ياترى بتتنازلين…. هالمرة للعازبات قبل المتزوجات لتربية طفلك

ما أعرف من وين أبدى بس أريد أعرف أرائكم رأي كل حد الي ما مر بالموضوع وألي مرفيه … هل بتقدم السن و بتأخر الزواج بتتنازلين عن أساسيات كانت بقائمة طلباتك بزوج المستقبل … يعيني أنا للحين ما ياني نصيبي عمري 26 جامعية و يشهدولي بأخلاقي و جمالي و ديني و تربيتي و الحمد لله مثلي مثل أي بنية كانت بأول عمرها تريد زوج المستقبل فارس على جواد أبيض مب تفاهه و لكن كل وحده تدور الكمال و الكامل الله للحين ما ياني نصيبي مب بسبب هالشروط بالعكس أنا هالشروط بيني و بين نفسي و لكن يوم أشوف الي حواليني عرسوا و صار عندهم عيال الله يهنيهم مب حسد بس يوم أفكر بيني و بين نفسي أقول خلاص لو ياني نصيب مب لازم يكون من مستواي الجامعي أو مب لازم يحطلي بيت بروحي أو مب لازم يكون منصبأو بعمري أو من نفس بلادي وووو أكيد في أشياء ما أقدر أتنازل عنها و هي الدين و الأخلاق بس ياترى و الي أريد أعرفه هل هالأفكار يتني لأني بديت أيأس أو هالشي موجود عند الكل…. المتزوجات هل كانت عندج شروط معينة و تنازلتي عنها عشان تخوضي تجربة الزواج و الأطفال و أنتن يالعازبات و خاصة الي تحس أن العمر أخذها بدون ما تنتبه ممكن تتنازلين عن أشياء معينة عشان الزواج يعني ما بتدقين وايد هو من بيت منو من مواخيذكم و لا لأ أعزب أرمل مطلق عنده عيال أي شي بس المهم أتزوج و لا أنا بس الحيرة خذتني أنا صراحة ما أفكر بسوالف ولد منو و من مواخيذنا و لا لأ و هالسوالف بس بصراحة موضوع المستوى العلمي و حالته الأجتماعية يعني أعزب متزوج أرمل أصغر عني أكبر عني صرت أحسها أمور المفروض الواحد يغمض عيونه عنها و لا أنتوا رايكم غير و أنه لازم أتمسك بأفكاري ما أدري قولولي رايكم أو أذا لكم تجارب معينة ….و أخيرا الله يرزقني و يرزق كل العازبات بالزوج الصالح و الخلف السليم الصالح و ألي ما بيعطيني رأيه يدعيلنا و مشكوووووورين

انا متزوجه . . بس يوم كنت صغيره يعني 18 . . كنت اقول لا فارس احلامي
ولازم يكون جامعي و دارس برع عشان اللغه . . و معاشه الفلاني . . ,

بس لما كبرت شوي . . و صار عمري 21 . . تغير مفهومي . . ,
شروطي واايد قلت عن قبل . . و تفكيري تفتح اكثر . . ,

الريال اللي اهم شي فييه . . اخلاقه / دينه / معاملته . . صلاته . . يخاف ربه

ما هتميت انه بنفس مستواي الدراسي لانه المستوى الدراسي مب مقياس تقيسين فيه الشخص . . ,

بس كنت اقول ف خاطري . .

لو ياني واحد عنده شهاده 6 ابتدائي ويصلي و خايف ربه وماعليه كلام . . ,
وياني واحد عنده شهادة دكتوراه . . بس ما يعرف الجبله و لا يصوم و فوق هذا يشرب . . !

برضى بمنو . . !

.
.

والحين الحمدلله . . صح ريلي عنده شهاده عداديه وانا عندي شهاده دبلوم ولكنه والنعم فيه صلاته ما يطوفها و يخاف ربه . . ,
وفرق بيني وبينه تقريبا 6 سنين . . ,

ولكن هالاشياء ما كانت مسويه لا حدود حمرا ولا مشاكل

.
.

^^ و لا تيأسين الغاليه . . كل شي مكتوب عند رب العالمين . . و كل وحده بتاخذ نصيبها في هالدنيا
اذا ما تزوجتي هالسنه ان شالله السنه اليايه . . ولا تيأسين من حكمة ربج . . ,

رب العالمين يختبر عبده في كل صغيره كانت او كبيره . . ,

^^.

طبيعي البنت لما تحس انها تاخرت فالزواج تبدى تخف من شروطها وترضى بأقل من اللي كانت تباه قبل عسب تعرس
انا عن نفسي ما كنت اتشرط قبل …. لكن لما يا الخطيب بديت اتشرط ههههههههههه والحمدلله راضين بكل شروطي

وربي يتمم ع خير واملج قريب

ما كاان عندي شروووط

الله يرزق كل بنت الزوج الصالح عاجلا غير اجل ياارب .^_^.