محتاجة مساعدتكم وياريت ما تبخلون علي وبدعيلكم من كل قلببببي
علاقتي بريلي وايد وايد سطحية خاصه اني حاطه وايد مواضيع قبل اشتكي من اسلوبه واطباعه اللي ما احبها
قبل فتره (تقريبا شهر ) انفجرررررت وماقدرت اتحمل اكثر تميت اصيح عند امي وقلتلها كل اللي ف خاطري وقالتلي لو ماتعدل وياج تمي عنا بس حسيت لاا ابا اعطيه فرصة واباه يتغير ،، خاصه اني كل مره اتم حاطه ف خاطري وما افضفض له ولا اقوله شو اللي يضايقني منه .. يعني من الاخر يتم قلبي متروووووووس عليه وفجاءه ع شي تافهه انفجر واسوي سالفه وياليت عنده لاااا عند امي ولا اختي
من عقب هالشهر ومن عقب ماخبرت امي ،، قلت خلني اصارحه واخبره بكككككل شي واقوله اللي ف خاطري يمكن يتغير او يمكن هو مب حاس ع عمره وع اللي يسوويه معاي
طبعاااااا سويت مناحه ويلست اصيييييح صياااح هههههه لدرجة كنت اتكلم وياه ويالله يالله يفهم مني الكلام ( نفس الياهل يوم يصيح ويتكلم ههههه ) عاد كككككككل اللي استوى وياي ف سنتين قلتله اياه وانصدددددددددم من واااااايد اشياء وقال انتي تفسرين اشياء من راسج وانه هو مووول تفكيره مب جيه
لا واللي قهرني اكثر كان معصب وانا اقوله اللي ف خاطري لانه منصدم وتم يقلدني وانا اصيح واتكلم 
قمت عنه وسرت حجره ثانيه اصيح ههههه
المهم من احححححين ابا اغير حياتي وياه
خاصه انه هو بدا يتغير و واااااااااايد بعد وها الشي حسيته خلاني احس بشي غيررر ( شي حلوو .. لاني اول مره احسه وياه ) بس بعد احس في اشياء اباه يغيرها..
الخلاااااااااااااااااااااااااااااااااصه من ها كله
انا ما اقوله كلام حلو .. و احس استحي اقوله واستحي امدحه مع اني بكمل سنتين وياه بس قلتلكم علاقتنا وايد وايد سطحيه ..
لو كان الكلام بمسج عادي بعبر وبقوووول كلام احلى عن العسل بس فيس ٢ فيس مستحيل ما اقدر
ثاني شي ابا احس انه يغااااااار علي .. مول ما يغار لو امدح اي ريال قدامه يزيد ف المدح وياي 
مايقولي شو لج فيه او مايزعل ليش تتكلمين عن ريال او اي شي من هالقبيل
ابا احس بغيررررته 
يعني هو عادي يخليني اتعامل ويا ريايل وعادي يخليني ف محيط كله ريايل مابيقول شي والحمدالله ها من الثقة و وايد بيقولون لانه واثق فيج بس بعد الحرمة تبا تحس انه شي ريال يغار عليها ومايبا حد غيره يتعامل وياها
احس بعد فرق العمر وايد وايد وايد مأثر ،، هو اكبر عني ب ١٠ سنين والفرق وايد كبير اهتماماته غير اهتماماتي ،، مايحب يتابع الموضه عكسي تمام ،، مايهمه مظهره عادي اهم شي هو عايب نفسه بس انا ماحب جيه لازم يكون ع سنقه ١٠ 
بس هو مايهتم مب شي ضروري عنده ،،
يعني مثلا انا اغبط حميتي ( الله يسعدها ويهنيها يارب ) هي وريلها كيف ،، هي بنفس عمري (٢٠ سنه) وريلها اكبر عنها ب ٣ سنين ،، عايشين حياه شبابية هو يهتم بعمره من نادي وغيره ويتنقى لها ملابسها ،، لو ماعيبه شي فيها يقولها فلانه سوي جيه انا يعيبني جيه ،، غيررر ريلي تماما خاطري ريلي يوم ايني يقولي البسيلي اللبس الفلاني ولا انا يعيبني يوم تسوين جيه احس مووووووووووووول مافي هالشي انا احب جيه هو مايهتم… كيف ممكن اغيره
ادري وايد وايد وايد طولت عليكم بس احس ها الاسياء مضايقتني واتمنى ماتملون وتردون علي 
انتي ظهرتي عيوبج من قلة كلام ومدح والريال طبيعي بياخذ من نفس اسلوبج مع استمرار الحياة امبينكم..
شي وايد مؤسف انج امخليه حواجز امبينكم بدليل انج ما اتصارحينه بلي فداخلج واتزيد المشاكل امبينكم
الصراحة مافي اريح منها..وهي الباب الي بيسد الثغرة في حياتج
حتى لو اتعلمين نفسج عليها اشوي اشوي..
