نحن الحين قاعدين نختار اطقم الحمامات الله يعزكم للبيت كله والارضيات والسيراميك
بصراحه دوخة راس
بس حبيت اكتب لكم عن تجربتي للحين بس بالاختيار لانني للحين ماجا وقت التركيب
بصراحة دوخه صار لي شهر ماخليت صورة حمامات بالانترنت الا وشفتها وفكرت فيها وحطيت افكار معينه لكل حمام عندي خاصه ان المطلوب عندي تقريبا 9 حمامات غير حمامي الشغاله والحارس
المهم بالبدايه اخترت وسالت عن افضل الماركات العالميه للادوات الصحيه وهي
Ideal standards
durvit
twiford
roca
هذا اللي اذكره حاليا بس وايدات اهم شي الصيني مو بالليسته لانهم مايمدحونه وهذا بيت العمر
انا من ابوظبي ووكيل ايديال ستاندردز هو سلطاكو اسعاره غاليه وخياراته جدا كلاسيك ومحدوده
وانا قررت احط في غرف النوم التواليت المعلق اللي يسمونه wall mounted يعني اللي مرتفع عن الارض ومعلق بالجدار ويكون خزان الماي مدفون بالجدار وراه
هذا انظف بوايد فقررت اركب هالنوع في كل غرف النوم والنوع العادي في المجالس لان ماعليها ضغط زياده مثل باقي الغرف
وعلى فكره الماركات العالميه كلها فيها من نفس الموديل النوعين المعلق و العادي بس طبعا المعلق اغلى عن العادي
عقب لفيت الشركة المتحده وهو وكيل الماركة الثانيه دورفيت وهي ماركة المانيه عالميه ممكن تحصلونها بالانترنت وايد عجبتني
وايد موديلات واسعارها وايد افضل عن الاولى وعندهم معلق وعادي
وحصلت عندهم انواع راقيه جدا من السيراميك ومنهم ماركات عالميه مثل فالنتينو واعتقد انه وكيلهم والاسعار بين 48 و 300 درهم
وعنده جميع انواع السيراميك والبورسلين وعنده نوع من السيراميك مايتفرق عن الباركيه لداخل البيت ناويه اركبه لصاله المعيشه المفتوحه باذن الله
وعندهم مدير المعرض فنان بتوزيع السيراميك بالحمام ويساعدكم ترتبون الديزاين المناسب
المهم اللي ابي انصحكم فيه يوم تختارون سيراميك الجدران وحبيتوه يكون مميز ومن الفخم تختارون بالاول اللون الساده ويكون سعره مناسب انا اخترت ابيض ساده لحمامين عندي واخترت نوع ثاني فخم غالي ومميز واختار منه بس الجدار اللي ورا المغسله مثلا ويكون التركيب بطريقه مميزه وممكن تختارون فاصل مناسب افقي او راسي
وللمجالس انا اخترت فواصل مذهبه او مفضضه حتى تعطي انطباع فخم
انا ماحب الحمامات الكلاسيك فاخترت لكل حمام ديزاين مختلف
ولغيت البانيوهات من كل حمامات البيت لان ماحد يستعمله عادة ولاهو عملي واستبدلته بشاور عملي اكثر وماياخذ مساحه كبيره ولغيت الله يعزكم البيدي فكل حمام عادي من غرف النوم خليت فيه بس مغسله وتواليت و شاور وبسسسسسسسسسسس
اما الماستر فبالاضافه للسابق بحط ان شالله جاكوزي بس للحين مااخترته لاني حصلته وايد غالي للحين وماناسبني ولاواحد من اللي شفتهم
يوم تروحون تختارون السيراميك تاخذون معاكم خرايط البيت وتشرحون للبائع وين تبون تركبون كل نوع واي صوب بيكون بالضبط وتخلونه يكتب عالمخطط نفسه
انا رسمت كل حمام بيدي وحددت كل جدار شبيكون عليه اي لون وحددت حتى لون كاونتر المغاسل لكل حمام
الافضل تختارون من محلين او اكثر وتخلون كل محر يقدملكم عرض وعقب تشوفون وين ناسبكم السعر والعرض وتختارون من كل محل اللي عجبكم عنده
اتمنى اكون افدت البعض بتجربتي الاوليه هذي والله من اخترت حسيت هم وانزاح 
الباقي الحين السيراميك او الجرانيت للغرف الله يعين
اتمنى كل وحده مرت بتجربه مشابهه او عندها خبره تفيدني وتفيد الباقيات بهالمجال ونفيد بعض
و تجربتج افادتني وااايد
نصيحه الاختيار يكون لحمامات غرف النوم و صاله المعيشه اليوميه لانواع عمليه وتتحمل الاستعمال اليومي
انا الموديلات المبتكره والجديده انا ماافضل استعملها لان هذا بيت العمر وماراح ابدل الحمامات عقب سنه والا ثنتين ممكن احط موديلات افخم واشكال تناسب المجالس بس ماتتغير موضتها بعد مده
انا الحمدلله الاسبوع الي طافت خلصت الحمامات ..
و الاريضة مادري محتارة فيهن … ان شاء الله موضوعهن مب صعب لاني ناوية احط جرانيت نفس الشي للبيت كامل ..
بس الحمامات هم وانزاح .. وافتكيت منهن وان شاء الله يطلع شكلهن غاوي….