المشاركة الأصلية كتبت بواسطة um hanoody بغيت أخبرج إن مواضيعج كلها غاويه
وأنا أتنقز من موضوع لين موضوع هاويه
ومن تفصفيص الكيبورد استوت اصبوعي ذاويه
واستويت لسوالفج الحلوه راويه
وخلاف على جمعهن في كتاب ناويه
وسلامتج
اليوم الجمعة …
قال لي بعلولي قومي بأوديج مطعم آنا بورنا النباتي 
قلت له :
وديني مطرح ما توديني ….أي مكان وياك يرضيني
(مع الاعتذار لشادية )
وأنا طول الدرب أتساءل يا ترى … يا هل ترى ؟ وين مودني ؟!!!!
شوية ! إلا وصلنا …
^
^
^
^
^
^
^
^
…. برج خليفة
خذ لفة دور ما دايره عشان يسوي لي تمويه
ورد طلع عنه !!!!!
وأنا أقول لا يكون صدق بيوديني آنا بورنا
وخذ ثاني لفة يمين اللي عليها لافتة ATMOSPHERE
عشان ندخل برج خليفة من الخلف …
…نزولا الى المواقف …
ومن ثم فوق مرة ثانية ، عشان نوصل المدخل الخاص للمطعم
عند المدخل نلقى دري متحرك
وبوابات للدخول عليها SENSORS…
(حشــّــى مطار مب مطعم
)
ما ناقص الا يسألنا :
Do you have anything to declare ?
وصلنا اللفت !
وايد حبيت تصميمه ..
محفور على شكل أمواج على الأبواب متواصله بطريقة الحفر على الحجر اللي حواليه
ركبنا آلة الزمن
وأخذنا في الصعود …
(لاحظوا كاتبين على الشاشة : "المنطقة مراقبة بكاميرات " )
يعني قصدهم :
^الدماني^ ! يوزي عن التصوير ! المنطقة كلها محاصرة ! )
ليييييييييييييين وصلنا اللحظة التاريخية في الطابق 123
لقينا دري ! لازم ننزله ….
عشان ندخل أعلى مطعم في العالم : ATMOSPHERE
بعد ما حـلــّــينا مكانا عن حد يحــلــّــه قبلنا ….
طلبنا من المنيو الأنيق …
وبعلولي يلس يرد على مسجات الجمعة
يوم شافونا يالسين عاقلين ومؤدبين
يابوا لنا خبز مخبوز مع أرضي شوكي !!!!
لذيييييييذ ! مع زبدة سبيشل ، وزيتون مع زيت زيتون ON THE SIDE
وعلى ما يوصل الأكل التقطت لكم هالصورة …
وصلت المقبلات …
تامبورا روبيان …
رافيولي بالهيليون والزيتون الأسود لي …
وشوربة بازلاء خضراء بالكريمة لبعلولي …
يوم خلصت قال لي بعلولي : الظاهر موووول ما عيبج !
قلت له : مووووول !
مثل ما انته موووول ما عيبتك الشوربة !
اتعلثت اني أبا اسير الحمام ….
… عشان عيبتني الحنفية الشفافة
(يلست أهدر المياه عشان أصوّرها بوضوح !
مب تسيرون تخبرون عليّه ديوا هاه ! )
لكن الصراحة فيو الحمام ….
يخلي الواحد ما يبا يطلع منه
وبعد انتظار قصير …
الأكل العربي وصل
SEA BASS مع روبيان حقي …
وستيك حق بعلولي …
مع بطاطس بيوريه
وحلقات البصل
والمزيد من اللقطات لين يوصل الديزرت …
لاحظوا الأبراج اللي كل يوم نمر عليها طالعة كأنها علب كبريت !!!
^
^
^
^
^
^
^
^
^
أقدم لكم …
^
^
^
^
^
^
^
^
^
^
^
^
^
^
التعذيب على أصوله !
طلبت شوكليت موس مع أيس كريم فانيلا
المزيّن بأوراق الذهب …
ومن ضروريات التقديم لازم ينصب عليه شوكليت فادج
عشان شوي شوي …
…اظهر وبان عليك الأمان !
يطلع الايسكريم !
وما أفسد عليّه متعتي إلا ان بعلولي شاركني فيه …
بس سكت شو أسوي ! لا تنسون انه هو اللي بيدفع الفاتورة !
بعدين قام بعلولي وقال لي انه بيسير اللاونج ..
ويوم أخلـّـص الحقه !
في هذه اللحظه الحاسمة من تاريخ البشرية …..
الشيف طرش لي طبق هدية من المطعم …
عبارة عن كيك برتقال سُخــْـنْ مـوَجـْـوِجْ لسه طالع طازه من الفرن !
قلت فرصة اني ألتهمه قبل لا يغير بعلولي رايه ويرد
تعرفون عاد المثل الحلواني اللي يقول :
"عض قلبي ! ولا تعض رغيفي !"
وفي هذه الحالة ….: "لا تعض كيكي"
ما أشوف لكم الا الجرسونة تشاور لي بايديها وتقول لي :
" سوري مام ! تصوير الطاولات ممنوع "!
ابتسمت لها ابتسامة صفراء و قلت في خاطري :
ان شا الله عموه ! اتزهبي !
انتي ما تعرفين ان أنا ^الدماني^ اللي ما يمنعني شي عن التصوير ….
^
^
^
^
^
^
^
^
^
^
^
^
^
^
^
^
إلا بعلولي !
وغياظ فيها ….
طلعت من المطعم ودخلت اللاونج …
بس عشان أصوّر غياظ
جلساته رقيقة …
هادية ….
ومتنوّعة …
والفيو بعد … ماركة "تسلــّــى يا قليبي" …
"وشيل الهم عـنــّــا" مع الاعتذار لأبو بكر سالم
ومثل ما نزلنا الدري أول ما يينا …..ردينا طلعنا
عشان نوصل للفت الجميل (شو رايكم في التفصيل الممل ؟ )
وننزل من الطابق الـ 123
ونستقل سيارتنا ونطلع من البيسمنت مرَوْحــِــين البيت
رافقتنا السلامة