اخواتي اولا تقبل الله طاعتكن وصيامكن حبيت اعرف كل مايتعلق بتدريس هالمرحلة بمعنى
1- توزيعة الدرجات على اي اساس وياليت الي ترد علية توضح بالتفصيل
2- التحضير قالتلي وحدة من الطيبات انة مش مطالبين فية كل المدارس جية صح؟؟؟
3- شو اطلب من طالباتي يبن معهن غير كتب العلوم يعني اخليهن يبن دفتر عادي للواجبات ؟؟
4-ملف الانجاز حق الطالب والله ماعرف سالفتة يعني شو فرقة عن دفتر الواجب ياليت توضحولي ؟؟؟؟
5-انا كمدرسة شو اييب غير دفتر العلامات
6- شو سالفة المشروع العلمي وهل كل المشاريع مطالبة بها ؟؟؟؟ ومن الي يسويها انا ام الطالب ؟؟؟
7- انا كتعيين جديد متى يدخل الموجة والمديرة حصصية بعد اول اسبوع او 2 اسبوع وهل يبلغوني قبل مايدخلون ولا يسووولي صادوة؟؟؟؟
8- طريقة توزيع الصف الى مجموعات؟؟؟يعني المجموعة فيها 4مثلا وحدة الرئيسة ووحدة قارئة ووحدة كاتبة بس مافي مسميات ثانية وشو وظيفة الرئيسة بالضبط؟؟؟
9- شو كتب مفيدة عن العلوم اقدر استفيد منها وشو المكاتب الي تبيع هالكتب؟؟؟
10 شو المواقع الالكترونية الي تفيدني بالشرح وغير؟؟؟
السموحة منكن حبيباتي ادري وايد سألت بس ابى اكون فكرة عن الواجبات الي علية واستعد بالي اقدر علية والله يجازيكن كل خير ويعلة بميزان حسناتكن والله عزوجل في عون العبد مادام في عون اخية
2- التحضير قالتلي وحدة من الطيبات انة مش مطالبين فية كل المدارس جية صح؟؟؟ وهالشي عحسب الموجه بعد – في موجهيين يطالبون بدفتر التحضير وفي موجهيين لا – بالنسبة للعلوم ماشاء الله كل شي جاهز في دليل المعلم ,,, وعلى فكرة اذكر مرة شفت دفتر تحضير الكتروني يعني كل يوم تحطين تحضيرج فالكتيب الإلكتروني…
3- شو اطلب من طالباتي يبن معهن غير كتب العلوم يعني اخليهن يبن دفتر عادي للواجبات ؟؟ أحس مايبن دفتر مال أول الدفاتر …أنتي سويلهن أوراق عمل وواجبات وخليهم يحتفظوا فيه فملف خاص بمادة العلوم وكل وحده وإبداعها فكشخة الملف عشان اتراوينه الموجهه…ويستانس عالبنات المهتمات بالمادة…
4-ملف الانجاز حق الطالب والله ماعرف سالفتة يعني شو فرقة عن دفتر الواجب ياليت توضحولي ؟؟؟؟ ملف الانجاز لج أنتي مب الطالب …دايمن الموجه والمديرة ايطلبونه منج كل آخر سنة عشان ايقيمونج عليه ….اتحطين فيه الرسالة والرؤية والأهداف ومشاريعج وإذاعاتج وكل اللي سويتيه وحتى الدروس المميزة صوريها ووثقييها وكلمة المديرة فالملف مثلا وأوراق العمل والامتحانات وأسماء طالباتج وسوالف بعد ..دوري فالنت وبتحصلين نماذج…لا اتخافين هو نفسه كل سنة اتقدميه بس اتغيرين الاوراق على حسب الفصول …
5-انا كمدرسة شو اييب غير دفتر العلامات ….بالنسبة لج مطلوب منج تبدعين فشغلج أنا ماأحب المدرسات اللي يقرن وايصمن فالصف وخلاص ابدعي فإعطائج للمعلومة عشان الطالبات ماينسنها …ولازم مثل ماقلتج اتسوين إذاعات ومشروعين ودفتر التحضير والدرجات و امممم مااذكر شو بعد
6- شو سالفة المشروع العلمي وهل كل المشاريع مطالبة بها ؟؟؟؟ أنتي ومدرسات العلوم سوونه مع بعض وهن بيساعدنج يعني مثلا تشركين البنات فمسابقة علمية او اتسوون أسبوع العلوم واتسوون فيه معرض وفعاليات ومن الي يسويها انا ام الطالب ؟؟؟ [COLOR="purple"]طبعا أنتي….والطالب هو اللي ايشارك بعد فيها ولازم كل شي ايكون موثق
7- انا كتعيين جديد متى يدخل الموجة والمديرة حصصية بعد اول اسبوع او 2 اسبوع وهل يبلغوني قبل مايدخلون ولا يسووولي صادوة؟؟؟؟ ماعندي أي فكرة بصراحه لكن انتي لاتهتمي شرحي مثل كل يوم تشرحين فيه لا تحسبين احساب لحد …كأنهم حاضرين الدرس وهم مختفيين
8- طريقة توزيع الصف الى مجموعات؟؟؟يعني المجموعة فيها 4مثلا وحدة الرئيسة ووحدة قارئة ووحدة كاتبة بس مافي مسميات ثانية وشو وظيفة الرئيسة بالضبط؟؟؟ ممكن اتسوي القروبات على حسب عدد البنات فالصف …بس لازم اتحطين رئيسة واسم للقروب … ومثلا خلي كل قروب اييب حصالة واطبعي عملات نقدية وكل قروب ايجاوب صح أو يكون هادي أو يحل السؤال الذهبي فالحصة حطيلهم عملة فحصالتهم….وكل آخر شهر تحسبون عدد العملات والقروب الفايز وطبعا اتوزعين عليهم هدايا عشان الكل يتشجع…ويحاول يحضر ويعطي كل اللي عنده
9- شو كتب مفيدة عن العلوم اقدر استفيد منها وشو المكاتب الي تبيع هالكتب؟؟؟ بصراحه وماشاء الله كل شي موجود فالنت …وإن شاء الله البنات يفيدونج
10 شو المواقع الالكترونية الي تفيدني بالشرح وغير؟؟؟ في منتديات للمناطق التعليمية وااااايد مفيدة…
وإن شاء الله المدرسات الجدام بيفيدونا أكثر لأن خبرتي قليله بالنسبة لهن….وأنا وياج لازم نتواصل دامنا بندرس نفس المرحلة بس الفرق أنا بدرس أولاد هههه
ملف الانجاز احس واااااااااااااااااايد صعب شكلي باخذ ملفج >>>>>>>>>>>سارقة لهدف نبيل