استغلال الإجازة لمصلحتج…. شاركينا تجاربج…. لتكوني انيقة

اليوم حابة أتشارك وياكم موضوع يعتبر ذو اهمية معاي ومع غيري…

وهو كيف تستغلين اي نوع من الإجازات لمصلحتج ولمصلحة تطوير النفس…

ببدأ انا بطرح الموضوع….

انا عندي وايد هوايات وبخاطري استغل اي نوع من الإجازات بعيد عن زحمة الدراسة والعيال… صح بيكون صعب بالبداية لكن لو توفر عامل الإرادة ما في شيء بيكون صعب ومستحيل….

اليوم بديت بهواية حابة اني انميها في داخلي… الا وهي نقش الحنا….. كلنا يعرف شو يستوي يوم المناسبات والأعياد … يا اما تتكنسل وياج موعد الحنا او تيي متأخرة او يكون الصالون مزحوم وتطلعين متحنية او تطلعين زعلانه…لانج ما بتتحنين… او يمكن الضغط يلي يستوي بالنسبة للي عندها عيال….اكثر من الخفيفة يلي ما تتحمل الا نفسها….

ليش ما تستغلن هالايام او الويكند وتخربشين مني مناك الين ما تضبط وياج… اذا عندكم بنات متطوعات صغار… ويا كثرهم ما شاء الله… حنيهم مرة ومرتين وثلاث… وجربي تحنين نفسك…ف الاعتماد على النفس فضيلة….

انا بديت اليوم.. وتحنيت … يعني راضية شوي عن مستوى الخربشات بس أكيد المرات الياية بتضبط وياي و بتكون مسكة المعصار والرسم سهل ان شاء الله….
ومن اخلص بمسك بنتي وبحاول ارسم لها … فديتها من الحين مسلمه ايدها لي… وان شاء الله ما يحتاي للحناية تدخل بيتي … بحاول اسوي كل شي بنفسي….

بالنسبة للحلويات والسويت…. نسبة إبداعي له تقريبا70 ٪ ويوم ليلة العيد دوم تستوي الأزمات لنا وزحمة الطلبيات تكون فل…. يعني ساعات يكون في اعياد بدون حلويات …. والحمدللهً من كم عيد قمت اسوي للبيت وما أخذ من برا…..

مب بخل… لا والله … ولله الحمد حالتنا ميسورة… بس زين الواحد يذوق نفع ايده…. صح ولا انا غلطانة….

وحاليا افكر أخذ لي دورة خياطة بالبيت اذا امكن…. بخاطري اسوي شي مميز لي ولبنتي… لان ساعات الخييايط يقهرون الواحد ويسون العجب بالموديلات يلي تطلبها منهم…. الصدمة ثم الصدمة ثم الصدمة….

خلصت يلي عندي….. يلا دوركن الحين …