شحالكم ؟
عندي كم سؤال يدورون في بالي لأني حابة أسويلي بزنس صغيرون
ومترددة هل أشاركبه فالمدونة أو لاء؟ وبغيت شوي من خبرتكن ..
هل ترين أنه عرض منتوجاتج فالمدونة مجدي ؟ يعني تلقين من الأرباح
الللي تطمحين لها ؟
هل تتعاملين مع الزبونات فالتيلفون ؟ ولا بس مدونة ؟
هل تعرضتي لمضايقات من الزبونات ؟ مادفعوا لج ؟ ولا وصلتهم البضاعة وردوها؟
شو تبيعين انتي ؟
شو اكثر السلع اللي عليها إقبال ؟
كيف تحسبين أرباحج ؟
كيف تسعرين السلع مالتج ؟
خبرينا شي ممكن تضيفينه ويفيدني ؟؟؟
ومسبقا لكل اللي بيردون شاكرة لكم وهذا العشم 
أتريـــــــــــــــــاكم،،
نتريا ردود خواتنا التاجرات
محد بيفيدنا يعني؟
اللي تطمحين لها ؟
نعم مجدي وفي ربح..بس حسب قناعتج أنا أشوف 10 و15 درهم ربح زين وبنات يشوفونه ما يستاهل التعب.
هل تتعاملين مع الزبونات فالتيلفون ؟ ولا بس المنتدى ؟
الاثنين…بس التلفون عن طريق المسجات أكثر شي,نادر ما أتصل..الرسايل الخاصة أوفر,بس ساعات تحتاجين شي ضروري من الزبونة.
هل تعرضتي لمضايقات من الزبونات ؟ مادفعوا لج ؟ ولا وصلتهم البضاعة وردوها؟
أنا لا والحمدلله…بس تاجرات ثانيات وايد تعرضوا لها الموقف,في تاجرة من عقب العيد رجعت الها27 طلبية!!!وطبعاً هي تحملت خسارة الشحن أضربي 27في 25توصيل(ان ما كان أكثر)
وهذا من تفاهة بعض البنات وانعدام الذوق والضمير عندهن.
شو تبيعين انتي ؟
اكسسوار القدم وقاطعه الكيك..غير أغراضي الخاصة في كراج سيل.
شو اكثر السلع اللي عليها إقبال ؟
حسب المواسم….في رمضان والعيد:الجلابيات وهدايا العيد,في الصيف: فساتين الاعراس وشنط السفر والاسكارفات.
الدخون والعطور منتشرين وايد.
بصفة عامة اذا بتييبين منتج يديد مميز بيكون في اقبال,بس أهم شي السعر يكون ممتاز.
كيف تحسبين أرباحج ؟
احسبي سعر الكلفة مال المنتج+الادوات اللي بتحتاجينها له(مثلاً الدخون:تحسبين كلفة العطور اللي بتستخدمينها مع المواد الأولية+سعر الغراش+الاكياس)اذا تجارتج فيها سيرة ورده وايد مخصوص عشان البضاعه لازم تحسبين حساب البترول(الا اذا كنتي طالعه طالعه مافي داعي)
كيف تسعرين السلع مالتج ؟
موضح فوق
خبرينا شي ممكن تضيفينه ويفيدني ؟؟؟
اذا عندج راس مال معين لا تحطينه كله في البزنس..دايما خلي عندج احتياطي لانج ما تعرفين البزنس مالج بيمشي ولا لأ.
لا تتسلفين عشان البزنس.
التصوير يكون واضح وبكاميرا ديجيتال..انسي الصورة بالموبايل
اذا ملابس اشتري مانيكان
سرعه التجاوب مع الزبونات سواء عالعام أو الخاص.
حالياً تعاني التاجرات من مشاكل في التوصيل بسبب غلاء شركات الشحن
أتمنى أكون فدتج بشي وأي سؤال من عيوني
الللي تطمحين لها ؟
مجدي الحمدلله ……..بس مش اللي اطمح له ..
هل تتعاملين مع الزبونات فالتيلفون ؟ ولا بس منتدى ؟
غالبا بالرسايل الخاصه …ومرات مسجات التلفونات …و التلفون عند الحاجه فقط
هل تعرضتي لمضايقات من الزبونات ؟ مادفعوا لج ؟ ولا وصلتهم البضاعة وردوها؟
مضايقات ..الحمدلله باول التجارة كنت اتضايق اكثر لاني مب متعودة اتعامل ويااصناف ماعندها ذوق
لكن عقب الحمدلله صارت المضايقات ما تسهرني وتقهرني خاصة اذا كانت كيديه وانا مالي ذنب فيهاااا
وعن ترجيع البضاعه ……..يعني قله لانه الغالب يطلب ويتريا طلبه .بس تستوي احيانا
شو تبيعين انتي ؟
ابيع عطور ومعمول وعود ازرق ومخمريه وانوع احيانا بالملابس والاكسسوارات والشنط ..
.لانه التجارة تحب الخفيه
شو اكثر السلع اللي عليها إقبال ؟
عندي :منتجات العطور
وعموما: الملابس والاشياء الغريبه ..كيف تحسبين أرباحج ؟
ارباحي قليله والبركه بالقليل الدائم
كيف تسعرين السلع مالتج ؟
اقيس واشوف اذا تسوى ولا لا ….واذا كنت تعبانه فيها وايد ولا لا ..واذا كانت من الامارات ولا من برا
خبرينا شي ممكن تضيفينه ويفيدني ؟؟؟
لاتطرشين شي للخارج على البريد العادي .يا ممتاز ولامسجل ….
البنات اللي ايون زيارة للامارات يومين وثلاث ويريدن طلبهن خلال هالفترة لاتطرشيلهن خاصة اذا كانن
بيسكنن بامارة ثانيه،، لانه غالبا تعاكسهن وتعاكسج الظروف ويسافرون وتردلج الاغراض وتدفعين توصيلها
على الفاضي………
والله يوفقج ونترياج تكونين تاجرة ببضاعه مميزة