اشحالكم…
هذه بعض صور وطرق لبعض الاكرت اللي سويتها في رمضان وبما اني ما كنت فاضية في رمضان الحين حطيتها لكم… وان شاء الله ينال ارضاؤكم…
الشاورمــــا…
هذه الطريقة عطتني اياها ربيعتي في الدوام جزاها الله الف خير… بصراحة ومن غير مجامله الشاورما لذيذة… وبالذات لما تبرد وتسوينها سندويشات يمي يمي… بس انا من النوع اللي ما امشي بالضبط بالمقادير اللي يعطوني اياها احب اطبخ على البركة فلو سمحتوا محد يسألني كم الكمية لاني ما اعرف…
مقادير خلطة الدجاج:
دجاج صدور مقطع (الصدور اسهل من الدجاج الكامل)
روب
مايونيز
ثوم مبشور
عصير ليمون
زنجبيل مبشور
ملح وفلفل وبهارات
تخلطينهم وتخلينهم في الثلاجة لمدة ثلاث ساعات (كل ما كان اكثر كان احسن,, انا احطهم من في الليل لثاني يوم)
للتجخيز.. تحطين شويه زيت وتحطين الدجاج مع الخلطة في الجدر,, وتخلينه لين يجف من الخلطة.. ويكون جهز عندج الدجاج…
المقادير الثانية:
بطاطا مقطعة مربعات ومسلوقة (خذي بالج ما يحتاج سلق وايد لان مقطع صغار) حطي البطاطا في مقلاه ضيفي عليه بقدونس مقطع صغار او كزبرة شويه ثوم مبشور وعصير ليمون, ملح وفلفل ويكون جاهز
في صحن التقديم تحطين طبقة خس مقطعة صغار.. وتحطين عليها الدجاج، البطاطا، مخلل خيار مقطع صغار, زاد عندي شويه بقدونس حطيته عليه وبعدين حطينا الصلصة…
مقادير الصلصة.
طحينية
روب
عصير ليمون
ماء
زيت زيتون
ملح وفلفل اسود
تخلطينهم مع بعض تذوقيه وشوفي شو ناقصنه وزيديه…
صحتين وعافية…
يتبع؟؟؟
انا اعشق واحب اي شئ فيه باذنجان…
المقــــــــــادير:
باذنجان مقطع ومقلي
بطاطا مقطعة شرائح مقلية
فلفل بارد مقطع شرائح
طماطم مقطعة شرائح
لحم مفروم
بشاميل
جبن بارميزان او شيدر
الطريقة:
تسويين اللحم المفروم بالطريقة اللي تحبينها (انا احمر شويه بصل في زيت، اضيف عليه اللحم المفروم اضيف شويه صلصة طماطم، بهارات وملح وفلفل وشوية ماء واخليه على النار لين يستوي)
تسويين الباشميل بالطريقة اللي تحبينها (انا احط شوية زيت وشوية طحين ابيض اضيف الحليب السائل لين يغلظ شوي اضيف الملح والفلفل الاسود واحب احط عليه جبن شيدر مبشور)
في بايركس ترتبين الخضراوات بالترتيب اللي تحبينه مب شرط مثل ما انا مسوية… (الخضروات تعطي الطبق ريحة وطعم حلو… في ناس ما تحط اي شئ غير الباذنجان واللحم المفروم والباشميل) حطيت الطماطم وبعدين الفلفل البارد وبعدين البطاطا المقلية وبعدين الباذنجان المقلي وفي ناس تحب تحط شرائح بصل (احط مرات) وبعدين اللحم المفروم والباشميل وفي النهاية ارش عليه الجبن.. اغلفه بالقصدير وادخله الفرن لمده نصف ساعة تقريباً انتي شوفيه اذا احتاج زيادة في الفرن زيديه….
[URL=https://www.sez.ae/up2][/URL
صحتين وعافية…
يتبع…
مقادير العجينة:
2 كوب طحين
ربع كوب زيت
كوب ماء
3 ملاعق حليب بودرة
ملعقة خميرة فورية
3 ملاعق سكر ناعم
ملعقة صغيرة ملح
مقادير الحشوة:
نصف كاسة جبن كرافت السائلة
3 ملاعق مايونيز
ملعقتان جنبة بيضاء مبشورة (المالحة)
بيضة
2 ملعقة كزبرة
تخلط كلها مع بعض
(واختياري ممكن تضيفين قطع زيتون اخضر واسوي)
الطريقة:
تخلط كل المقادير ما عدا الطحين في خلاط العصير لمدة 3 دقائق ثم تضاف الخلطة الى الطحين وتخلط لغاية ما يتكون عجينه… تترك لمده ربع ساعة، ثفرد في صينية توضع عليها الحشوة وتدخل الفرن لغاية ما يستوي…
الفطيرة لذيذة وخاصة وهي حارة بس دسمة…
صحتين وعافية…
يتبع….
المقادير:
دجاجة مسلوقة ومفتته صغار
1 جبن شيدر الكبير مبشور (الازرق)
زيتون (يفضل تكون من غير نواة)
ملح وفلفل
بيض وبقسماط
زيت غزير للتحمير
الطريقة..
تفور الدجاجة وتفتت صغار وايد وتخلط مع الجبن المبشور + ملح وفلفل وتخلط لغاية ما يتكون عندج عجينه سهلة التشكيل…
تكورينها وتحطين فيها حبة زيتون وتسكرينها….
تغمسينها في البيض وبعدين في البقسماط وتقلينها في الزيت الحار… لغاية ما تستوي ذهبية… وتقدم مع الكاتشاب او المايونيز و اي صلصة انتي حابتنها..
صحتين وعافية…
يتبع…
انا حاطة طريقتها من قبل في المنتدى…
المقــــــــــادير:
بطاطا مقطعة مربعات مقلية
خبر مقطع مقلي
علبة حمص
مكسرات مقلية
روب
مايونيز
ثوم مبشور
عصير ليمون
زيت زيتون
ملح + فلفل اسود
بقدونس مفروم
الطريقة:
نخلط الخبز والحمص والروب والمايونيز والملح والفلفل والثوم وعصير الليمون مع بعض، نصف البطاطا في البايركس او صحن التقديم نحط فوقهم الخلطة، نرش عليه البقدونس المفروم والمكسرات وزيت الزيتون….
صحتين وعافية…
تم بحمد الله…
^^