المشاركة الأصلية كتبت بواسطة XXXXXXXXXXX :::::::::::::::::::::::::::::::::::::::::::::::::: :::::::::::::::::::::::::::::
السلام عليكم ورحمة الله وبركاته
تحية طيبة… كطيبة قلوبكم الصافية.. وبعد،
أكتب لكم مشكلتي عن طريق أختي المشرفة.. جزاها الله الف خير على سعة صدرها..
أنا متزوجة.. من 6 سنين.. أحب زوجي.. والحمدالله .. زوجي انسان ملتزم، محافظ على صلاته وأذكاره.. نحن عايشين في شقة.. والبيت اليديد على وشك الانتهاء.. ما تتصورون يا خواتي فرحتي كل ما أسير محل من محلات ..نختار انا وزوجي الألوان والتصاميم.. ونبني مع بعض البيت اللي بنستقر فيه ، ان شاء الله طول عمرنا..
ما كان في شي معكر صفونا الأسري غير شي واحد، العيـــــــــــــــــــــــال، لين الحين ومن ست سنين أنا ما حملت.. تأخر حملي.. أكيد بتسألوني.. هل سرتي وراجعتي عند دكتورة هل خذتي أبر.. هل سويتي أطفال أنابيب.. الحمد الله ، كلللللل شي جربت.. ما خليت حرمة تمسح ما سرتلها، وما خليت عيادة الا وسرتلها وما خليت دوا الا وخذته.. والأبر المنشطة أعرفهم بالأسم من كثر ما خذتها.. والعمليات من توسيع الأنابيب الى ازالة اللحميات الى اطفال الأنابيب.. لدرجة اني عندي خبرة كبيرة عن كل هذي الأشياء.. حتى صديقاتي المتزوجات والأمهات، يتصلون بي يسألوني عن بعض الأدوية النسائية.. وأنا أجوابهم!!! سبحان الله! حتى المطوع اللي يقرا عالناس من العين والسحر سرتله!
على فكرة.. كل الدكاترة اللي مروا علي بحياتي الزوجية أجابتهم وحدة (انا وزوجي سليمين 100 %)
وكل شهر وشهر.. تحصل مشادة كلامية بيني وبين زوجي.. في أغلب الأوقات انا أسكت.. وهو يتكلم ويتكلم ويتكلم.. ويجرح مشاعري .. ويزعل ولا يكلمني.. مرة قالي: (( أصلاً انتي عمرج ما بتحملين!!)) ومرة قالي: ((أكبر غلطة..كانت يوم عرست عليج..!!!)) وبعد ((انتي ما تفهمين.. انا محتاج للعيال.. أنا تعبان أكثر عنج)) كيف هو تعبان أكثر عني وأنا اللي اراكض من مكان لمكان.. كيف اني أكون أكبر غلطة في حياته! وهو اللي اختارني من بين كل البنات؟؟ كيف؟؟
الحمد الله .. أنا راضية بقسمة رب العالمين.. وأسأل الله ان يصبرني وأن يأجرني في مصيبتي.. بس يوم انتي ما تحسين ان زوجج هو شريك حياتج وهو سندج في الدنيا.. وهو اللي بيمسح دموعج وهو اللي بفرح لفرحج.. شو بيكون شعورج..
وآخر مشاكلي، اللي غيرت نظرتي تجاه زوجي هي :
ترجيت زوجي من شهرين ان نسافر العمرة.. لأني حسيت اني بجدد ايماني وعهدي مع الله.. وعشان نفسيتي تتحسن.. وأغير جو في أطهر بقعة على وجه الارض.. والحمد الله حصل ريلي حجز… وسافرنا.. وكان باقي لدورتي الشهرية اسبوع تقريبا.. ودعيت ربي اني أكون حامل.. أو انها ما تييني هناك عشان أقدر اتعبد في الحرم.. وسرنا.. واعتمرنا والحمدالله وأنا دعائي لربي ان الله يرحمني ويغفر لي ويرزقني الذرية الصالحة لي ولكل المسلمين.. وأسأل الله ان يتقبل مني.. لأنه أرحم الراحمين..
