السلام عليكم ورحمة الله وبركاته ^__^
خوااااتي عكثر ما راسلوني البنات انهم يبوون موضوعي الجديم بس بالصور كونها ما تظهر لأن الموضوع قديم,,حبيت انزله اليوم مرة ثانية بالصوور اليديدة..
وللعلم ترااني وااايد زعلااانه انه موضوعي هذا انتشر فوايد مدونة اماراتية وخليجية وعربية وماكان فيها اي حقوق نشر وفيها وااايد تمصخير لأني كاتبه باللغة العامية الاماراتية والي اتقوول ماعليه يبالكم طولة بال ومترجم عسب تفهموون والي اتقوول لقيت وايد صعووبة في ففهم اللغة ووحدة اتقوول مافهمت شي!!!!! جني ارمس اوووردو وانا مادري.gif "12 (99)")
,,حتى ما ذكروا انه الموضوع من منتدانا والأغلبية نسبوا الموضوع لنفسهم 
وااايد اظايجت بس قلت يالله ما عليه المهم انه البنااات يستفااادون من الطرح وهالشي خفف عني وااايد ,,والاحلى من كل هذا انه واايدات الي استفااادوا وشكروا فالموضوع ^___^
يالله بسنا تقرقيير واااايد وخلووني اراويكم الموضوع الجديم بالصوور اليديدة ^___^
اكيد من العنوان باين اني وصلت لأعماق كل بنت همها موضوع هالشي وبالذات البنات الي على ويه زواج^__^
بداية استهل موضوعي بمقتطف بسيط من حديث النبي صلى الله عليه وسلم في هذا الموضوع بحيث علق وقال ((…نتف الابط وحلق العانة))
اذاً الحكمة في موضوعنا هذا والي الكثير من الحريم فزمنا هذا غافلات عنها بحجة انه النظافة الاكيدة بتكون بالحلاوة او الشيرة وأيما خطأ عظيم تجنيه على نفسها هاي الاخت بدون ماتدري!!!!!!!
وحتى الاطباء تأخروا في اكتشافهم لمدى خطورة هالامر و توصلوا أخيراً لنتيجة وهي انه كثرة الشد والمط في هذه المنطقة يؤدي الي موت وتدمير الخلايا الحسية والاعصاب المتصلة بالدماغ ,,لذلك كثيراً ما تمسعين من الخوات انه بداية الموضوع يكون مؤلم بس مع الاستمرار ما راح اتحسين بألم كون المنطقة اتخدرت!!!!!وحليلها ما تدري انه ماعادت عندها خلايا اتحس بالالم او حتى اللذة (السموحه),,
وكثيرون هم الازواج الي يشتكون من برود زوجاتهم وما كان ذلك الا بسبب هالعادة الخاطئة في تنظيف المنطقة والعناية ابها ..متناسين مع الايام الترهل الي بيصيب هالمنطقة ..
مابطول عليكم أكثر …بس هاذي بداية حبيت استهلها بحديث النبي عليه الصلاة والسلام وكلام العلماء حول هذا الموضوع في آخر الزمان^____^
واحينه بندخل فصلب الموضوع ,,طبعاً الطريقة الي بنتبعها بتحتاي منا مجموعة اغراض من الجمعية بس كلها بسعر ممتاز وفي متناول الجميع ^____^
خلونا نبدى بسم الله
اول شي قبل ما تدخلين الحمام عزج الله لازم اتكونين امحظرة عدتج كاملة عسب ما تدودهين اذا ناسية شي ^__^
من عقب ما تسبحين واتخلصين سبوحج كامل وعقب الشور جل بالريحة الي اتعيبج بنبدى نشتغل عالمنطقة.. بتقوليلي ليش ما انظف المنطقة قبل عقب اسبح واستخدم الشاور جل ,بقولج لأ وغلط وما ينفع ^___^ لأنه الشور جل عبارة عن صابون سائل والصابون مثل ما كلكم اتعرفون يسمر المنطقة ونحن ما نبا انسمر المنطقة كونا نحن بعدنا ما بدينا التنظيف,,حلو الكلام؟؟ ^____^
