لكل العرايس كيف تخترين شبكة العرس كل الي تحتايين تعرفينه عن الذهب والألماس جمال الامرات

2- وزن الذهب بالقطعة
انزين طبعا اي قطعه لها سعر ثابت ما تقدرين تساومين عليه الي هو سعر الذهب بسعر اليوم فقبل ما تسيرين اي محل ذهب تشترين اي قطعه او تبيعين لازم تدشين النت وكتبي اسعار الذهب بالامارات اليوم
وبتطلع لج لسته مثل هذي

ومن يعيبج شي لا تسئلين البايع بكم هذي على طول بيني له انج عارفه عشان ما يضرب عليج من البداية وتتعبين وانتي تكاسرينه وما تسئلينه الا هالسؤالين عيار كم وكم وزنه بس
الحين نفرض انه عيار 22 وقال لج وزن القطعه 10 غرام تسيرين لليستة الي هي سعر الذهب اليوم وتضربين 10 في سعر عيار 22
10*159.8 = 1598 درهم بيكون هذا سعر صافي الذهب الي بالقطعه وهالسعر مستحيل تاذخين القطعه باقل منه
ملاحظة مهمه بعض مراكز الذهب مثل سوق الراس او السوق المركزي بالشارجة البلدية تسمح للمحلات برفع سعر الذهب ب10 او 25 درهم عشان الاجار فبتلاحظين انه سعر الذهب بالمركز هذا اعلى عن سعر الذهب بالجرايد والنت عشان انا غلطت هالغلطة مرة وحسيت الهندي كان بيذبحني عقب فهمت هالشغله فممكن انج تسئلينه عن سعر الذهب اليوم لعيار 22 كم وجيكي انتي بعد لانهم مرات يستغفلونا ويزيدون 10 درهم فوق المسموح
3 – المصنعية
المصنعية هي عبارة عن شغل ايد الصايغ وربحه من بيع قطعه الذهب هذي وطبعا هالشي الي ممكن البايع يرفع السعر عليج ويزيد من سعر القطعه وتشترينها غااالية ولما تبيعينها بخساره فانتبهوا
حسبي بروحج سعر الذهب كم وعقب قولي له كم حسبت لي المصنعية هنا طبعا الي كانوا يشترون ذهب وماكانوا يتبعون هالطريقة راح ينصدمون بحياتهم بتشوفون الارقام الخيالية وضرب بالاسعار فوووق يعني عادي سعر القطعه يسوى مثلا 1500 درهم وهو طلب في بيعها 5000 درهم عادي وايد فهو ماخذ هالمصنعية وشغل ايده 3500 درهم وهالسعر خيالي وضعف سعر الذهب
فابدي اكسري راسه عادي وصلا من يشوفج انج فاهمه راح يقلل من المصنعية
مصنعية الخاتم ما تزيد عن 200 درهم
والطقم ممكن تدفعين مصنعيته الفين او 3 الاف حسب كمية الشغل والتصميم
طبعا بعض الماركات مثل داماس وبنك شيك ولازوردي يجرجون مصنعية عالية جدا على التصاميم وعلى الماركة والاسم فكل اطقم داماس ياخذون ضعف السعر على المصنعية يعني سعر الذهب بالقطعه 2024 يبيعها عليج ب4000 وهالشي خلاص معروف عندهم من جذا لما تبيعين اي قطع من داماس لازم تذكرين انه من داماس وكل ذهب داماس عليه دمغة وشعار داماس فيعطوج سعر اعلى على الذهب لانهم ما راح يصهرونه بينظفونه وبيبعونها على غيرج

هذاك الجزء كان سهل انج تشترين قطعه كلها ذهب من غير اي فصوص او احجار او الماس الحين الكلام شوي طويل بالنسبة للاحجار الكريمة

4- الاحجار الموجودة بالقططعة

طبعا من الاشياء المهمة الي راح ترفع سعر القطعة هو وجود الاحجار الكريمة فيها ضمن التصميم
الاحجار الكريمة علمها كبيييير ويدرس تخصصات بالجامعات راح احاول كثر الامكان اتكلم عن ابرز الاحجار الكريمة والمعروفة وكيف نحدد اسعارها
الحجر الاول والمشهور وحبيب كل البنات الألماس
على فكرة ترا في الماس سعره اقل عن سعر الذهب فلازم تعرفون هالشي ومعظم الناس الي يبيعون الالماس بالمعارض يكون نوعية ردييييئة وما يسوي الطقم 20 وهو يبيعه ب100 الف لدرجة اني لما سرت اجهز لبنت خالي سالت البايع كم قيراط وشو نقاوته تخيلوا جاوبني بجواب واحد وهو هالالماس بلجيكي !!؟؟ ياعمي روووح شو ابا انا بأصل الالماس
وعلى فكرة هذا الغلط داااير على كل البنات انه لما تسمع الماس بلجيكي يعني خلاص هذا الالماس اغلى شي وهالشي غلللللللط… الالماس مهما كان أصله ومعروف انه افريقيا وبلاد شرق اسيا مثل تايلاند والهند هي اغلى البلدان بالعالم بالاحجار الكريمة والالماسات
من جذا بعض المرات تسترين الماس تشوفينه ما يلمع وباهت ولونه على رمادي وحبه الشوارفيسكي او الزاركون تلمع اكثر عنه
شو لازم اعرف عن الالماس
1- وزن الالماسة
توزن الالماسة بالقيراط وهي وحده قياس الاوزارن للاحجار الكريمة
طبعا كل ما زاد وزن الالماس كل ما زاد السعر

