الحمد لله رب العالمين على النعمة اللي نحن فيها ..
الكل عارف كيف الدنيا صايرة نار والأغراض أسعارها مدبلة
وبنفس الوقت الوحدة يوم تعرس ما تبا تكلف على المعرس بالمهر والطلبات
يزيدون علينا في أسعار ومستلزمات العرايس
ومن الصوب الثاني العرايس وأهلهن يضطرون يزيدون في المهور
عشان الواحد يوفي بطلبات العرس .. فيصير الواحد بين نارين
بين انه يتنازل عن شي مقابل شي ..
انا قريت في المدونة كذا موضوع البنات يذكرن فيه ان مهورهن شوي
وبنفس الوقت ما تكفي لشراء قائمة طويلة عريضة من المستلزمات ..
حبيت أفتح هالموضوع عل وعسى نستفيد ونفيد ..
فكرة الموضوع هي كالتالي :
أن ندل بعض على عناوين وأرقام محلات أسعارهم فيها معقولة
مثلا :
أطقم الذهب بأسعار معقولة وموديلات حلوة
اكسسوارات يديدة وأسعار مميزة
ممكيجة عروس ما تزيد عن 3 آلاف درهم (مثلا) لو أقل بعد ليش لا
فستان وموديله يديد ايجاره ما يزيد عن 5 آلاف درهم (مثلا) لو أقل بعد ليش لا
فساتين مناسبات بأسعار معقولة
قمصان نوم بأسعار معقولة
عبايات بالجملة بأسعار رخيصة وكواليتي ممتازة
عطور أصلية بأسعار أرخص من المحلات الكبيرة
كوش بأسعار مناسبة
مسكات حلوة وأسعارها معقولة
محنيات أسعارهن أوكي ويحنن حلو
وهكذا ….
يعني كل شي وأي شي يخطر على بالكن من الألف إلى الياء ..
يعني يكون مثل دليل اقتصادي نستفيد منه وترجع له أي عروس تقدر قيمة النعمة اللي بين ايدها ..
بدل اللعبان والبهرجة ..
ياما انصدمنا بأسعار شغلة ونكتشف انها ارخص بوايد في مكان ثاني
مثلا الذهب شفت طقم في راس الخيمة وشفت مثله في الشارجة وكان الفرق بينهم حوالي ألف ونص
كان ممكن الوحدة تستغل الـ ألف ونص للحنة والصالون ..
ان شا الله تعجبكم الفكرة ونحقق الهدف من هالموضوع
وموفجات خيــــــــــــــــر يارب
والله يتمم بالخير والسعادة على كل عروس 
و اتمنى من البنات اللي يعرفون .. يفيدونا ^__^
مرحبا أختي ..
أنا أشوف حريم يبيعون ويؤجرون في مول المنتدى وبضاعتهم جيدة وأسعارهم معقولة ..
ونفس الشي الماكييرات مثل أم شامخ وروزي وكذا وحدة مكياجهم حلو ..
بس إنتو الله يهداكم تمشون وراء الأسماء المشهورة إنما لو تدورين بتحصلين جودة أعلى وأسعار منافسة ..
والله من وراء القصد .