اقتراح للتخفيف من خسائر هروب الخادمات تدابير منزلية

اخواتي العزيزات .. بما ان قضية هروب الخادمات اصبحت ظاهرة منتشرة بشكل فظيع ولايخلو بيت من هذه المشكلة .. وبما اننا فقدنا الامل بالمسؤولين في حل هذه المشكلة .. لاننا سبق ان اشتكينا عدة مرات ولكن لاحياة لمن تنادي .. واصبحنا فقط ننتظر متى ستهرب الخادمة الاخرى بكل سهولة.. وبما انه لن يعوضنا احد عن خسائرنا المادية والمعنوية من دفع للمكتب وتعليم وتدريب بدون فائدة .. فإنني شخصيا قررت ان اضمن حقي من هذه الخادمة بأن أحجز عليها راتب ثلاثة أشهر بدون أن أعطيها إياها .. وفي حالة هربت من المنزل ادفع من راتبها للتعميم عليها .. أما اذا اكملت مدة عملها فإنني اعطيها لها عند سفرها فقط .. انا عانيت الكثير من هروبهن ولم اجد سوى هذا الحل البسيط الذي يضمن لي جزء بسيط من حقي.. ولكم الحرية في التأييد أو الرفض.. بعد ان فقدنا الامل في المسؤولين في الحد من ظاهرة هروبهن او ارجاع حقوقنا .. وشكرا

انا ضد اقتراحج أعطي الاجير حقه قبل ان يجف عرقه واذا شردت بتكون عندها حجة انج ما عطيتيها راتبها
صح كلنا تعبنا من هروب الخادمات …وانتي ما تضمنين الحياة او الموت
والحل براي الخدم بالساعة ايوونج باوقات معينه وترتاحين من هروبهم
او انعود وانغير نمط حياتنا نعتمد على انفسنا واللي اهي صعب تطبيقها

انا فكرت ما اييب خدامة لين يحطون قانون يحمي الكفيل
تعبنا والله

خادمات بالساعة بأسعار معقولة لأن في شركات أسعارهم خيالية يعني لو أييبها شهر كل يوم أربع ساعات بتكلفني 3000

كل حد له حرية الراي باللي يشوفه مناسب له .. لكن تخيلو اني انا اجيب الشغالة ماتعرف أي شي حتى الباب ماتعرف تفتحه وأعلمها وتاخذ مني وقت ووجهد وأعصاب وأنا أتحملهم وأعطيهم معاشهم أول بأول وأشتري لهم ملابس من حسابي وكل مستلزماتها حتى صبغ الشعر ياخذنه على حسابي مااقول شيي وين ماسرنا أخذناهم برحالتنا وزياراتنا الأكل اللي ناكله ياكلونه .. ولما نطلع نشتري لهم مثل مانشتري لنا من أكل .. حتى مرات أمر الكوفي آخذ كيك وكوفي وآخذ لهم مثلي .. في الاعياد نشتري لهم وبعد نعطيهم فلوس .. واشتري لهم تلفونات بأرقام .. يشوفون التلفزيون في وقت راحتهم .. وأيام الاجازة يتأخرون في النوم ماأقول لهم شي.. عشان أكسبهم .. وفوق هذا مايفيد وياهم يوم يتعلمون كل شيي .. يلبسونج ويشردون يدورون الصياعة في الشوارع .. وحدة من المكتب بروحها قالت انهم يسيرون أماكن وصخه.. والمصيبة في اليوم اللي تشرد فيه تكون تسولف وياج وتضحك ولا كأنه في شي وهي تبيت النية للخيانة والشردة.. وفوق هذا مايصيبج قهر .. ماتفكرين انج تاخذين حقج … والاخت اللي قالت نعطيهم أجرهم والا بيكون عندهم حجة للهروب .. انا أقولج وعن تجربة مستحيل تشرد وهي مب مستلمة الراتب مستحيل .. لازم بتاخذه عشان الجماعات اللي تهربهم تاخذ عليهم فلوس وهي طبعا تبغي تدفع لهم .. عشان تاخذ حريتها.. وانا مب قصدي من حجز راتبها اني آكل حقها لا طبعا راح اعطيه لها بالنهاية .. بس انا عن تجربة شخصية وياي وويا أهلي وصديقاتي مايشردون الا لما يكونون مستلمين فلوسهم عشان يدفعون حق اللي يهربهم لأنهم مرتبين ويا ناس ثانيين .

صدقتى والله انا عمتى ام ريلى احيانا جييه تسوى تحجز راتب شهرين عندها عسب اذا ما اشتغلت تسفرها على حسابها ولا قبل وين المخاسير خدامة سايرة وخدامة رادة حشا موب بيت هذا مطار

الله المستعاان