ميني تارت السنكرز .. لذيذ .. سهل بشكل مب طبيعي ..ادمااااااااااااااان طبق اماراتي

اليوم بقدم لكم تارت السنكرز الى تميت فترة طويلة وأنا ادور طريقته وماحصلتها

قصة هالتارت أني كنت اطلبه من حرمة و عجبني بشكل رهيب

ومن كثر ما حبيته قلت لازم اتعلمه عشان كل مالي خاطر اسويه .. وعشان اخق عند اهلي فيه

المهم تميت اخترع ونفذ ..

المحاولة الاولي كانت فاشلة .. حلو بس مب الى اباه

المحاولة الثانية .. كانت رهيبة والكل انصدم من طعمه كان فظييييييييييع

أخليكم مع الصور والطريقة

أولا :
نكسر بسكويت دايجست ونعجنه مع زبدة طرية (يفضل تطلعيها من وقت من الثلاجة)

(طبعا في الصورة نسيت اصور فبتشوفون باقي شوي في الصحن )

ثانيا:
نكور العجينة لكور صغيرة و نحطها في صحن الميني كب كيك (يفضل تاخذين الصحن الميني أحسن)

ثالثا:
بعدين نضغط على كل كرة بملعقة بلاستيك صغيرة عشان يكون شكلها مرتب بعد الحشو

رابعا:
نجهز الحشوة الى بتكون عبارة عن 1 حليب مكثف (الحجم الصغير) + 2 سنكرز وسط

نذوب السنكرز في المايكرويف لمدة 40 ثانية فقط (لا تزودي الوقت عشان مايحترق السنكرز) بعدين نضيف عليه الحليب المكثف ونحرك الين ما يتجانس

أخيرا:
نعبي الحشوة داخل الدوائر وبعدين ندخلها الفرن لمدة 5 – 10 دقايق (الفرن نحطه 160 و نشغله من تحت فقط)

أتمني أنها عجبتكم ونصيحة جربوها راح تدمنوها