بالبداية احمد ربي انه سهل ولادتي ورزقني ببنوته الله يحفظها ويرعاها .. والله يسهل على كل حامل ويرزق كل وحدة تنتظر الحمل آآآآمييييييييييييييين ..
قصتي قصة … كان موعد ولادتي على حسب اخر دورة 27-6 .واعتمد عليه مستشفى الكورنيش
لكن انا سويت اول سونار يوم عرفت اني حامل في الاسبوع الرابع كان محدد موعد الولادة 16-7 في عيادة كرامة العراقية في راس الخيمة وقالت انه ادق واضبط !
يوم وصلت بالحمل للشهور الاخيرة .. تميت اراجع كله مستشفى الكورنيش شافو الجنين اصغر من انه يطلع بموعد 27-6 .. وغيرو هالموعد وحطو 19-7 ..يعني قريب من موعد الدكتورة كرامة ..
المهم ..من نص الشهر السابع تقريبا تعبت وايد ..تييني الام فبطني (مب الرحم) حموضة شديدة وقئ مع الم شديد.. وماتخف إلا بإبر مسكنه ..يعني المسكنات العادية ماتسوي شي..
لين وصلت الشهر التاسع ويوم تييني هالالام جسمي تعود على ابرة المسكن وصار الالم مايخف الا ب3 ابر مسكنه بالوريد !! وبعد فحوصات طلع فيني حصوات في المرارة ولازم اشلها بعد الولادة
ويوم الولادة طبعا انا تعودت على الانقباضات والتقلصات من الشهر الثامن ..واول مادخلت التاسع زادت الانقباضات .. لكن سبحان الله ساعة الولادة حسيت بألام ثانية مررة !!
اول شي في ليلة الخميس حسيت بالم بظهري وهو ويزيد ويزيد..قلت هالمرة بعد ظهري!! صدق اني سكربت!وتمت الالام لين صرت ماقدر اتحملها والحمدالله ريلي كان توه ياي من دوام في الرويس..كنت ادعي ربي اني اربي وريلي يكون عندي مب في الرويس الحمدالله
قلت لبو الشباب ودني المستشفى مع اني كرهته كثر ماتنومت بسبة المرارة ..
وعمتي راحت ويانا تقول اكيد ولادة ..قلتها اي ولادة ظهري يعورني مب انقباضات رحم ! فديتها تنتظر اول حفيدة لها وكل ماحسيت بالم تفرح لوول تحسب ولادة ..لكن هالمرة طلعت صدق ولادة !
تميت طول الليل اتلم من ظهري والغريب انه جهة وحدة بس من الظهر ..الجهة الثانية ماحس باي الم فيها! ..شيكت النيرس وشافت الرحم فاتح 2 سنتي! .. وانتظرو 6 ساعات لين طلع الصبح .. ويت الدكتورة الساعة 7 وشيكت وبعده 2 سنتي مازاد ..مع اني كنت اتالم من جهة وحدة بس من ظهري !
وقلت للدكتورة مب غصب تولدوني عطوني مسكن وخل ارد البيت لوول . قالت هذي ولادة .. قلت كيف ولادة وظهري اللي يعورني..قالت الجنين ضاغط على الكلية وهي اللي تعورج! والمها طاغي الحين لكن يوم تزيد الانقباضات بتحسين بالم الولادة
قلتها دكتورة اذا بحس بالمين الم كلية والم ولادة مابقدر اتحمل!! خصوصا ان الرحم ماراضي يفتح اكثر !!
قالت تبغين ابرة الظهر؟ لا تخافين ابدا مابتحسين باي الم ..
كنت هذيك اللحظات ابغي الفكة .. وتذكرت المشرفة اناناسة كله تربي بابرة الظهر .. قلت يالله حطي الابرة ابا افتك خلاص ماقدر اتحمل..
وعلى حظي الحلو الحمدالله ..يتني دكتورة تخدير عراقية ..خفت انه يكون ريال ..
ووقعت على الموافقة على الابرة .. كانت الساعة 9 .. اهم شي وقت ما تعطيني الابرة اني مااتحرك واذا يتني الانقباضات وقت ماهي تعطيني اخبرها عشان توقف ويوم تروح الانقباضات تكمل تحط المخدر في ظهري
حسيت بشي بارد يمشي فظهري .. الحمدالله ثواني قليلة وراح الم الظهر والانقباضات ..
وعطوني ابرة طلق بعدها عشان ينفتح الرحم .ويت الدكتورة وتوسع عنق الرحم اكثر وفتحت كيس الجنين..وقام ينزل الماي مني ودم ..الساعة 12 يت الدكتورة تشيك وشافت انه فتح 8 سنتي ماشالله
كنت احس الم الانقباضات لكن مب شديدة ..يعني محتملة ..مابا اكون طماعة وماحس مول باي الم..