اوكي خلصنا السبوح احينه بنييب الموس^___^ هي نعم الموس ولا تستغربين !!!!لأنه نحن بنتبع سنة الرسول عليه افضل الصلاة والتسليم فالموضوع,,واحينه بييني السؤال المعتاد انزين شو شكل الموس الي بنستخدمه صح لا ؟؟ ^___^
اوكي شوفوا معاي الصور قبل لأنه نحن بنستخدم اكثر عن شفرة فالموضوع وكل وحده لها شغلتها^___^
هاي الصورة الاولى لموس فينوس ومعروفه ما يحتاي عليها اسئلة وكل من تحلي(اتصدي) الشفرات اترومين اتغيرينها ,,اتييج علب معاها فيها تقريبا 8شفرات مادري6 مب متذكرة لأني افر العلب ب40درهم او اكثر المهم ابهالحدود^____^ على فكرة وعن تجربة ,,احسن موس لفينيوس هو الازرق ,,جربت الوردي والبنفسجي ما عيبوني
هاذي شفراتها
وهاي الامواس بعد من غير(للأسف ما حصلت لهم صور فالنت من جذا انا صورتهم والسموحه اذا الصور مب واضحة) بعد بتلاقينها فكارفور او حتى فالسفير هايبر ماركت جريب الشباصات ^____^
وهاي آخر شفرة بعرضها الي هي مكينة براون المعروفة ويلي البنات يشكّون اونه ما اتشل عدل وانا الي بعلمكم عليها ^____^
طبعاً رقمت لكم الشفرات عسب يسهل علي الشرح ^____^
اوكي خلونا نبدى من يديد ^___^
اول شي هاتي النشا^__^ نشا الذرة
وانثريه فوق المنطقة كاملة وابدي شلي باتجاه نمو الشعر باستخدام موس فينوس الي بالرقم (1) بتقوليلي يتقطع الشعر؟؟اقولج هيه لأنه هاي اول خطوة ^____^ وكل من طاح النشا وخلص ردي حطي مرة ثانية وانفضي الموس بالقاع عسب تتخلصين من الشعر العالق بالموس,,لين اتخلصين المنطقة الفوقية كاملة ..
احينه بتنزلين اشوي فهالمنطقة (بين الشفرات) سوي نفس الحركة بس هالمرة بتستخدمين الشفرة رقم (3) ,,انثري النشا وردي شلّي باتجاه نمو الشعر وللعلم هالشفرة يوم بتيين تستخدمينها خليها مايله على الجلد لأنها بهالطريقة اتشل اما ان خليتيها عامودية تراها ما بتشل شي ^____^ ,,اوكي خلصتي هاي المنطقة احينه ,,خلينا انروح عمنطقة البكيني والي انا اشوفها ما اتعور بالاساس ^___^ وهاي عادي لو اتشلينها بالحلاوة ما منها ضرر لأنها بعيدة عن المنطقة بس للي اتفضل الموس بعد ماشي خلاف ,,بتستخدمين الشفرة رقم(2) وبتسوين نفس الشي بخصوص النشا ,,بتنثرينه وعقب بتشلين باتجاه نمو الشعر ,,احينه خلصنا كامل المنطقة بالشل ((فاتجاه نمو الشعر)),,يالوقت الي بتشلين فيه عكس نمو الشعر وبتحسين بالفرق من احينه ^__^ وانتي اتشلين (( بعكس نمو الشعر)) بتلاحظين انه المنطقة ناعمة وانتي اتشلين,,لأنج اتخلصتي من معظم الشعر ^__^ فبتردين اتحطين النشا واتشلين ^____^ بتقوليلي شو خانة الشفرة رقم(4) صح؟؟ اباكم تتحرقصون وعقب بخبركم ^____^
احينه من عقب ما خلصنا تنظيف المنطقة من الشعر ,,لازمنا انقشر المنطقة ,,عسب السواد يخوز وعسب انه انجدد البشرة ونتخلص من القشرة الفوقية للجلد الميت وبنفس الوقت انحس بالنعومة^____^,,عندج طريقتين للتقشير ,,وانا عن نفسي ساعات استخدم هاي ومرة هاي واثنينهم لهم نفس المفعول ترى ^____^
شوفي معاي هذا المقشر معروف وبتلاقينه عند بدي شوب ,,احسن شي عندي اللوز والفيفاي ^____^
هذا باللوز
وها بالفيفاي
