يمكن تسرعت..! المومة و الطفل

مرحبا ..
بدخل فالموضوع على طوول ..

ماعرف كيف ابدا من الضيج اللي فيه .. انا مالجة صارلي شهر وها اول شهر المفروض ريلي يطرشلي فيه مصروفي .. هو واحد من اهلي .. ونحن مب شرات اي اثنين مالجين من جريب .. المكالمات بينا وايد قليلة وانا السبب ف هالشي انا اللي ما اتصل او ما ارد عليه .. احس بعدني مب مستوعبة ولا حتى متقبلة اسلوبه فالرمسه وياي (الكلام الحلو وسوالف وين سرتي ووين ييتي وانه يبا يرمسني اخر الليل وجيه ..) وصارحته ب هالشي واتفهم الموضوع ..المهم.. سالفة اليوم ان طرشلي مصروفي ويا اخويه وياتني الفاجعة مطرشلي (500) درهم !! شسويبهم !!
ماعرفت شسوي والمصيبة اني قاعدة مع اهلي خواتي وخلاتي وجيه .. وصرت انا المصخرة .. ع قولتهم (ريتا) <<<شغالتنا .. تاخذ 800!! وتخيلو انتو ملامح ويهي هاييج الحزة ..
طرشتله مسج ان شو هالشي اللي مطرشلي اياه وبكل ثقة يقولي مصروفج !! احتشرت (بمسج طبعاا) ان هالشي ما يسدني .. مب بطرانة عالنعمة بس صدق 500 درهم شو بسويبهن ف هالغلا !!
وقتله اني انا ادرس فالكلية واسوق سيارة ومحتاية بيزات للبس وكشخة (غلط اذا الناس لاحظت اني ملجت وريلي مب مقصر فيه!) وبترول ورصيد واغراض وغيره وانتو حريم وادرى,, المهم قتله انا ابا 2024 ويالله يسدني .. كانت صدمة حياته الظاهر ؟ وبدت الماساة اتصل وبدا بالقلم والمسطرة يحسبلي هالبيزات فشو بيسيرن وانا بكل ذهوول اشرح .. وصرنا جنا فمحل انا اقول سعر وهو يكاسرني فيه ..
(وانا فيه صداع فظيع من الحمى والزجام وهو ولا عنده خبر) .. المهم فالاخر ورم راسي من النقاش وحسيت اني بعق رمسة يمكن اندم عليها فقتله خلاص مابا منك لا بيزات ولا غيره خلني برقد .. سكت يمكن دقيقة وقالي .. على راحتج .. وب جيه انتهى النقاش وياته من الله
بموووت من الضيج ومب عارفة شسوي بعمري خذت دوا الزجام وبعد مب رايمة ارقد ..

المالجة تقولي جم تاخذ..؟ وانا غلطانة ولا لا ؟ وكيف افهمه؟ّ

انصحووني .. احس اني صدق تسرعت يوم اني عرست انا مب قد هالاشيا ولا هالسوالف يالسة فبيت ابويه معززة مكرمة واللحين جني اطر منه !!

((اللي ردن عليه باسلوب راقي .. يزاكن الف خير ..
نحن عدنا .. من تملج البنية عيب فحق ريلها انها تاخذ ريال من ابوهاا ؟؟ هيه نعم انا من الامارات بس نحن جيه سنتنا .. وابويه لو طلبته ما بيقصر فيه وما يحتاي هالتنغيزات ومحد بيموت من اليوع ..
انا ما سرت اطلبه بيزات هو اللي طرشلي ويوم استغربت هالمبلغ منه سالني جم تبين؟
انا ما اتبليت انا بنيت هالشي على وايد اشيا قبل لان صار نفس الشي فنقاشنا على بيزات حفلة الملجة ,, انا انسانة دايما حقي ضايع لاني تعودت اسكت بس .. ماباه يتعود على ان يقصر لا على عمره ولا عليه لان سالفة التوفير صايرة عنده شرات الهوس.. لدرجة انه وايد مقصر على نفسه .. يمكن انا تعاملت مع الموقف بجدية لاني خايفة انصدم فيه ..انه حريص او شي جيه .. انا صدق احترمه
بس ليش دايم يستخسر فيه البيزات وهو مقتدر ..
انا قلت انصحوني ما طلبت من حد يحكم عليه من فهمه اللي على قده .. الناس فيها اللي يكفيها ما يحتاي انتو تزيدون عليها))

الله يعينج حبوبة بس صدق مب حلوة 500 يعني شو اتسوي
وخاصة انتي تدرسين يعني لو مبلغ معقول بنقول
الله يهدي ريلج شكل بخيل

يعني هو بخيييل ؟؟

حياتي الله يكون بعونج ماعرف ان شاءالله الخوات ينصحونج

جايز ما يعرف مصاريفج
لا تظلمينه
خلج كووووووووووووول
يا يعطيج صح او يخليهم له ههههه

استغفر الله

مب سالفه بخيل يمكن تعودو من قبل كله كنت اسمع ان الرياييل يعطون اكثر شي 500 !! بس هالايام ماتسد طبعا .. المفروض هو عارف هالشي !! المهم صارحيه لاتسكتيين !!

.مب سالفة بخيل ,, بس انا اوقات التمس له الاعذار لانه يتيم الام والابو وعاش حياته بروحه .. ما يعرف ف هالاشيا .. وحتى لو سال خواته هن مب من النوع اللي يصرفن واايد .. وهو سال اخويه الصغير انا جم ابويه يعطيني مصروف فقاله 500 وطرشهن ..!! مافهمه اخويه ان ها مصروفي كل اسبوعين من غير لبسي وشراي واغراضي من عند ابويه حتى الرصيد وبترول السيارة !!!