سوق مرشد.. نايف.. عكاظ.. مينا بازار وسوق الجمله .. أسئلة لعشاق السياحة

مرحبا صبايا ..

يا مكثر ما اسمع بها الأسواق ولا جد شفتها وسرتها

حتى أسمع انه اكثر السياح من اخواننا الخليجيين والروس الأفارقة مطيحيين في ها الأسواق من كثر ما فيها أغراض من مجاميعو
وأنا وايد خاطري أغامر وأسير وأشوف

ف اللي عندها الخبرة منكم تخبرني:

– شو الفرق بينهم .؟
– شو ممكن الاقي في ها وما ألقى في الثاني .؟
– شو أحسن سوق من بينهم .؟
– كل سوق وين مكانه .؟ قراب من بعض والا لا .؟
– شو أحسن وقت الواحد يسير هناك .؟
– المكان أمان والا لازم نسير مجموعة .؟

أي معلومة ثانيه أكون شاكرة .. وأكيد غيري بيستفيد

انا سرت قبل لسوق نايف بس قريب من سوق الدهب بدبي
فيه كلشي الصراحة جلابيات عبايات نعال شنط شو لي تبيه موجود هناك

مشكور حبيبتي ..

وين سوق الذهب وايد زحمة آظن

سوق الدهب فمنطقة نايف بعد الويكند وايد زحمة بس روحي وسط الاسبوع احسن

سوق الذهب تقدرين تسيرينه الصبح ما يكون وايد زحمه بس قبل لا يزيد الحر ،،

هلا اختي ….

–

شو الفرق بينهم .؟

سوق الجملة كل شي ينباع بالجملة .. يعني بالدرزن … والاغراض تكون وااااايد ارخص عن المحلات العادية … وكل اللي تبينه بتحصلينه .. خردوات .. جلابيات .. اكسسوارات .. قطع … شيل .. عطور .. ساعات .. كل شي موجود …
سوق نايف .. سوق عادي عندهم كل شي جلابيات . نعل . اكسسوارات . يعني سوق عادي واسعارهم نفس كل مكان
سوق عكاظ هو نفسه سوق الجملة

– شو ممكن الاقي في ها وما ألقى في الثاني .؟

كل الموجود بتلاقينه فالمحلات لكن ممكن الاسعار تكون ارخص عن المحلات العادية

– شو أحسن سوق من بينهم .؟
من وجة نظري كلهم شراة بعض .. مافي فرق بينهم … بس يتحدد اذا انتي سايرة تاخذين شي معين ..

– كل سوق وين مكانه .؟ قراب من بعض والا لا .؟

كلهم جريبين من بعض بس غالبا يكون السوق زحمة وصعب تحصلين باركنج جريب .. الا اذا وصلتي الساعة 8 الصبح .. او اول الظهر عالساعة 3 .. بس سوق نايف في بناية باركنات جريبة منه … ترومين توقفين سيارتج وتنزلين له …

– شو أحسن وقت الواحد يسير هناك .؟

اي وقت تحبين تسيرين عادي .. يفتحون الصبح من الساعة 9 لين 2 .. والمساء من الساعة 3 لين 10 .. وفي محلات ما تسكر طووول اليوم … يفضل تسيرين ايام الاسبوع العادية .. الزحمة بتكون اخف شوي عن الويكند بس مثل ما قلتلج تسيرين من الصبح او اول الظهر

– المكان أمان والا لازم نسير مجموعة .؟

المكان مزدحم الصراحة وفي من كل الجنسيات .. وفعلا الافارقة بالذات مليانيييييين فالسوق … فيفضل ان يكون معاكم ريال .. او اذا حابين مجموعة حريم … لان المكان امان والشرطة منتشرين في كل مكان من السوق ..

السوق موجود في منطقة الراس فدبي … في سوق الذهب … هو الصراحة يضيع .. يعني السوق فالسكيك .. بس اذا وصلتي سوق الذهب يعني انتي جريبة من السوق

واسفة عالاطالة … ان شاء الله اكون افدتج … والسمووووووووحة

المشاركة الأصلية كتبت بواسطة ام ميسا

سوق الدهب فمنطقة نايف بعد الويكند وايد زحمة بس روحي وسط الاسبوع احسن

أكيد ان شاء الله نص الاسبوع

المشاركة الأصلية كتبت بواسطة ms.goldy