وهذا النوع الثاني الي استخدمه معروف ملح اليوكو ^____^
وهذا بعد فنان ووايد يمدحونه ,,اول ما بديت اقشر كنت ابدى فهذا وعقب خذت البدي شوب
هاتي اشوي من المقشر وحطي بيديج وافركي ^___^ انا استفاد منه بالاثنين منه عسب اقشر ايدي ومنه حق المنطقة من جذا ما احطه على طول فوق المنطقة ^____^ المهم شلي بيدج وافركيه عدل عالمنطقة بليفة ناعمة
او حتى بالليفة المغربية
بس اهم شي ما اتثجلين ايدج عليها >-< وااايد بنات يظاربون ويا الليفة وبالذات الليفة المغربية عبالهم السواد بيروح من زود الدفاشة الي يسوونها وها اكبر غلط لأنها اتفتح المسام اكثر من اللازم بالتالي بتييج النتيجة عكسية >-< وبخصوص الي بتستخدم الملح للي عندها وما تعرف تستخدمه ترى حطي اشوي ماي بيدج واشوية ملح وافركي عادي^___^((عندي ملاحظة بخصوص التقشير بس بخليها لآخر الموضوع ))
انزين خلصنا من التقشير احينه هاتي الغسول الخاص ابهالمنطقة وشي منه وايد ,,سيباميد والغسول الاندونيسي وكير فري ^____^ عن نفسي استخدم الاندونيسي وااايد فنان وريحته رووعة بالذات البرتقالي ^_____^ (وملاحظة بسيطة للي تبا تستخدم الغسول ترى لازم تستخدمينه مرتين فاليوم من تصبحين وجريب ترقدين عسب النظافة والريحة الحلوة )
وهاي انواع الغسول وانتي اختاري الي يناسب طبيعة بشرتج ^_____^
هذا سيباميد
يتبع^___^
وهذا مال كيرفري
احينه نشفي المنطقة زين اما زين من الماي وعقب حطي الاسكينول ^___^ عسب يسد المسامات المفتوحة ,,مفعولة نفس التونيك ترى هو نفسه تونيك بالاساس ^____^
اختاري الي يعيبج ^_____^
انا هذا مالي ^____^
ومن عقب ما ينشف الاسكينول حطي زيت اللوز ((المر)) كمن قطرة بقطنة او بيدج وافركي المنطقة كاملة ^___^ وعفكرة ترى زيت اللوز يخفف نمو الشعر وينظف المنطقة وهالزيت اترومين تستخديمنه على ويهج لأنه وااااايد مفيد للبشرة الدهنية والمختلطة ويبيض ((والي ما عندها زيت اللوز المر اتروم اتحطي البيبي اويل بعد اوكي وفنان))
وشي منه انواع ^___^
احينه عادي البسي الاندر وير بس اهم شي يكون قطن ويفضل انج تستخدمين الكير فري اليومية مع الاندروير ,,
بس الليلة الي بتشلين فيها لا اتحطين الكيرفري بتقوليلي ليش ؟؟ ^____^ عسب انه نحن احينه بنسوي خلطة اتبيض المنطقة من عقب الحف ^____^ يالله هاتي ورقة وقلم وسجلي ^___^ ولا مايحتاي الصور موجودة واحفظي الطريقة تراها وايد سهله وفنانة ^___^
هاتي قوطي فاظي وحطي فيه كريم جليسوليد
وعصري عليه ليمون ,,يعني مثلاً اذا بتاخذين علبة كاملة من لكريم تبين لج 6ليمونات صغار من اللومي المحلي او ليمونتين كبار من الليمون اللبناني ^____^
وعقب خضي القوطي زين اما زين وادهني المنقطة فليل ,,بتقوليلي شقايل وانا امحطيه زيت اللوز ^_____^ بقولج ترى زيت اللوز بينشف ومتى ما نشف حطي هالخلطة ^____^ ومع انج مب مجبورة لأنه هاي الخطوة للي تبا اتبيض المنطقة بزيادة ^____^وانا احب الثنتين مو بس لهالمنطقة لأ ^____^ استخدميها عكامل جسمج فأي منطقة اتحسينها اشوي داكنة عن باجي بشرتج
احينه بنيي لموضوع الشفرة (4) الي ما رمسنا عنها ^_____^