2- عدد حبات الالماس بالقطعه
يعني لما يكون خاتم في قيراط الماس موزعين على 10 حبات بيكون وايد ارخص عن خاتم في قيراط في فصة وحده او حبة وحده الماس هذا بيكون سعره ضو غالي
3- نقاوة الالماس clarity
الالماس حجر عبارة عن كربون تعرض لضغط شديد بباطن الارض وخلال هالعملية ممكن تدخل فيه بعض الشوايب الي راح تاثر على نقاوته بالتالي على درجة لمعانه وبريقه
انقى الالماسات هي FL وهي ترمز لكلمة Flawless وهو الأغلى سعراً طبعا يعني مال بو ملايين وتعني انه هالالماسه خالية تماما من اي شوائب نهائيا طبعا هالالماس مب حقي ولا حقج هالالماس ينحط بالمتاحف وعلى تاج الملوك فقط وممكن مشاهير هوليوود يأجرونه يلبسون مال سعاتين عالريد كاربيت ويرجعونه
اييج عقة الي VVSi الي ترمز الي very very small inclusions يعني شوائي صغيره جدا جدا ما تشوفينها الا اذا كبرتي الالماسة تحت المجهر إلى درجة تكبيرة كبييييرة جدا اتوقه 100 مرة مب متاكده هذا تحصلينه بالمجوهرات الفاخره الي ممكن نحن نشتريها مثل كارتير وفان كليف وبولغاري وساعات الرولكس والاوميغا وغيرها من الماركات المعروفة
عقبه VSi وتعني very small inclusions يعني السوائب صغيره تنشاف على قوة تكبير متوسطه وهاي تستخدم بالمجوهرات المعروفة مثل داماس ولايف ستايل وبنك شيك وبيور غولد
عقبة اييج الاقل نقاوة وبالتالي الاقل بريقا وهو Si وتعني small inclusion وهالنوع ممكن نشوف الشوائب على قوة تكبير بالمجهر او العدسة قوة 10 مرات تكبير فقط لكن يضل ما نقدر نشوفها بعيننا
والاخير I1- I2 وتعني inclusion وهي تشوفين الشوائب مثل نقاط سودة داخل الالماسات وبالتالي يخف بريقه بشكل ملحوظ حتى مرات يصير لونه رمادي من كثر الشوائب
هنا صورة توضح الكلام الي قلناه

3- لون الالماس
للالماس الوان مختلفة حتى الالماس الابيض له الوان بدرجات ولكل درجة سعر معين

هالشي مهم جدا لاخصائي الالماس لانه يوأثر على بريق ولمعه الالماس وممكن نصنف الالماس الابيض حسب لونه من خلال النيون لايت او الليت الاسود الي هو الليت الفسفوري الازرق من تحطينه على الالماس تبرق الالماسه لحجر مشع بللون الازرق
نفس جذا

اما الالماسات ذات الالوان مثل الالماس الازرق والوردي والاخصر فهي من اندر الالماسات وسعرها طبعا عااالي نظرا لندرته اغلى انواع الالماس هو الالماس الوردي
الالماس الاصفر بلون الشامبين الي يسمونه فانسي دياموند متوفر بسعر غالي بس ممكن ناخذه
الالماس الاسود ايضا سعره سعر الابيض ممكن ناخذه

5- بالاخير (تراني هلكت من الكتابة ) هي قطع الالماس
ارخص انواع القطع هو الدائري طبعا هذا تخصص الخصائيي الالماس لانه القطع لازم يكون بزوايا معينة هم بس يعرفون لها

وهالصورة توضح الاشياء الاربع الي لازم تعرفينها لما تشترين اي شي في الماس
1- النقاوة 2- اللون 3- الوزن 4- القطع

اما باقي الاحجار الكريمة من الروبي والزفير والزمرد والفيروز راح اتكلم عليها بعد شوي بس اسير اتريق ^_^

وطبعا بالنسبة لتحديد السعر حاله حال الالماس يعتمد على الوزن والنقاوة والقطع واللون
بالنسبة للاحجار هاي ممكن بعضها يكون معالج حراريا طبعا الروبي او اي حجر اخر لما يكون طبيعي وغير معالج سعره يكون فوق لانه يكون من غير تدخل صناعي

الزمرد
او الاميريلاد
يمتاز بلونه الاخضر الغامج

حجر الزفير
وهو الحجز المتميز بلونة الكحلي وهو الحجر المشهور بخاتم زواج الليدي ديانا الي بعد وفاتها صار نفسه دبلة الاميره كيت

حاله حال كل الاحجار مثل ما شرحت فوق

ايضا حجر التورمالين او الروبيلايت من الاحجار الغالية ايضا ويتميز بلونه الوردي

اما باجي الاحجار منها الازميث البنفسجي الفاتح والتوباز الي ايي تقريبا بجميع الالوان والاكوا مارين فهي من الاحجار الي اسعارها مناسبة نوعا ما غالية بس مب غلاة الاحجار الي ذكرناهم فوق
يبالنا موضوع ثاني عن الاحجار بالتفصيل للي حاب يعرف أكثر
وبس ان شاءالله اكون فدتكم بشي وتعرفون كيف تشترون مجوهراتكم وتعرفون تقييمون المجوهرات والاحجار الكريمة

يعطيج العافية اختي،،،

المشاركة الأصلية كتبت بواسطة ناروتا

مشكووووووورة اختي موضوع حلو وشيق
عن الذهب اعرف هالمعلومات وفعلا يفرررررررق في السعر
لكن عن الاحجار ما عندي معلومات
مشكوورة موضوعك شيق

العفو يا عمري
^_^

المشاركة الأصلية كتبت بواسطة [..دانــة..]

يعطيج العافيه معلومات مهمه جدا

الله يعافيج الغالية

المشاركة الأصلية كتبت بواسطة ام احلى بنات

موضوع حلو و مميز جداً

يعطيج العافية اختي،،،

الله يعافيج حبيبتي