الموظفه و عندها عيال تدخل لتربية الطفل

السلام عليكم
انا مربيه من شهر و يتني خدامة علما ان باقي عن اجازتي شهر ابي اعرف كيف اخلي ولدي عند الخدامة بصراحة ما امن عليها مع انها فلبينيه ومسلمة كل وحدة تخبرني عن خبرتها

بعد ابي اعرف كيف يرضع البيبي حليب صناعي و شو احسن حليب ابيها تتعلم ترضعه وانا في الدوام

مهما كان اختي في النهاية هاي غريبة وقلبها ما بيحرقها على عيال الناس
مسلمة مب مسلمة ما يفرق كلهم نفس الشي
بس الواحد لو مب مضطر ما بيستعين بهم

لازم تخلينها جدام عينج تشوف الياهل وتشله وتتعود عليه لين ما انتي وياها تشوفينها كيف تبدله وكيف ترضعه وكيف ترقده وتشله
ولازم تحطين في بالج ان الوقت اللي انتي مب موجوده فيه و ولدج واعي شغل ييتج احتمال ما يخلص
المفروض جيه تسوين
تقولين حق خدامتج طول ما البيبي واعي انتي ماتسوين ولا شي بس تجابلينه
ولا الخدم عادي عندهم بيهملون الياهل على حساب شغلهم يخلص ويفتكون وما يتراكم عليهم

واحسن شي الفترة الاولى يوم بتداومين ماتخلينها بروحها في البيت ويا الصغيروني
نزليها بيت امج اختج عمتج المهم ما تكون بروحها لين فترة بس لأنها توها يديده وأنا لو مكانج ما بأمنها بصراحه

بالنسبة للحليب أنا أستعمل حليب اسمه SMA بس موجود في سبنيس وأحسه من أخف أنواع الحليب اللي استعملتهم حق كل عيالي وارتاحوا عليه ومب ثجيل شرات السيميلاك

شوفي باقي الخوات بعد شو بيشورون عليج واستخيري

ربي يحفظج ويوفقج

1- الحين قومي اشتري كاميرات مراقبة و حطي ف كل البيت
2- دامج موظفة ما عندج غير حلييين يا تخلينه ف الحضانة او عند الخدامة
( لو ميزانيتج تساعد ليش ما تودين البيبي الحضانات ،، في حضانات حكومية تابعة لوزارة التربية و التعليم و اللي يشتغلون فيهم مواطنات و خلي البشكارة لشغل البيت .. انا وحدة ما أمن ع الخدامة و احب الحضانة اكثر لان مكان حكومي و مواطنات يعني بنات بلادي و فيه رقابة )
3- لو ما عندج حل غير الخدامة خلي كيمرات و حاولي تعودين الخدامة تساعدج من الحين شوي شوي عليها ،، ولا تقسين عليها لانج لازم تذكرين ان عيالج عندها

اختي لا تحطينها عند الشغالة ابدا ابدا ، اللي عندنا من ١٠ سنوات ما نأمن عليهم كيف هاي ياتج من شهر و ما تعرفين خيرها من شرها ، وش دراج شو بتسوي في البيبي في غيابج بتهمله ولا بتخليه يصيح عقب تفتكر فيه و لا اشياء ثانيه انتي تعرفينها اكيد ، بتقولين شو اسوي عيل ، بقلج الحل انج تخلين البيبي عند حد مقرب امج او عمتج و اذا تعذر ، وديها حضااااااااانة موثوقة ، لااا للخادمة لا للخادمة لا للخادمة ، الشغاله للتنظيف و المطبخ فقط

اذا تقدرين ودي الخدامه والبيبي عند امج او ام ريلج ابرك

كيف بترومين اتداومين وانتي تحاتين البيبي طول الوقت

اختي انا مثلج و عندي اثنين ما شالله واحد في الحضانه 3 سنين عمره و واحد عند البشكاره العمر 6 شهور و لكن … اهم شي عند امي لانه رضيع و ما يتكلم فالبشكاره مع الشغير عند الوالده الله يطول بعمرها
بالنشبة اذا اهلج بعيد ركبي كاميرات و خبري البشكاره انج مركبه كاميرات عساس تخاف و تحس بالمراقبه هاي نصيحه من الاعماق
و لكن اذا ما خبرتيها و خليتي الكاميرات بالدز شو الفايده بتعورين قلبج لو لا سمح لله الشغاله سوت شي فالاحسن تعرف انه في كاميرات

ربيعتي كانت مسوية كاميرات و ما خبرت بشكارتها و البشكاره ضربت ابنها انزين انتي لو مخبره البشكاره على الكانيرات ما كانت بتتجرا صح ولا لا؟

فالحل الحضانه او الوالده او الكاميرات انتبهي ثم انتبهي تخلينه بروحه مع البشكاره بدون رقابه

اذا عندكم حضانة في الدوام وديه وياج ..

أو خليه عند امج أو عمتج و الخدامة تكون موجودة .. بس انج تخلينه بروحه ويا الخدامة ما أايد أبدا .. و ولدج اهم من الدوام اذا ما حصلتي حد ييلس عنده استقيلي ..

لانه الكيمرات ما منها فايدة انتي ما بتحطين في كل زاوية و في كل مكان .. تقدر تطلع في الحوي أو تنخش في الحمام .. كل شي ممكن يسوونه ..

والله يحفظ ولدج ان شالله ..