هاي الشفرة ما تستخدمينها الا عقب اسبوع او اكثر او اقل حسب نمو الشعر عندج^__^ ,,دام الشعر بيكون بعده صغير وما يحتاي لكل هاك العبالة ,,وبنفس الطريقة راح نستخدم النشا وهالمكينة وبنتبع سالفة الغسول والزيت ولكريم المبيض ^__^
احينه عندي كمن ملاحظة بس اخيرة :
1-يمكن مليتي وانتي تقرين كل هاك الخطوات وحسيتي انها طويلة وتاخذ وقت بس صدقيني يوم تتعودين عالسالفة ما بتاخذ عنج 10دقايق و انا ما حطيت هاك الخطوات كلها من فراغ^____^,,انا لمن ييت احط الموضوع احطه لفئه توها داشه هالعالم ويلي ما تدري عنه أي شي ,,من جذا خليت موضوع المكينة آخر شي ودام عندج خلفية عن هالموضوع فما يحتاي اتظيفين لمعلوماتج سوا سالفة استخدام النشا وطريقة الحف الصح والغسول والمقشر وكريم التبييض,,والي بتيي بتتبع هاك الخطوات لأول مرة بتلاقي نفسها مب محتاية انها اترد اتعيد نفس الخطوات كل مرة لأنه المنطقة اتكون اتهيئت على طريقة التنظيف الصح
2-التقشير ما اتسوينه الا مرة فالاسبوع
3-زيت اللوز مب كل يوم بتستخدمينه غير يوم اتيين اتحفين عدى كريم التبييض استخدميه يومياً من عقب ما اتغسلين المنطقة فليل بالغسول وترقدين عليه لليوم الثاني
4-يفضل اقل شي مرتين اتبدلين الاندروير عسب البكتيريا ما تتكاثر بالمنطقة واتسببلج روايح ما تتقبلينها وبنفس الوقت ما تتحسسين او اتصيبج حجة ومثل ما قلت يفضل القماش القطن وموول ما انصحج بالنايلون او البلوسترين لأنه يسبب تعرق للمنطقة ويسودها ,واتأكدي قبل ما تشترينهم لأنه احياناً يقولج انه مصنوع من70بالمية قطن والباجي بلوسترين هذا لا تاخذينه ,,أخذي القطن100% والقطن السوري واايد فنان ومريح ^___^
5-فباجي الايام اترومين اتحطين بودرة اليهال (بيبي جونسون) من عقب السبوح مثل ما ذكرت قبل فموضوعي عن طريقة تعطير الجسم,,او حتى مسك الطهارة ((فأيام الدورة الشهرية))وللي ما اتعرف تستخدمه ,,ترى مسك الطهارة اييج لونه على سواد ,,بيكون داخل مضرب شرات مضارب دهن العود,,بتاخذين قطنه واتحطين فيها كمن قطرة من هالمسك وتمسحينه عالمنطقة من فوق لي تحت(في حالة كنتي بنت) اما ان كنتي متزوجة عادي اتحطين القطنة داخل واطلعينها ,, بتحرقج فالبداية مال دقيقة وخلاص ^___^ وهالطريقة مالها اضرار وهاذي احدى مأثورات السيدة عائشة عن النبي عليه افضل الصلاة واتم التسليم
6- أي وحده تدخل الحمام لازم عليها انها اتنشف المنطقة قبل ما اترد تلبس الاندروير عسب اتسبب ريحة مقززة ولا اتساعدين البكتريا انها تتكاثرلج فهالمنطقة,,وخلي دايماً عندج فوطة صغيرة خاصة لهالامور,,اما ان كنتي برع بيتج خلي معاج كلينكس من النوع القوي وما يتقطع للتنشيف فالاوقات الطارئة ^___^
7-أي وحدة حبت الموضوع وناوية تنقله لأي منتدى ثاني ^__^ أحلل لها هالشي بشرط ذكر المصدر واسم العضوة ^___^
ووووووووووووبس اتمنى الموضوع عيبكم لأني تعبت عليه من خاااطر ^____^ ومابا منكم غير دعوة حلوة بظهر الغيب بالتوفيق فالدارين
تسلمين
والله أني استفدت من كل كلمة بالموضوع
يزآج الله خير حبيبتي