لكن دكتورة التخدير تمت فوق راسي يوم عرفت اني احس بالم الانقباضات ..حطت قطعة ثلج على بطني ..تمررها ..ماكنت احس ببرودة الثلج .. جسمي مات فيه الاحساس!!.. لين مررتها بمنطقة الحساسة جهة اليمين هناك حسيت بالثلج بس!..وقلتها ان ريولي اليسرى انتفخت وماقدر احركها ..قالت المخدر تركز على جهة اليسار اكثر من اليمين فجسمي .. ونوموني على جهة اليمين عشان ينزل المخدر لجهة اليمين ويقل في اليسار ويصير توازن ..
بس تميت على هالوضعية فترة .. وردت دكتورة التخدير تسألني تحسين بالم الانقباضات ؟ قلتها هيه ..ردت:غريبة المفروض ماتحسين فيها .. ! وتمو ينصحوني اخذ دفعة ثانية من المخدر في ظهري قالو ان الانقباضات بحس فيها عادي لكن بدون الم .. فوافقت .. وحطت المخدر مرة ثانية
راح الم الانقباضات .. وفتح الرحم 10 سنتي ويا وقت الدفع..
ويوم يا وقت الدفع كل ما ادفع فجأة تقبضني المرارة تمسك الدفع ويخترب ..صرت ماقدر ادفع بسبة المرارة !!..هذيك اللحظات الكل توتر وخاف عالجنين لان نبضاته كانت مب مستقرة ..ويبغوني ادفع بسرعة!..قلتهم ماقدر .. دكتورة التخدير قالت ابرة الظهر تاثيرها يكون من على الرحم والكلية لين تحت..
المرارة ماتتاثر بمخدر ابرة الظهر !.. راحو عطوني ابرة العضل اللي على الفخذ.. وبعدها نام الطلق عندي .صرت ماحس بشي ابدا .. وعيوني تغمض وبالقو افتحها .. قامو يغسلون ويهي بماي عشان اصحصح!! والدكتورة حاطة ايدها على بطني عشان تعرف متى ايي الطلق عشان ادفع ..!!!!
.. كانت لحظات صعبة .. لان الطلق ماحس فيه وماعرف متى الرحم ينقبض عشان ادفع 
وكانت ريولي اليسار اطيح من الشبرية وماقدر اشلها ماقدر احركها .. يشلوها ويحوها عالشبرية بوضعية تساعدني على الدفع ..عمتي تقرا على راسي وترش ويهي بماي زمزم ..الجنين نبضاته مب مستقرة
صارو فوق راسي .. 4 دكاترة نساء وممرضةوعمتي كلهم فوق راسي يصارخون يلا شدي شدي
وانا لاحول ولا قوة فيني خلاص منتهية المخدر الاخير عدم الاحساس فيني وارهقني ..
صرخت فيهم الممرضة وقالت لهم سكتو خلوها تسمع شخص واحد فينا مب كلكم تتكلمون فوق راسها! خخخخ .. ادفع بكل قوتي وقتها احاول اركز اني مااهدر طاقتي واخلها كلها على الدفع كاني الله يعزكم فالحمام !..لين سمعتهم يقولون بين الشعر ..هذيك اللحظة مانساها فرحت وتميت ادفع يوم يقولون ادفعي ..لين طلع الراس.. وبالتدريج ربي سهل على وربيت الحمدالله..
اذكر الممرضة قالت يوم طلع الراس تمت بنتي فاتحة عيونها اطالعهم لوول فديتها ..
ربيت الساعة 3 وربع بيوم 24-6 .. وطلعت مواعيد السونار كلها اخرطي !
الاستفادة اللي استفدتها ان ابرة الظهر ممتازة لكن يفضل برايي دفعة وحدة منها تكفي.. وابدا لا تاخذون ابرة العضل وياها ..انا اضطريت بسبة المرارة ,,
الحمدالله سويت عملية اسئصال للمرارة بالمنظار من يومين وان شالله تروح الالامها بلا رجعة.. كانت الالامها فظيعة خواتي واللي جربتها بتحس بكلامي صدق..
واي وحدة فيها حصوات في المرارة ..نصيحة لا تحمل لين تشل المرارة ولا بتأثر فيها بالولادة او في الحمل..الدكتور يوم راجعته عشان يشلون المرارة قال لي في حريم يجهضون بسبتها ! وفي الولادة تأثر بعد..
بنت عمي حميتها ربت قيصري ماقدرت تربي طبيعي بسبة حصوة المرارة !!
احمد ربي اني ربيت طبيعي وبنتي بخير الحمدالله.. الحمدالله
هذي الولادة احسها درس للاستفادة ..كتبت قصتي ..ولكم التعليق واي استفسار انا حاضرة
يارب تسهل علينا
وماا تشووووووووووووفين شر
ومبروووووووووووك مااا يااااج
ربي يبعد عنج كل شر
ويرزقج مره ثانيه بولادات اسهل واسهل ^^
وما تتعذبين فيها ابدا
اشكركم عالمرور والرد والله يسلمكم من كل شرويسهل عليكم يارب
ام راشد
فديتج اشكرج عالدعوة الطيبة والله يسهل عليج وينصرج على من ظلمج