من كم يوم يتني فكرة تساعد التاجرات في الدعايه عن منتجاتهن
و في زياده الثقة بين التاجرات و العضوات
طبعا كل تاجره تريد توصل لأكبر شريحه من الزباين عشان تنتشر بضاعتها
و تمشي تجارتها
فيه وايد وسائل عشان تسوي هالشيء منها المدونة و المواقع الخاصه
و حتى الكلمه الحلوه عن بضاعتها بين الناس تساعد في الدعايه
فكرتي بسيطه و كل اللي يبالها أنج تسوين إعلانات مطبوعه عن منتجاتج
طبعا ما شاء الله فيه وايد مصممات فالمدونة و غير هالمدونة يقدرون يساعدونج
في تصميم يساعدج على الدعايه
أكيد بتدفعين مبالغ نقديه بس هالشيء في سبيل نجاح تجارتج و إشتهارها
و بيزيد من قاعدة زباينج.
كل تاجره تقدر ترسل الدعايه المطبوعه
مطبوعات مصورة
كتلوجات مصورة
أو حتى عينات صغيره من منتجاتها
عندنا مثلا
# التاجره منال تتاجر بالعطور
# التاجره مريم تتاجر بالجلابيات
# التاجره فاطمه تتاجر بالحلويات
يعني مثلا طلبت الزبونه أم حمد جلابية من عند مريم و يوم وصلتها
جلابيتها لقت معاها عينه من عطور منال
( ملاحظه عينات العطور يا يكونن في زجاجه صغيره أو ورقه صغيره معطره بالعطر
و مكتوب فيها إسمه) فعجبتها يوم شمته و لقت كتلوج فيه عطوراتها
هنيه أكيد فيه فرصه كبيره أنها تشتري من منتجات منال المهم لقت بعد صندوق صغير
معاه كرت مكتوب فيه حلويات فاطمه و يوم فتحته لقت فيه حبه شوكولاته مقرطسه زين
ففتحتها و كلتها و ماتت عليها أكـــــــــيد في أول مناسبه بتطلب من حلويات
فاطمه يا للعيد يا للعزايم .
هنيه كلهم فايزين و أولهم الزبونه… طبعا كل تاجره أعلنت عن بضايعها …
هالطريقه في إعتقادي فعاله و أنا بنفسي بسويها يوم أبدأ تجارتي إن شاء الله
طبعا كل تاجره تطرش إعلاناتها عند تاجره أخرى تتوقع بالمقابل أن
هذيج التاجره بتطرش إعلانات منتجاتها للإولى بعد ..
هالشيء بينمي روح التعاوين بين التاجرات و بتزيد الثقه بينهن و بالتالي
بتزيد الثقه عند الزبونات و بيحسن بمدى مصداقية التاجرات…
إذا كانت التاجره ما تريد ترسل إعلانات التاجرات مع بضايعها و لقت طلب
من إحدى التاجرات تسأل فيها عن إمكانية إرسال أعلاناتها فلها الحق أنها
تقبل مقابل مبلغ نقدي
بس هالطريقه ما تعجبني إلا في حالة كانت هالتاجره توها تتاجر فهنيه
أشوف أنه عادي لللتاجره المعروفه على نطاق واسع أنها تطلب
مقابل مادي على إرسال الإعلانات
بس أحسن لو صار تبادل إعلانات بينهن أعتقد أن هذا بيفيد أكثر
أخواتي أرجو منكم تقييم الفكره
و ذكر الإيجابيات و السلبيات
و عطوني آرائكم عشان نستفيد و نفيد
حقوق ملكية الفكره راجعه
لــبيضة الرامي ox3xo
السموحه طولت عليكم
و تقبلوا تحياتي
و أنا إن شاء الله بطبقها وياكم
ان شاء الله بحاول اسوي الحركه مع البنات 
عاد بنات نريد نشوف اعلاناتكن المطبووعه هنيه بيبدأ الإبداع فيهن كل ما كان اعلانج حلو و مثير أكيد بيجذب عدد أكبر من الزباين