مب رايمه عليه يذاكر-والمدرسات كله يشتكون ويقولوا
أنه مايشارك ومرات يستوي مشاغب ومرات هادئ
بس فالبيت فظيعة شطانته والقهر أني إذا بغيت أنزاعة
أو أقول له شيء يسكتني ريلي ويقول أعصابج لاتحرقين
أعصابج هذا بعده مايفهم-يعني إذا مافهمته الصح من الغلط
وعلمته الشي الزين وحببته فالدراسة متى عيل الولد بيتعلم
تخيلوا طول الأجازة أنا أحاول أعلمه كيف نركب من الحروف
كلمات وهو يقعد وياي شوي وشوي يطفش مني مادري هو
من أسلوبي ماعرف أعلم أو ماأعرف أوصل له المعلومه
أقعد بأحل وياه الواجب يحلّ كلمه كلمتين وعقب يقول بس
تعبت-والله مادري أنتوا تشتكون من نفس الشي وإلا لا.بس
أتمنى تعطوني نصايحكم.
ولدج شكله دلوووع وأبوه مدلعنه بزياده ..
شو بعده صغير .. الصغير لازم يتعلم من صغره الصح من الغلط و يعرف يميز بين اللي المفروض يسويه والمفروض يتجنبه .. اذا ما تعلم أحين صدقيني مستحيييييييييل تقدرين عليه عقب ..
و حاولي تشدين عليه مب على كيفه يكتب كلمتين ثلاث وعقب يمل !!
جذه بيتعود انه يمشيج على كيفه و بيتكاسل في دراسته و بيطلع خايب صدقيني ..
حاولي تغيرين من أسلوبج في التعامل وياه و أسلوبج في التعليم بعد ..
لو مثلا قال خلاص تعبت و حسيتي انه يتدلع قوليله ممنوع تتحرك من مكانك لين تكمل الواجب والا بتتعاقب .. وكوني قد الكلمه وعاقبيه .. ولو حسيتي انه صج تعب عطيه فتره راحه خمس او عشر دقايق بالكثير وارجعي كملي وياه .. و بعد ما يخلص كافئيه بشي يحبه سواء لعبه أو بالونه أو كاكاو أو استيكر أو أي شي ثاني .. المهم تشجعينه بأي طريقه و تحببينه بالدراسه وعلشان يحس انه ينتج شي و يحصل شي ملموووس و لا تنسي الدافع المعنوي يعني امدحيه دوووم و قولي ما شاء الله عليك شاااطر تعرف تكتب و تعرف تقرا و براااااااافو عليك و ممتاااااااااااز و طيحي فيه مديح عسب ينفخ ريشه اشوي و يراويج ابداعاته دوووم ^^
اطبعي له أوراق عمل و يااااااااااا كثرها في النت .. نوعي بأوراق العمل عربي وانجليزي وماث و أكتيفيتي ..
يعني مب تعطينه شي كتابي بحت وبس لااا خلي اشوي الواجبات منوعه .. واجبات خاصه فيج انتي مب بس واجبات المدرسه .. أنا جي أسوي في ولدي مع انه في كي جي 2 …
بس ما شاء الله عليه خلاص تعود لو أنا نسيت ما طبعت له أوراق عمل هو بروحه اييني يقول ماما وين الواجب … الله يحفظه
الياهل على ما تعودينه صدقيني .. اذا من البدايه خليتيه على كيفه مستحيل تقدرين تمشينه على رايج عقب و اذا شديتي عليه من البدايه ان شاااء الله بيطلع شاطر و مؤدب ..
ولو غلط في المدرسه عاقبيه ترى دورج متواصل ويا المدرسه مب كل شي عليهم .. التربيه أساسها البيت ..
هدديه لو عاد غلطه أو شاغب مره ثانيه في المدرسه بتحرمينه من ألعابه أو أي شي يحبه و قوليله بعاقبك يوم كامل تقعد مكانك على الكرسي ولا تتحرك ولا تلعب بأي شي … وشوفي كيف بيتأدب ..
الله يصلحه و يوفقه في دراسته ان شاء الله …