شحالكم عساكم بخير ..
اممممممم بسم الله ، الموضوع ومافيه دار نقاش بيني وبين زوجي ، والنقاش كان انه مقصر ( مع حرمته الاولى وانا عاطني حقوقي وزود ) واللي ملاحظ هالشي اهله واللي حوله .. المهم لاتقولون انتي اكيد فاره مخه عليها وانتي وانتي ، والله انا مالي اي ذنب انا من الاساس ما اعدها موجوده في حياة زوجي ولا حاسبه لها حساب هو ريال ويعرف كيف يعدل وانا عادمه وجودها في حياتي عشان ما ألوع جبدي ولا جبده بطاريها ولا اتم اقارن سويت لها وما سويت لي يعني كل وحده لها حياتها مع بو العيال .. المهم ريلي يفتح لي قلبه لو كان بيطري حرمته الاولى انا اسمع واخفف عنه بس ربي شاهد عليه اني ما احرضه على اي شي .. ماعلينا ريلي فتح قلبه وتم يفضفض ويبين الاسباب ليش هو مايل لي انا اكثر من الاولى وبينها لاهله و اللي حوله ،، بس قال شي انا خوفني وايد وادعي الله ان ما ايي هاليوم اللي اسمع هالشي ولا اعرف عنه اللي قاله ( قال حرمتي الاولى ماخذنها عن حب وصارت بينا عشره 9 سنين يمكن تم حبنا لين اول سنتين بس عقب صار احترام وموده بس الحين اعتبرها مثل اختي ومشاعري اتجاهها ك اخت لا غير لدرجة غيرتي واهتمامي فيها مثل اختي ما ينشغل بالي عليها وايد ولا احاتيها ولايهمني اللي تسويه لانها اختيه ) ..
انا اللي صدمني يعني زوج و زوجه علاقة اخوه بينهم شي وايد صعب ..
المهم الله لا يغير على كل زوجين ولا يغير عليه وعلى زوجي ويخلينا لبعض ..
الاكثر اهميه عدة اسأله ؟ ( شو شعورج اذا عرفتي من حد ولا من زوجج انه يعتبرج انتي ك اخته ؟ شو بتكون ردت فعلج ؟ بتفكرين بالانفصال ؟ ولا بتقولين شعور متبادل ؟ ولا بتحاولين تردين الامور لمجاريها وتغيرين من شعوره )
مودري الموضوع وايد شاغل بالي .. نصيحه خواتي ديروا بالكم ع رياييلكم واسعوا لاي شي يولد الحب والموده بينكم ..
تحيإآأتي : إآأحساس نمله
الله لا يغير عليكم أختي والله يسعدج مع زوجج.
العلاقة الزوجية مهما كان فيها من حب مشتعل في البداية سواء كان قبل الزواج ( وأنا ضده) أو بعد الزواج إلا أنه لازم هذا الحب بعد فترة بيهدأ ما بقول بينطفي ولكن أقول بيهدأ وبيخف وبيتحول لمودة ورحمة ويكون فيها إحترام وتقدير ويتحول الزوج الزوجة لصديق صديقة مقربة وهذا الأهم والأبقى من علاقة الحب الملتهبة الغير مستقرة والمزاجية .وممكن توصل العلاقة بين الزوجين جزئياً لمرحلة أنهم يحسوا أنهم مثل الأخوة يمكن يوم تطفي جذوة المشاعر بينهم بس ممكن ترجع وتشعل لو الطرفين حاولوا يشعلوها من جديد . هذا رأيي المتواضع .
هاي حال الدنيا … وممكن تنقلب الاحوال ويصير يتكلم عنج بنفس اسلوبه الحالي
ماكسر مياديفج لكن خفي علينا وايد تتكلمين عن زوجته بصورة مو حلوة
وانج انتي البيق بوس
خلاص درينا ريلج ما يعدل ومقصر بحرمته ومش معطيها حف الفراش
لنه مو قادر اصلا يغطي حرمتين هذا هو السبب الحقيقي
ولنه مايخاف الله فصار يقصر لنه لو يخاف من الله عزوجل
مارح يقصر قدر استطاعته
اعقلي ياحساس نمله … خلاص اعقلي واثقلي واشغلي وقتج بعيد عن زوجج وزوجته
يصف العيال الي خلفتهم منه وبقول للي موصل لي الخبر شوف نتائج احساس الاخوة الي بينا ههههههههههههههههههه
وبحاول ارتب عمري واخليه غصب يغار ويرد غيرته علي كزوجه لان الريال اذا شاف حرمته حلوه وممكن احد ثاني يطمع فيها غصب عنه بيغار
وملكة الاحاسيس مرسي ع المرور بس انا ماذكرت اي شي عن حرمته الاولـى في موضوعي هذا انا تكلمت عن زوجي وشعوره وبينت انا شو قصدي من الموضوع .. وموضوع اشوف نفسي انا البيق بوس هيه انا البيق بوس في حياة زوجي في شي ياخي كيفي انا شو اكون في حياة زوجي وبعدين شو ياب طاري الفراش الحين استغفر الله مب كل شي الفراش اذا قصدج قصوره الفراش .. والحياه الزوجيه مب بس فراش للعلم يعني ،، استغفر الله الناس ماعرف كيف تفكر الله يهديج ان شاء الله ..
ملكة الاحاسيس حبوبه هاتيلي موضوع واحد من مواضيعي ان طريت زوجة ريلي الاولى بشي مب زين 
ودامه رمس عن حرمته جي ف توقعي يي يوم ويرمس عنج انتي جي
لانه اذا فعلا يحترم حرمته الاولى ما كان بيرمس عنها لا ب خير ولا شر
جدامج او جدام اي حد ع الاقل يحترم العشره اللي بينهم، اسمحيلي اختي
ع صراحتي، بس حرمته ما تستاهل ريل شراته مهما سوت اذا هو مب
عايبتنه العيشه وياها، يطلقها ولا انه يرمس من وراها ويقول انه يعتبرها
اخته وهناك هي بعدها تحبه يمكن شرات قبل واكثر (الحرمه ان حبت ف ما يموت
هالحب حتى لو كرهت الشخص ما بالج لو كان ريلها) اقلها امساك بمعروف
او تسريح بإحسان!
الحب بين الزوجين ممكن انه يتحول لاحترام وموده مع الايام
وهالشي ف نظري اهم بكثير من الحب نفسه لانه العايله تكون
متماسكه ومتعاونه دام شي احترام بين الافراد وبالتالي تنبني
معزه خاصه لكل فرد ف هالعايله وممكن تتحول لصداقه وهالشي
جيد بعد ممكن انه يجدد الحب من اول ويديد لكن اخوه وبين
زوجين ! لا تعليق
الله يهدي اليميع . .