مرحبا عزيزاتي
اليوم حبيت اخبركم عن صالونة الكل ذاقها واستمتع بطعمها …. هي صالونة دياي علمتنا الوالدة الله
يحفظها طريقتها السهلة جدا واللذيذة …. اتمنى تنال اعجابكم وسامحوني دومي اطبخ وانسى اصور
لأن دومي مستعيلة…..
المقادير:
دياي مقطع افضل الصدور عسب اخف واحلى
بامية , بطاط وقراع
ثوم وبصل وزنجبيل ( مالي غنا عن هال 3 ) في معظم طبخاتي
ليمون اسود يابس
مكعب مرقة ماجي
بزار خاص بالدياي, ملح
صلصة الطماطم و طماطم معلب مقطع (عشان يخلي الصالونة غليظة)
ورق الغار, كزبرة , زبدة للطبخ (طبخي دوم بالزبدة) يطلع الأكل الذ
الطريقة:
غسلي الدياي ونظفيه , في تاوة اقلية على نار خفيفة
شوحي البصل والثوم والزنجبيل والكزبرة مع مكعب الماجي والبزار والملح في الزبدة
اضيفي علية البامية والبطاط والقراع يكون مقطع مكعبات متوسطة
اخر شي الدياي قليهم شوي مع بعض بعدين اضيفي الماي
اخر شي صلصة الطماط والطماط العلب واليمون الأسود
خليها ساعتين على نار هاديه تغلي عشان تاخذ الطعم
حلوة للعشا مع خبز ثريد
او الغدا مع عيش
عندي طريقة حلوة وغير عن العيش العادي مع هالصالونة
عيش مصري او امريكي بالشعيرية
عيش, شعيرية, زبدة وملح او ماجي الخاص بالأرز
الطريقة:
على نار خفيفة جدا قلبي الشعيرية مع الزبدة
اضيفي عليه العيش المغسول والمنقوع وقلبيهم مع بعض في الزبدة
اخر شي حطي الملح والماي بحيث يكون الماي بمستوى العيش بالضبط او اكثر بربع سم
ملاحظة: المقادير حسب الرغبة وحسب كم عدد الأشخاص عندج
اتمنى ينال اعجابكم وتقبلو مني خالص الأمنيات
دمتم
هالمره سامحناااج بدون صوره <<<< لانها طباخه مبتدئه
مره ثانيه ما بنسامحج
اتغشمر وياااج
حلو طريقه
