عاجل كليه فاطمة في العين التعليم العالي

السلام عليكم ورحمة الله وبركاته شحالكن خواتي بدش فموضوعي على طول  

انا طالبه في جامعه الامارات وحاليا موقفه عشان الايلس والحمدالله الله وفقني ويبت 5  بس اللي مب مرتاحه منه الماث ماحب شي اسمه ماث عشان جي افكرر اسحب اوراقي وسمعت عن جامعه الشيخه فاطمة  وأبا فزعتكن خواتي الغاليات عطوني كل شي تعرفونه عن كلية فاطمه اللي في العـين

لاني ابا اسجل فيها  بس ماعندي معلومات كافيه عنها بسألكم واتمنى انكم تجاوبوني عنها واي معلومات زياده تعرفنها حطولي بالموضوع يزاكن الله خير

أسألتي :
 
1- كم سنه الدراسه فيها ؟ للدبلوم وغيره 
2- التأسيسي انا سمعت انه 6 لفلات وكم ياخذون يعني سنه والا اكثر ؟؟
3- شو بخصوص المقابله والامتحان اللي قبل القبول ؟ كيف أهوو وشو من أسأله يسألون ؟؟
4- انا سمعت انه في رواتب للطلاب مكافئه سؤالي لو درست عندهم وفجأه وقفت لضروف او تركت الدراسه عندهم هل اجباري الطالب يرجع اللي عطوه من مكفأه ؟؟
5- وبعد التخرج كم سنه لازم الطالب يشتغل لصالح الكليه ؟؟
6- انا نسبتي 89.2% أدبي شو من التخصصات ممكن ادخلها عندهم بالكليه ؟؟ 
7- سمعت ان الكليه مختلطه هل هذا كلام صحيح ؟؟
8- شوهي المواد الاجباريه اللي على كل طالب يدرسها اول مايدخل الجامعه؟؟
9- هل الدراسه فهالكليه صعبه بالنسبه لطلاب للادبي ؟؟10-هل فيها مراعاه للمتزوجات واللي عندهن عيال مثل التقنيه وكيف دوامهم ونظام كلاساتهم ؟؟

اتمنى تجاوبوني على أسألتي ادري اني طولت عليكن بالاسأله بس محتايه اجابات منكن خواتي 

واذا ماتعرفون عنها أي شي أسألو اللي تعرفونه يدرس بالكليه او ارفعو الموضوع

 يزاكن الله كل خير يارب

مشاااااهدااااات بدون ردددد

من رايي تدخلين الموقع الرسمي مالهم وتشوفين كيف دراستهم احسن لج
وبعدين جيه ولا جيه بتدرسين ماث ماشي مفرر منه

اختي نصيحه لا تسحبين اوراقج من جامعة الامارات اصلا مافي مقارنه بينها وبين كلية فاطمة ،والماث اذا تقصدين اللي فالاساسي ترا مايسوى تطلعين من الجامعه بسببه ،شدي حيلج وبتعدينه ان شاء الله هذي نصيحه مني لج ،وايد بنات يتمنن يدرسن فجامعة الامارات لكن ماحالفهن الحظ ،،والله يوفقج وايسر امورج

تسلمين ختيه توته عالنصيييحه والله انااا ودي اكملل واخلص اموري بس الحين انا فالجامعه من ثلاث سنين وماتخصصت وان شاء الله عالسنه بتخصص بس الل ملوع جبدي مدة الكلاسات من غير المناظرات والمناقشات ماحب اوقف جداام الكلاس كله.ويزااج الله خيررررر مره ثانيه

وين موقع التسجيل وكيف اقدر اسجل بهالكلية ؟

– كم سنه الدراسه فيها ؟ للدبلوم وغيره
السنة الدراسية تختلف من تخصص وغيره
يعني لو انتي تبين تتخصصين تمريض .. تدرسين 4 سنوات بكالوريوس
اما اذا تبين تتخصين (صيدلة، علاج طبيعي، اشعة) فالدراسة 3 سنوات دبلوم و5 سنوات بكالوريوس
ولازم تييبين 5 علشان تتدخلين التخصص .. واثناء الدراسة لازم تييبين 6 ايلس

2- التأسيسي انا سمعت انه 6 لفلات وكم ياخذون يعني سنه والا اكثر ؟؟
التأسيسي 3 بس لفلات .. وهذيلا للبنات اللي ما عندهن ايلس 5

3- شو بخصوص المقابله والامتحان اللي قبل القبول ؟ كيف أهوو وشو من أسأله يسألون ؟؟
ماشي امتحان للبنات اللي عندهن ايلس .. بس مقابلة .. والمقابله عباره عن اسأله اهتمامتج بالعلوم الصحية بشكل عام

4- انا سمعت انه في رواتب للطلاب مكافئه سؤالي لو درست عندهم وفجأه وقفت لضروف او تركت الدراسه عندهم هل اجباري الطالب يرجع اللي عطوه من مكفأه ؟؟
اللي اعرفه في هذا الموضوع لا .. بس الفكرة تدرس .. واحتمال الطالبة ترجع الفلوس كامل لكلية فاطمة
يعني ان الطالبة تاخذ راتبين … راتب من كلية فاطمة وراتب من التوطين .. انا ما اعرف عن التوطين بس احتمال ترد الفلوس لكلية فاطمة

5- وبعد التخرج كم سنه لازم الطالب يشتغل لصالح الكليه ؟؟
بعد التخرج تختار الطالبة وين تبا تشتغل .. وهي تشتغل لصالحها فقط .. ومافي شي لصالح الكلية!!

6- انا نسبتي 89.2% أدبي شو من التخصصات ممكن ادخلها عندهم بالكليه ؟؟
جميع التخصصات .. على شرط .. الجي بي ايه يكون مرتفع
يعني لو تبين تتخصين صيدلة .. لازم يكون معدلج 3.3 وهذا اعلى معدل

7- سمعت ان الكليه مختلطه هل هذا كلام صحيح ؟؟

كان مختلط الحين لا

8- شوهي المواد الاجباريه اللي على كل طالب يدرسها اول مايدخل الجامعه؟؟

مواد مشتركه تاخذها الطالبة في السنة الاولى اسمها "COMMON YEAR" وهي
رياضيات
فكر اسلامي
فيزيا
كيمياء
علم التشريح والاحياء
علم النفس
كمبيوتر
انجليزي
ريسيرج
ومواد ثانية ما اتذكرها حاليا

9- هل الدراسه فهالكليه صعبه بالنسبه لطلاب للادبي ؟؟
في طالبات من بنات الادبي درسوا ونجحوا وفلحوا .. المهم .. هل انتي لج ميلو علمي وصحي؟؟

10-هل فيها مراعاه للمتزوجات واللي عندهن عيال مثل التقنيه وكيف دوامهم ونظام كلاساتهم ؟؟
مجرد تييبن اعذار طبيه للستيودنت سيرفس .. بيكون لج مراعاة خاصة