تمسكين السمجه من الاخير وتخلينها بشكل افقي ما تلتوي لتحت يعني اتم تقريبا سيده
وبطنها ما تكون لينه
ويوم تيين تشلين الشوج منها يكون صعب بالشل
وطبعا ريحته ما تكون كريهه
بهذا تعرفين انها فريش ^^

نرد لطبختنا خخخخخ
يتغسل السردين زين وينشل الشوج منه وتصفينه بهالطريقه عسب ينشف ^^

نقشر البطاط واليزر على حسب الرغبه وبالكميه اللي نباها نفورهم بماي وشوية ملح
نص الطباخ يعني لا تخلون البطاط تستوي لينه وايد لانها بتكمل طباخ بالفرن ^^

نييب كزبره وبقدونس وثوم ممكن نخلطهم بالخلاط او تقطيع ناعم ^^

بعدين نضيف عليهم ملح وكمون وبابريكا وملون غذائي (تحصلونه بالكارفور)

وعصير ليمون حسب الرغبه ونخلط المكونات زين ^^

عقب نييب صينية فرن ونصف فيها اليزر اللي شخلناه من الماي مسبقا >> حسيت عمري شيف خخخ

ونييب البطاط ونصفها فوق اليزر ^^

عقب ناخذ السردين ووندهنه من داخل بالخلطه اللي سوينا ونسكره ^^

عقب ما نخلص كل السمج نييب طماط ونطحنها

ونضيف عليها اللي تبقى من خلطة الكزبره ..

عقب ناخذ السردين ونصفه فوق البطاط واليزر ونصب عليها خلطة الطماط
وشوية زيت زيتون ^^
ممكن اللي تحب الفلفل الرومي تقصه دوائر وتحطه فوق السردين بس انا ما احبه ما حطيته ^^

وندخل الصينيه للفرن الين يستوي السمج ونطلعها ونزينها بزيتون وقطع ليمون ^^

وهني وعافيه ^^