اذا ماترومين تقولينها فالويه قوليله بالمسجات
قوليله فورقه وخليه يقراها
قوليله انتي ليش تتمشكلين وياه وانه من اهم مشاكلنا هي الصمت وعدم المصارحة
ارد اقولج ابدي بتغيير نفسج
عشان تستمر حياتكم صح ,,وعقب فكري بتغيير اطباع زوجج
والله يسعدكم ويهنيكم
لا تستحي من زوجج , هذا حلالج .
حاولي أنج ما تشتكي من زوجج لأهلج لأنه طبيعي الأهل بيشيلوا في قلوبهم عليه غير أنج بتسببي لهم الحزن . حاولي تحلي مشاكلج بينج وبينه وبس.
بالنسبة للبسه وشخصيته وأسلوبه , ما تحاولي تقارني بينه وبين أي ريال ثاني , كل واحد مختلف ولا تصدقي اللي تشوفيه أو اللي تسمعيه من الحريم عن حياتهن الزوجية وعن كمال وجمال تصرفات أزواجهن , تراه مب كل الكلام صحيح , مرات الظاهر شي والواقع شي ثاني .
ضحكتيني يوم قلتي ماله إهتمام بالموضة , أختي بالعكس هذه نقطة إجابية , الريال الحقيقي ما يهتم بهذه التوافه ! مادام ملابسه نظيفه وهو نظيف ومرتب خلاص هذا هو المطلوب . بالنسبة لأنه ما يغار عليج , ما أعتقد أنه ما يغار عليج , بالذات لو كان ملتزم بدينه ويصلي ويخاف الله أكيد بيغار عليج وأنت حاولي قد ما تقدري تبتعدي عن الإختلاط , مب لشي لدينج أختي , علشان رضى الله سبحانه وتعالى . وقولي له بصراحة : أنا أستحي أروح المكان الفلاني بروحي كله ريايل .بس هو أكيد واثق فيج . لا تحاولي تثيري غيرته ( وهذه نصيحة ) لأنه غير إنج يمكن بترتكبي محضورات بمدحج للريال الأجنبي عنج , فيمكن تولدي الشك في قلب زوجج وتفقدي ثقته, وفقدان الثقة بين الزوجين صعب جداً .( وحدة بعد قالت زوجي ما يغار على وحضرتها بكل هبل سمعت كلام اللي قالوا لها ثيري غيرته , وبدل ما تروح الدوام طلعت حضرتها ويا ربيعتها لمكان هو قايل لها لا تروحيه ,وكان يتصل فيها علشان موضوع وما ردت عليه فأتصل بيكلمها على الدوام , وخبروه أنها ما داومت اليوم! المهم كبرت المشكلة وفي الأخير طلقها وهي تحبه .! الحين أعترفت بغلطها وندمانة ولكنه بعد فوات الأوان .( هذه القصة واقعية وصارت مع الأسف من قريب).
بالنسبة لملابسج وأنه ما يختار لج , ليش تشوفيها نقطة سلبية ؟ يمكن هو عاجبنه لبسج ! .
وبعدين معظم الريايل ما يفهموا في لبس الحريم ولا يعرفوا يختاروا لهن .وأنت عندج حرية اللبس , يعني ما مقيدنج بلبس معين وموضة معينة .
أنت يوم تلبسي لبس جديد , أسأليه شو رايك ؟ حلو ؟ عاجبنك ؟
روحي أنت وياه السوق وشوفي لج ملابس وخليه هو الي يختار على ذوقه , أو مثلاً لو بتروحي بدونه , قولي له: أبي أشتري الملابس الفلانية , شو الألوان اللي تحب أختارهن ؟
أختي طولت عليج , ولكن أتمنى يكون كلامي له فايده وينفعج .ربي يسخر لج زوجج ويسخرج لزوجج.آمين
الغالية اول شي انتي ماراح تعيشين اذا بتبدئين حياتج بالمقارنات
مب كل وحده تزوجت ريال اكبر عنها بسنه يعني نفس مستواها التفكيري ترى في شباب تفكيرهم شايب
ونفس كبار السن وواحد من اخواني شيه تفكيره اكبر عن تفكير الوالد حتى ويا عياله وحرمته والله يعين زوجته ,,
بس هيه عادي تلبس وتكشخ اهم شي ترضي نفسها وتكون باحسن صورة مابتزعل وتضايق عمرها والله عشان يختار لها اللبس
او يمدح بلبسها المهم الثقة فديتج عندج ثقة بنفسج وبأخلاقج خلاص حق شو تتريين يغار عليج لانه واثق من اخلاقج
باللبس اللي تلبسينه يكفي ذوقج ورايج مب شرط نلزم الريال يختار حتى لبسنا ويتحكم باذواقنا ,,,
الواحد يفكر بعقل ويعرف شو يعني الخياه الزوجية وشوهو الاستقرار ,,وترى الحياه في اهم من اللبس والكشخة وراي الريال
الاحترام الثقة الصدق وااايد اشياء لازم تكون بديله عن هالتفكير اللي نفكر فيه
ولا تقارنين الاخلاق والاسلوب والتعامل بالعمر في شياب ماخذين بنات صغار اصغر عنهم 30 سنة ومرتاحات فديتج
ولاتشوفين حيات اي وحده ظاهريا وتقولين عايشة بسعادة ترى البعض يمثل عشان يعيش وعشان يثبت لغيره انه مرتاح
وهالنوعية حياتهم لغيرهم يفكرون كيف يرضون الناس
…
والله يجمعكم ع الحب والسعاده والخير يارب
عادي ليش تغيرينه ..
