شحالكن أمهات ان شاء الله بخير؟
وباختصار الله يجزيها الجنة اللي بتساعدني
أنا عندي ثلاث بنات الله يحفظهن لي يارب أعمارهن متقاربة أكبر وحدة تقريبا 3 والصغيرة توها شهرين .. المشكلة اني اداوم ووقتي جدا محدود .. وحاطتلهن خدامات .. هالخدامات انا وايد انقهر يوم اشوف ان لهن سلطة على بناتي بمعنى انهن هن اللي يسبحنهن ويبدلن لهن هذا غير الوقت اللي يقضنه معاهن …
حاولت اخفف من هالشيء بأني حطيت الثنتين الكبار في حضانة
بس بعد من الظهر لين الليل الخدامات هن اللي يتحملن معظم مسؤليات الكبار لاني مشغولة برضاعة الصغيرة وملاحظتها
انا اتمنى لو فيه طريقة ماحد يسبح بناتي ويرعاهن غيري … أتمنى فعلا أقدر أسوي شيء بحيث اني أخفف من سلطة الخدامات عليهن .. هو الحمدلله الصغيرة تعدل نومها عن قبل واستوت شوي تعطيني فرصة اشوف خواتها …
ومرة ثانية شكرا ألف ومليون وأكثر للي بدلني على طريقة في مثل ظرفي ..
وانا أحيي فيج الغيرة على بناتج وهذا شي ممتاز
وان شاء الله هذا بداية الطريج
يعني انتي كم دقيقة راح تاخذ من وقتج اذا سبحتي بناتج .. طبعا ولا شي
نظمي وقتج اختي وخلي بناتج من الأولويات وبتشوفين كيف راح الله يوفقج
انا ما داني شي اسمه خدامة تسبح عيالي ..
اقنعي نفسج بهالفكرة انه مستحيل اخلي شغالة تهتم بعيالي
وبالنهاية مثل ما قلت
بالعزيمة والارادة القوية وتنظيم الوقت نصنع المستحيلات
بناتج ثم بناتج ثم بناتج
تحملي هاذي أمانه من رب العالمين محاسبين عليها يوم الدين
وما شاء الله عليج العارف لا يعرف .
تمنياتي لج بالتوفيق .
مرحبا الغاليه انا بعد مع كلام الخوات تقدرين تقولين للخدمات مايسبحون البنات خلال فترة الدوام يعني انتي سبحيهم بروحج فليل او العصر صدقيني بترتاحين نفسيا الله يوفقج الغاليه
اول ما اتيين نامي لج ساعه ع الاقل .
وبعدين اطالعي عيالج ،،،، يعني يلسو بمكان واحد انتي والبنات والصغيروني
بيحسون بالفه وبيعاونون بعضهم ، اكلي الصغير وخلي له وقت ينام ومن ينام سبحي الصغاريه واكليهم
لعبي وياهم ، سرحي شعرهم بطريقه لعب ، او شوفيهم شو يبون
حتى حتى لو بالحضانه بعد يفهمون ولهم طلبات
واهم شي لا تنسين عمرج (اهتمي بعمرج زين ) صحتج فوق كل شي وشكلج ونفسيتج
وفي واحد بعد لا تنسينه هو ابو العيال ..
ولا تنسي ذكر الله ، هذا افضل موفق لحياتك
السدره
حولي انك تخلي السبوح من مهماتك انتي فقط … وليس من مهمات الشغالة
وحاولي انك يوميا تخصصي وقت تلعبين فيه مع بناتك بدون وجود الخدم معكم والعبي معهم كانك طفلة مثلهم وسوي مثل حركاتهم … وشوفي كيف بيخبللللو عليكي … لانه الاطفال بيتعلقون اكثر شي بالاشخاص الي بلعبوهم … ويوميا اقري لهم قصص قبل النوم على شان اخر شي يسمعو صوتك قبل لا ينامو وبيفضل صوتك في اللاوعي عندهم .. وان شاء الله بكون له اثر ايجابي على علاقتك بهم خاصة انك بتغيبين عنهم معظم النهار