مع كثرة الاسئله عن المنتجات اللي تفتح البشره وتخفف من البقع اللي فيها أو لاعطاءها نضاره وحيويه أقدم لكم هالخلطه الحلوه وأحلى ما فيها انج ممكن تستخدمينها ك ماسك لمدة ساعتين يوميا أو كريم ليلي تغسلينه ثاني يوم الصبح بماي بارد فقط …والمكونات موجوده ومتوفره
الكريم هذا بينفع البنات اللي يعانن من التصبغات الخفيفه واثار حب الشباب بشكل خفيف وانشالله النتايج بتظهر عقب اسبوع من الاستخدام الليلي للكريم واللي بتستخدمه كماسك خلال النهار بتطول وياها النتيجه
يللا نبدأ…بس قبل لازم أقولكم هذا الموضوع من تعبي وخبرتي يعني مب منقول ولاشي والصور لي طبعا
فاللي حابه انها تفيد غيرها بالموضوع ياليت ما تنسى تحط اسمي عليه وتقول من مدونة سيدات الامارات يعني ما تلطشه أو تتناسى اسمي MISCHOCOLAT
المكونات واضحه بالصوره
ليمونه صفرا كبيره+عسل الاكاسيا (ممكن تستخدمين العسل الموجود عندج بس انا احب الاكاسيا للبشره) +كريم جلسرين 75 مل + صندل ناعم+خيوط زعفران
وللبنات اللي ما بيحصلون كريم الجلسرين ممكن يستخدمون بداله كريم فير اند لفلي المصنع في الهند
مع 16 مكون عشبي وهاي صورته عشان اسهل عليكم
خطوات العمل
ملاحظه ::: كل المقادير بتكون بملعقه صغيره نفس ملعقة باسكن روبنز
ممكن استخدام الخلاط للحصول على قوام متجانس وبسرعه لكن في هالحاله بتحصلين على خليط خفيف ولازم تزيدينه صندل أو نشا عشان يتماسك
نعصر الليمونه ونصفي العصير في أي غرشه صغيره متوفره عندج بالبيت ونضيف على العصير ملعقه صغيره ممزوره من مسحوق الصندل
==================================
نضيف خيوط الزعفران ونسكر الغرشه ونخلط المكونات عدل
طبعا الصندل بتحسين انه ما ينخلط بسهوله وايد لانه يحتوي على زيوت طبيعيه واذا ذاب وياج بسرعه يعني الصندل هذا مب هاك الزود او انه مغشوش
================================
نضيف الكريم المضرب كله ونرجع نسكر الغرشه ونخلط عدل
==============================
نضيف ملعقه ممزوره من العسل وملعقتين من ماي الورد ونرجع نخض الغرشه لين تحسين المكونات اختلطت ببعض عدل
اذا حسيتي الخلطه وايد خفيفه وياج زيديها نشا لحد ما تكون متماسكه ومب غليظه وايد
نحتفظ بالغرشه في الثلاجه لمدة يومين مع خضها من وقت لاخر
ونبدأ استخدام الكريم في اليوم الثالث ولاتنسون تاخذون الكميه المناسبه بملعقه خشبيه أو بلاستيك
المهم الملعقه ما تكون معدن عشان ما تتفاعل ويا عصير الليمون الموجود في المكونات وتأكسد الكريم بالتالي يفسد
الكميه هاي بتكفيج 3 أسابيع لو بتستخدمينها للوجه والرقبه فقط اما اذا بتستخدمينها للمنطقه الحساسه او الركب والاكواع بتخلص عنج خلال 7 الى 10 ايام
ياليت البنات اللي بيجربن الخلطه يخبرونا عن النتيجه ونسبة رضاهن عن الكريم لان النتايج والتاثير يختلف من بشره للثانيه
مشكوووووووووووووووووووووووووووووووورة
المشاركة الأصلية كتبت بواسطة laperrla 
مشكوووووووووووووووووووووووووووووووورة
المضرب كله حبوبه مب بس ملعقه واذا حسيتي الخلطه خفيفه وايد (يمكن الليمونه اللي بتستخدمينها فيها عصير بزياده) زيدي الخلطه نشا بيخليها متماسكه
المشاركة الأصلية كتبت بواسطة فراشه_وردية الخلطه ممكن اتظل وياج بالثلاجه 3 أسابيع واكثر بس أنا اجددها كل 10 ايام بخلطه يديده لانه أصلا مايتم فيها وايد خصوصا لو استخدمتيها للوجه والرقبه والاكواع والركب