أحس بديـنا نخسر بعض ! رعاية الاطفال

ما احب اتكلم عن مشاكلي ولا اشكي بس قلت يمكن ارتاح لو كتبت ..

بنات انا معرسه من اقل من سنتين وعندي نونو .. ريلي من الملجه وهو طيب معاي .. من ما اول ما عرفته وانا اضحي باشياء مهمه لكل بنت اضحي لانه كان يقولي بعوضج بعدين وبعوضج بعدين .. كنت استانس لاني احس اني اساعد ريلي مع العلم انه حالته الماديه اكثر من زينه وهو ابد مب بخيل ..

بعد العرس بشهور كانت ايامنا عسل يحبني بجنون مايرضى علي ولا بكلمة يخاف علي طول الوقت مسجات وطلعات حسيت انه صدق يستاهل اللي سويته عشانه .. حملت وزاد خوفه علي بس على الشهور الاخيرة ف الحمل بدأ يتغير ويندم لانه عودني انه دوم عندي وعلقني فيه .. بدأ يطلع وايد وايد تمر ايام ما اشوفه الا وقت الرقاد بس وايي وهو تعبان ويرقد .. لا تقولون عنده شغل او مهموم لاا كان يطلع ومرات يطرشلي مسجات بصور للاماكن اللي رايحنها .. كنت ازعل بس بنفس الوقت اقول عادي احسن يطلع لاني تعبانه وايد وما اقدر اجابله اصلا .. ربيت وكنت تعبانه ف تميت اكثر من اربعين يوم بيت اهلي كان يزورني بين فتره وفتره بس مب وايد مع انه هو وايد عادي مع اهلي .. وايد كنت مشتاقه لرجعتي للبيت عنده وتوقعته مثلي .. بس يوم رديت كان مثل ما خليته فونه استوى له رقم سري و يطلع اسباب تافهه عشان يطلع ..

صرت اذا احتاج لو شي وايد ضروري لازم احن واحن واقوله مليون مرة لين ما يرضى يوديني .. وكل الكلام اللي كان يقوله والوعود ما شفت منها شي .. قعدت معاه اكثر من مرة يقولي برد مثل قبل واحبج ووو ….. وانا اقتنع واستانس بس يومين ويرد على حاله .. احترت معاه وايد يقولي كلام يجرح بعدين يقول استهبل بس مايرضى انا اقوله ولا كلمه .. يعرف اني مضايجه يخليني اصيح وهو عادي عنده يرقد وينش الصبح مبوز ومعصب علي !! .. تمر ايام بعدين نفس كل مرة بيب لي ورد ولا عطر ولازم ارضى واضحك واستانس واذا ما رضيت بيعصب اكثر !! ..

تغير وايد .. وانا ما اتحمل هالحياة .. مرات افكر اريح عمري واقوله طلقني قبل لا يصير عندي اكثر من نونو و اوهقهم معاي بس بعد احس يمكن ابوي وامي يتضايجون و ولدي ما اباه يضيع !!

بنات لو اخبركم عن التفاصيل بتنصدمون كيف انا متحمله هالعيشه !!

وخصوصن ان بينكم طفل