*+* الرسم عالدلال والأواني *+* العروس الاماراتية

شحالكم خواتي، عساكم بخير ونعمة

اليوم قريت موضوع قديم لوحده تبا تعرف نوعية الألوان الي تستخدم في الرسم على الزجاج

والي انقهرت منه ان محد جاوبها ولا عطاها ويه، مع ان في وايد تاجرات يعرفن نوعية الألوان الي تشتخدم في هالأشياء

وحبيت انبهم ان ما يجوز يكتمون العلم
مثل ما قال صلى الله عليه وسلم

عن أبي هريرة قال قال رسول الله : صلى الله عليه وسلم { من سئل عن علم فكتمه ألجمه الله بلجام من نار يوم القيامة } ورواه ابن ماجه والترمذي

وقال تعالى: { إن الذين يكتمون ما أنزلنا من البينات والهدى من بعد ما بيناه للناس في الكتاب أولئك يلعنهم الله ويلعنهم اللاعنون } .

أما فضل تعليم الناس فهو فله أجر كبير عند الله

عن أبي هريرة قال قال : رسول الله صلى الله عليه وسلم { أفضل الصدقة أن يتعلم المسلم علما ثم يعلمه أخاه المسلم } .

فياريت الي عندها معلومات عن اي شي تحطه لخواتها عشان يستفيدون وتاخذ أجر من الله

إنزييييييين، الحين نرد لموضوعنا

أنا من فترة وأرسم عالدلال والأكواب

واستخدمت نوعين من الألوان: ألوان الزجاج، أو ألوان السيراميك

وانصح باستخدام ماركة Pebeo
لأني جربت عدة ماركات، بس هالماركة هي أحسن نوع لين الحين

وها شكل الألوان
هاي ألوان السيراميك( الصراحه هي أفضل للرسم عالدلال من ألوان الزجاج)

وهاي ألوان الزجاج

بتحصلونهم ينباعون يا ست كامل مثل الي في الصور، أو بالحبة
طبعا الست الكامل يكون وياه ( الورنيش) الي هو السائل الي يندهن على الرسم عشان يحميه وما يتقشر

وبعد لازم تشترون أحجام فرشايات

وفي سائل اسمه (تينور) عشات تغسلين فيه الفرشايات لأنه ما ينغسلن بالماي
وبعد تقدرين تنظفين فيه الرسمه، لو غلطتي تمسحين فيه

ولو حصلت صور توضيحية أكثر بحط لكم اياهم ان شاء الله

هاي إضافة حلوه من احدى الأخوات حبيت اظيفه هنيه عشان الكل يستفيد من معلوماتها

المشاركة الأصلية كتبت بواسطة nora1234

انا عن نفسي الون الدلة بالوان اكريليك وتوجد انواع كبيرة وانا اخذ من جرير وبعدين احط عليها ورنيش لالوان الاكريليك ينباع في الغصن الاخضر واخذ من هناك الجليتر والتحديد تبع الزجاج واستعمله اما بالنسبه للاكواب يجب ان تكون نوعيه الاكواب من الخزف عشان استعمل الوان البورسلين عليها وتحصلينها في جرير وهي انواع المهم انهن كلهن تقريبا يثبتا بالفرن حطيهن لمدة نصف ساعة في حرارة هاديةوبتكون النتيجة روعة واي استفسار انا حاضرة يارب اني ما اكون من الي يخفون العلم باذن الله

ممممم

الحين > من وين تشترون الألوان

حق بنات بوظبي ….. ( أنا اشتريت من الغصن الأخضر)
وبقية الامارات هالعناوين

مكتبة دبي للتوزيع
AL NAKHEEL BRANCH
دبي
04-2247044 Fax : 04-2247045

مكتبة الغصن الأخضر
أبوظبي
(971) 2 621 45 07

وأخييييرا،
هاي بعض أعمالي

بس ياريت خواتي الغاليات، الي يبن يرسمن انهم يبدعون بالرسم من خيالهم وما يتطرقون للقليد
لأن حلو يوم يكون الشي كامل من ابداعج وما فيه نقل او تقليد
والشاطرة تفهمها وهي طايرة ^.^

ولأي استفسار أو سؤال، أنا في الخدمة ^.^

والسموحه طولت عليكم

ما شاء الله روعة

ويزاج الله خير على هالمعلومات

وان شاء الله الكل يستفيد

بس اختي على كم خذتي الألوان ؟

بنوتة80
عزيزتي العلبة كامله فيها تقريبا ١٠ الوان مع لمعه ومع المثبت ، ب١٥٠ درهم
ويكون وياه فرشاة وتحديد فضي وتحديد ذهبي

بيت البسكويت
هيه عزيزتي هاي هي الطريقة