كيكة الجزر.. اللي ما بتجربها بتندم لأنها واااااايد لذيذه!! من مطبخي

المقـاديــــــــــــــــر:

– 1 كوب طحين رقم 1
– نصف كوب جوز مفروم خشن (( أقصد بالجوز عين الجمل ))
– نصف كوب جزر مبشور
(( إما بالمبشرة أو بالمكينة بس بالمكينة أحسن ولا تبشرونه واااااااايد ناعم خلوه ناعم بشكل معقول!! ))
– رشة صغيرة ملح
– 2 ملعقة صغيرة بايكينغ باودر
– نصف كوب زبدة
(( ما يعادل نصف القالب الكبير مال لورباك اللي وزنه أعتقد 454 غرام أو 400 وشوي ))
– ثلاثة أرباع الكوب سكر
– 3 بيضات + 1 ملعقة صغيرة فانيليا

الطريــــــــــــقة:

– دايمًا وأبدًا أول شي لازم تسوينه يوم بتسوين كيك هو انج تفتحين الفرن عشان يسخن، لأنه لو حطيتي الكيك في الفرن وهو مب ساخن كيكتج بتفشل..

– نذوب الزبدة على نار خفيفة وبعد ما تبرد شوي نخلط معاها كل من السكر + البيض + الفانيليا ونمزج الخليط عدل..

– نضيف للخليط السابق كل من الجوز والجزر ونخلطهم عدل في اتجاه واحد..

– ننخل الطحين + الملح + البايكينغ باودر بعدين نضيفهم على خليط الزبدة ونظل نحرك باتجاه واحد فقط..

– يوضع الخليط في قالب الخبز ويخبز في الفرن لمدة نصف ساعة أو حتى النضج..

ملاحظات..

– إذا كنتي بتسوين كب كيك (( كيك الأكواب الصغيرة )) ما بيحتاج لأكثر من ربع أو ثلث ساعة..

– إذا كنتي بتسوين في قالب كبير بيحتاج أكثر..
بس دايمًا لما تسوين الكيك لا تفتحين الفرن أول ثلث ساعه وإلا كيكتج بتهبط..
بعد الثلث ساعة تقدرين تفتحين الفرن تشوفين إذا الكيك مستوي ولا لأ..

ودايمًا خلي أول خمس دقايق حرارة الفرن عالية بعد ما تحطين الكيكة فيه.. بعد الخمس دقايق خليها متوسطة عشان كيكتج ما تحترق..

وبالهنا والعافية

أتمنى تعجبكم وصفتي..
اللي بتجربها تخبرني شو استوى وياها..
وترى المقادير مظبوطة لأني دايمًا أسويها..