اهل المعرس و أهل المعرس جمال الامرات

أهل المعرس عطوني المهري و أهل المعرس بيدفعون حق فستاني و أهل المعرس مادري شنو بيسوون

أحين أبي أعرف شي واحد

المعرس شو خاتنه عيل؟

كيف أنتي ترضين تاخذن واحد مب مكون نفسه و أهله يدفعون عنه كل شي؟

ما تخافين باجر يسترخصج ليش أنه حصلج مال يبلاش؟

يعجبوني الأجانب بصراحة لأنهم يعتمدون على نفسهم في كل شي. الريال الشاطر السنع هو اللي يسوي كل شي بروحه ما يخلي أهله يدفعون عنه كل شي عشان باجر لا يذلونه و يمنون عليه. وايد شباب أهلهم يدفعون لهم بيزات الزواج لكن و الله أنه حريمهم متضايجات منهم لأنهم مب رياييل قد المسؤولية أهلم مسوين لهم كل شي. الريال لازم يتعب و لازم بروحه يسوي كل شي و لو كان محتاج حد يساعده حرمته لازم تساعده و تدفع من جبيبها.

الزواج حياة مشتركة بين الريال و الحرمة فلازم هم اللي يسوون كل شي. البنت العاقلة المفروض تختار واحد مكون نفسه بنفسه مب واحد أهله راح يدفعون له تكاليف العرس. و لو محتاج دفعي من جيبج و الله ما بتموتين و ما بيطيح نصج.

أنا مالجة من فترة و ريلي مديون ديون الدنيا على راسه بس مستحيل أخليه يحتاج لأهله مسكين بروحه يالس يسوي كل شي رغم أنه مديون و مقصر على عمره و حارم نفسه من أشيا كثيرة عشاني و عشان تكاليف العرس و أنا واقفة معاه و بساعده بدفع من جيبي الحمد لله أنا أشتغل و ما فيها شي لو ساعدت ريلي.

مستحيل أخليه يتسلف أو يطلب من أهله لأن لو تسلف بتزيد الديون علينا و لو اهله عطوه بيذلونه و بيمنون عليه لأن وايد ناس جذه يسوون يدفعون حق أولادهم بعدين يمنون عليهم و يذلونهم.

بنات صدقوني الولد اللي أهله يدفعون عنه تكاليف العرس ترا هذا مب ريال و مب قد المسؤولية و أنا متأكدة أنه أي وحدة ماخذة واحد مب مكون نفسه و معتمد على أهله يالسة تعاني فحياتها لأن زوجها مب قد المسؤولية.

بس أنتو ما يهكم كل اللي يهمكم أنكم تحصلون مهر غالي و تلبسون فستان من أحسن مصمم و تسوون لكم أغلى كوشة و تحصلون كل شي مال جاهز بس ما تفكرون فباجر و فلمستقبل.

أدري ما راح ألقى ردود كثير على موضوعي لأنكم مب مقتنعين بشي هذا.

الله يهدي الجميع انشالله

المشاركة الأصلية كتبت بواسطة ba6006a

بنات صدقوني الولد اللي أهله يدفعون عنه تكاليف العرس ترا هذا مب ريال و مب قد المسؤولية و أنا متأكدة أنه أي وحدة ماخذة واحد مب مكون نفسه و معتمد على أهله يالسة تعاني فحياتها لأن زوجها مب قد المسؤولية.

ليش مب ريال !!!

الريال ما يتثمن بهالمواقف .. الريال باخلاقه .. ومعدنه مش فتكوين البيزات

المشاركة الأصلية كتبت بواسطة ba6006a

مستحيل أخليه يتسلف أو يطلب من أهله لأن لو تسلف بتزيد الديون علينا و لو اهله عطوه بيذلونه و بيمنون عليه لأن وايد ناس جذه يسوون يدفعون حق أولادهم بعدين يمنون عليهم و يذلونهم.

صح ان حلو من الريال انه يكون نفسه بس مش معناه ان اللي مش مكون نفسه مش ريال

ووايد من الاهالي يدفعون عن ولدهم من باب التقاليد والمحبه .. وأشوف ان من النادر ان الاهل يمنون على عيالهم .. كل شخص وعقليته وطبايعه

ويا كثر الرياييل اللي كونو نفسهم وتلقينهم يطلعولج جيه وجيه .. مش الكل .. بس مش هذا المقياس اللي نقايس عليه هالموضوع !

أنا وايد بيزي وكان ودي أكمل كلامي بس الوقت ما يسعفني بس لو رمست ما بخلص lol

وع فكره ما اتوقع مافي شاب اماراتي مب مديون يا اما حق سياره او بيت او حتى حق عرس