وبعد صلاة الظهر في اليوم الثالث من وصولي مكة، نزلت علي الدورة! قلت الحمد الله .. اللهم آجرني في مصيبني وخلفني خير منها.. انا لله وانا اليه راجعون.. طبعاً ريلي عرف لأن صلاة العصر ما رحت الحرم.. وتم ساكت من الصدمة.. وما يكلمني.. وفي اليوم الثاني.. وبعد صلاة الظهر.. قالي: تعالي يا فلانة.. يلسي عندي.. قلت: خير يا فلان.. آمر.. قال: أنا ناوي اتزوج! تميت ساكته.. وهو يكمل كلامه: الله محلل علي اني اتزوج .. وأنتي غالية عندي وأنا عمري ما راح اتغير عليج.. أبي اتزوج وحدة بس عشان تيبلي العيال.. اعرف اثنين من ربعي متزوجين حرمة ثانية وقالوا لي انه الحرمة الأولى تزعل في البداية بس بعدين ترضى.. بس انا أخبرج من الحين عشان تكونين متأقلمة مع الموضوع.. … قلت: وأنا؟؟ وأنا يا فلان؟؟؟ قالي: انتي في قلبي وعيوني.. أنتي بتمين البنت اللي انا اخترتها.. انتي بتمين أول انسانة دخلت حياتي.. قلت: والبيت اللي بنيناه قالي: البيت بيكون لج.. انتي صاحبة البيت.. اما الثانية ممكن ادور لها أي شقة او اي بيت صغير اسكنها فيه.. قلت: وبعدين! ليلة لي! وليلة لها! .. قالي: لا لا لا .. ليلتين لج .. وليلة لها! لأنج انتي حبيبتي وقلبي.. .. كل هذا وانا مصدومة.. ودموعي تنزل وتنزل.. ونحن مجابلين الكعبة.. وبعدين يلس يضحك.. ويقول : شو دراج يمكن تحملين هالشهر خلينا نصبر هالشهر!! ورفعت راسي وشفته.. وقلت: اتزوج، عليك بالعافية بس أنا ما راح تشوفني مرة ثانية! أبيك اطلقني.. طالعني وقالي: لا.. انا مستحيل اطلقج.. مستحيل.. لف ويه بكل حزن وقال: أصلا انتي ما تبين سعادتي ولو كنت تبين ساعدتي كان وافقتي انتي اتزوج عشان اييب عيال.. انا ما بيلس طول عمري بدون عيال!
وهذا اللي صار بيني وبين زوجي.. ومن هذاك اليوم وأحس اني افقده في قلبي.. أحس اني هنت عليه.. وانه ما عد يعنيني مثل أول! ما صرت أحبه وأموت عليه مثل أول.. حتى الطبخ ما صرت اتفنن فيه عشانه.. حتى ثيابه ما صرت اعطره او ادخنه مثل أول!! صرت أفكر في المستقبل.. هو فتح عيوني على أشيا ما كنت حاسبتلها حساب.. ومشكلتي اني ما أقدر ارد مثل قبل.. بضحكتي وبدلعي وبكشختي.. صرت أكثر تعاسة.. و حزن.. ما صرت أكلمه وايد .. بس أسأل الله سبحانه.. ان يكتب لي الخير.. ويرزقني الذرية الصالحة.. وما اترك الاستغفار ابدا والحمد الله ..
بنات .. أحس اني نفسيتي تعبانة وايد… وأنا حاطة في بالي انه اذا سواها واتزوج.. أنا بطلق! وبنهي حياتي معاه.. لأني ما أقدر أتحمل اني اشوفه مع انسانة ثانية.. واذا ياب منها عيال.. مستحيييييييييل انه يفضلني عليها.. وبتكون هناك أسرته بين حرمته ام عياله و عياله.. وهني أزمته! امرأة وحيدة بين أربع جدران..!
دعاتكم لي بالخير خواتي
والله موضوع وايد يعور القلب و مب عارفة شو اقول
غير انها تصبر و تتحمل و كل شي قسمة ونصيب
شدراها يمكن لو ريلها تزوج الرحمة الثانية .. يظهر بالحرمة الثانية بعد عيب و ما تروم تحمل
كل شي بيد الله تعالى
و بالنسبة للريال يوم ان هو متدين ما شاء الله المفروض يعرف ان هالشي قسمة و نصيب
و بنفس الوقت وياه حق ان الله حلل اربع حريم
والله مب عارفة شو اكتب اخاف يكون ردي جارح
بس انا اقول تخلي الريال يعرس و اتم ع ذمته لأن هالريال سندها في الحياة و هي تحبه وايد واضح من كلامها
لكن تحافظ ع حقوقها وياه يعني مجرد شافت اهمال بسيط تخبره
و هذا هو الأمر الواقع
و الله ايسر لها امورها يا رب ان شاء الله و تحمل
و الحمدلله ريلها مبين بعد ان هو يحبها لأن شاورها بهالشي
في رياييل يعرسون بالسر و لا يخبرون حريمهم و لا يسوون لهم سالفة
ع الاقل هالريال وضح لها بعض النقاط
مثل البيت و عدد ليالي المبيت و فضلها ع الحرمة الثانية ف ان بيعيشها بشقة
و ان هي بتم الأساس
000
اتمنى ما اكون ثقلت بردي
لا اله الا انت سبحانك اني كنت من الظالمين
والله يعينها ويرزقها يارب عاجلا وليس آجلا
وريلها فيه ميزه مش موجوده في وايد رياييل وهي الصدق والشفافيه
كان بامكانه بكل سهوله انه يعرس من وراها بس هو بغاها تكون في الصوره
هو من حقه يتزوج واييب عيال وهي من حقها تختار العيشه معاه او الانفصال
المفروض ماتستعجل واتييب ورقه وتكتب ايجابيات وسلبيات الزواج وهي على ذمته وتكتب الايجابيات والسلبيات من طلاقها وتقارن واتشوف الانسب وطبعا كلا الامرين مر بس شو تسوي لازم تختار
والله قلبي عورني
حرااام كسرت بخاطري غمضتني
ياااااارب ارزقها بالذرية الصالحة
والله يهدي ريلها ان شاء الله
عليها بالإستغفار