السلام عليكم و رحمة الله و بركاته
مسا الخير 
خواتي محتاجه لخبرتكم كملت سنتين و انا احاول احمل و للحين الله ما كتب لي ؟
ما خليت مستفى و لا عيادات اللا رحت لهم و جربت الاعشاب المنزلية و بعد مافي فايده 
و الله تعبت و انا اعيد و ازيد بالتحاليل …
أول مره رحت للوصل و قالوا لي انتي ليش مستعيلة و عادي مافيج شي بس اصبري
و بعدها بفتره ريلي قعد يحن علي يبي بيبي فرحت معاه لعيادة خاصه عند دكتورة عراقية
و قالت لي ان عندي تكيس و عطتني دفستون و قالت عادي تقدري تحملي من الشهر
الياي .. و هذا الكلام من سنه و انا للحين ما حملت ؟؟
رحت بعدها لعيادة الاخصاب بمستشفى توام .. صراحه بهدلوني عدل و المواعيد مذله
يعني اول مره رحت بدأت مع دكتور وليد … قالي عندج خربطه بالهرمونات و وصف لي
حبوب ترتب الدوره و الهرمونات و بنفس اليوم اللي كتب لي هالوصفه سويت تحليل دم مره
ثانيه علشان يتأكدون من الهرمونات ؟؟؟
و طلب مني اخذ موعد على ثاني يوم بالدوره بعد شهرين … انتظرت و خذت الموعد بس ما
دخلوني عنده دخلوني على دكتوره ثانيه نسيت اسمها و قالت لي بعد ما شافت الملف ان
الهرمونات كلها طبيعيه و مافي اي مشكله و عصبت وقت عرفت ان الدكتور وصف لي ادوية هرمونات و انا مو محتاجتهم …
المهم سويت التصوير و تحاليل من اول و يديد و بعد طلبوا من ريلي تحاليل كامله فسويناها
و بعدها بشهرين رديت لهم و قلت لهم ابي ابدا العلاج لكن بكل مره الدكاتره يقولون لي
ليش مستعيله انتي بعدج صغيره و بالعلم انا الحين بال 24 يعني موب صغيره و لا شي
و اللي دخلت عندها هالمره دكتوره مها يعني بعد غيروا لي الدكتورة ؟
عطتني حبوب تنظم الدوره لانها تلخبطت عدل من بعد ادويتهم و طلبت منها تشوف لي حل
و اني ابا احمل مليت من كثر ما اعيد و ازيد بالمواعيد اللي اتريا فيها بالثلاث و الاربع ساعات بس علشان تقولي الدكتوره تعالي الشهر الياي … بالرغم من اني اكون رايحه لهم
باول ايام الدوره …
و بعد هذا كله اتصلت عليهم علشان اخذ موعد و ابدا العلاج قالت لي موظفة المواعيد ان
عندهم زحمه و ما تقدر تعطيني موعد بما اني ما بديت العلاج و قالت لي اتصلي الشهر الياي ؟؟؟ بعد اترييت و خذت موعد الشهر اللي عقبه و شفت دكتوره مها و تخيلوا قالت لي
خلاص انتي تعالي الشهر الياي و بنبدا العلاج ان شاء الله … ؟؟ قلت لها ليش ما ابدا من
الحين قالت لي خذي حبوب نظمي الدوره و بثالث يوم تعالي قلت لها ان من كم شهر الدوره
منتظمه و عطيتها المواعيد بالضبط لكن بعد قالت لي لا تستعيلي و قالت لي تعالي الشهر
الياي و طلعت عنها و انا و الله دمعتي في عيني …
بعد هذا كله ريلي عصب و قالي خليهم و مافي روحه لهم مره ثانيه و قالي لا تاخذ اكثر من الحبوب و بنروح لعياده زليخه بالشارجه …. انا ضايقه و الله و مو عارفه شو اسوي
و للحين ادور على عياده مجربة .
ياريت الاقي حد يفيدني هنا لاني و الله بخاطري بعيال ريلي يته حاله نفسيه
من كثر ما يشوف عيال ربعه و اهله و بكل مره يقولي انتي مو مهتمه و لا شي
و و الله يعلم اني احترق من داخل بسبب هالموضوع لكن ما ابين علشان ما اثقل عليه
…
و السموحه طولت وايد
عزيزتي .. خبري ريلج عسب يفحص .. وهالريال الي خبرتج عن حرمته .. فحص واخذ علاج لمدة 3 شهور وسبحان الله وفعلا ً صدق كلام الدكتور عقب الثلاث شهور زوجته طلعت حامل !!
والله يرزقكم بالذرية الصالحة يارب
المشاركة الأصلية كتبت بواسطة ملكة الاحاسيس 
عزيزتي .. خبري ريلج عسب يفحص .. وهالريال الي خبرتج عن حرمته .. فحص واخذ علاج لمدة 3 شهور وسبحان الله وفعلا ً صدق كلام الدكتور عقب الثلاث شهور زوجته طلعت حامل !!
والله يرزقكم بالذرية الصالحة يارب
تسلمين ملكة الاحاسيس على ردج الطيب و انا فكرت بها الشي من قبل و صرت
اقول حق ريلي بكل مره يفحص معاي و الحمدالله مافيه شي و الحيوانات عنده زينه
يعني مافي اي مشكله …
عسى ربي يرحمنا برحمته
المشاركة الأصلية كتبت بواسطة بدويه 99 عقب الدورة خلي وحد تمسحج وايد حرمت اخو ريلي من 9 سنوات ماحملت وتمت كل ماتي الدورة تخلي وحده تعرف تمسح لها بطنها ومحملها .. لانه زين وايييييييد وحملت ويابت ولد مثل القمر واختي بعد من سنتين ماحملت والحين كل ماتييي الدورة تخلي حد يمسحها بس مب دووووووم لان مب زين والحين يارب ترزقها الذريه الصالحه
والجي ربج واستغفري
مسا الخير بدوية ..
تبين الصدق هالكلام ما راح عن بال ريلي و من كم يوم قالي انه بيكلم امه
علشان تاخذني عند وحده تمسحني لكن انا ما رضيت …. و شفت فيها احراج
اذا قال لعمتي … خاصه ان علاقتي فيها موب لهناك و اخاف من الرمسه و
الكلام الزايد ….
و الحين ادور على دكتور او دكتوره شاطره و مجربه
و اتمنى الافاده من خواتي اللي هنا …
و مشكورة اختي على ردج
مستشفى توام دايما مواعيدهم خرطي …وعلاجهم اي كلام…
الغاليه استغفري كل يوم واقري سورة البقرة بنية الله يرزقج …سمعت وااايد بنات يقولن من بدن يقرن سورة البقرة وكثرن من الاستغفار بنية الحمل ..الله رزقهن …
الله يرزقج يااااااااااااااااااااااااارب …
المشاركة الأصلية كتبت بواسطة مالى خاطر مستشفى توام دايما مواعيدهم خرطي …وعلاجهم اي كلام…
الغاليه استغفري كل يوم واقري سورة البقرة بنية الله يرزقج …سمعت وااايد بنات يقولن من بدن يقرن سورة البقرة وكثرن من الاستغفار بنية الحمل ..الله رزقهن …
الله يرزقج يااااااااااااااااااااااااارب …
تسلمين الغاليه و ان شاء الله راح اقوم بالوصيه و ابدا اقرا سورة البقرة
كل ليلة و توام .. ما اقول غير الله يسامحهم ..