لو انا بدالج مفتكه ..
لا ريل يزن علي اهني ريال و اهني شباب و لا ما بروح بليل كله شباب
و لا يخرب لي مزاجي و يقولي ليش ما تلبسين جي و ماعرف شو الحمدالله ريلج عايبنه الي تلبسينه خييييير و اللله
بادليني هههههههههههههههه
في سورة الرعد: إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ[الرعد:11]؟
ف مبادره حلوووة منج و هذا الشي الاساسي اذا تغيرتي كل شي من حولج بيتغير للاحسن ،، وبعدين فديتج احسن انا اللي كاتبه الموضوع هههههه مش انتي ،،،، انا كنت مثلج بالظبط 100 % والله عاني .
من كلامج و اسلوبج امبين انج صغيره وقليلة تجربه في امور الحياه وشفتي روحج انتي >> في النهاية بتطلعين انسانه روووووعه في قمة المعنى (الحياه مدرسه ) اذا ما غلطتي فيها ما تعلمتي صح ولا ،،، فالحياة تجارب وكل المتزوجين يمرون مراحل هاي في حياتهم
فديتج وامبين ان ريلج عاقل ورزين في كلامج اللي ذكرتيه أنه (
لا واللي قهرني اكثر كان معصب وانا اقوله اللي ف خاطري لانه منصدم وتم يقلدني وانا اصيح واتكلم قمت عنه وسرت حجره ثانيه اصيح ههههه )
بالنسبة للامور اللي ذكرتيها : علاقة سطحية ، المستحى ، قلة الكلام >> حبيبتي هاي امور طبيعية تحصل بين المتزوجين اليداد وبعدين انتي حرمته طبيعي هاي الاشياء تكون في بداية حياتكم بشطارتج انتي تقدرين تكسرين الحواجز
الغيرة
الريال طبيعته غيار على اهل بيته وهاي اصلا فطرة ة غريزه موجود في الريايل >> يمكن الريايل اللي مدحتيهم من هلكم فطبيعي مايغاااار بس لو من برى جوفي ردة الفعل اللي بتيى منه
فرق العمر
الريال مايعيبة شي في عمرة كل ماكان اكبر من الحرمه كل ماكان اكثر مسؤوليه و احتراما ورقيا في الحياة و اهم شي فرق العقول مش فرق الاعمار وهذا نصيب فديتج
الموضة
هههههه الله يسامحج الموضة من اهتمامات الحرمة و الريال تلقينه يهتم في السياير والعزبة و ربعه ولكل منا في الحياة له اهتماماته الريال شي والحرمه شي عرفتي فديتج
المقارنة
حبيبتي حياة كل حد منا تختلف , بانماطها واشكالها و اوضاعها و شخصياتها وبيئتها و نفسيتها وعادتها و تقاليدها
ف لا تراقبينهم كيف عايشين (من راقب الناس مات هماً) خلي من حياتج بصمة وخلي لحياتج اولويات للطلعه ، للمه ، للسوالف للعزيمه الخ يعني سوي اكشنات يعني عطي لنفسج اهمية و لريلج اعزميه على بيت هلج أو على مطعم ، اطلعو برى للشوبنق او تتمشون على الكورنيش ، سوي بارتي صغيره ، يعني غيري حياتج من الروتين اللي انتي فيه كتجديد
كل مريتي فيه و ذكرتيه شخصيا ينطبق على من شخصيتج و شخصية ريلج وصدقيني ريلج طيب لو حد غيره جان شجفتيه يواااقع ويصارخ و يطلع من البيت ليش لان مافيه اسباب
*وعليج يا ختية بارك الله فيج تتحلين بالصبر و تتحملين عقبات الحياه و خليج مع ريلج في الحلوه و المره ،واكسبي قلبه ، ولاتشتكين لحد بمشاكلج *